ފީފާ ވޯލްޑް ކަޕް ގަދަ 16ގައި އިންގްލެންޑު ބަލިކުރެވޭނެ ކަމަށް ސެނެގާލްގެ އެސިސްޓެންޓް ކޯޗު ރެގިން ބޮގާޓް ބުނެފިއެވެ.

ބޮގާޓް މިހެން ބުނީ މުބާރާތުގެ ގަދަ 16ގެ މެޗުގެ ކުރިން އޮތް ޕްރެސްގައި ވާހަކަ ދައްކަމުންނެވެ. އެ ޕްރެސްގައި ސެނެގާލްގެ ކޯޗު އަލިއޫ ސީސޭ ބައިވެރިވެފައެއް ނުވެއެވެ. ސީސޭ ޕްރެސްގައި ބައިވެރިވެފައި ނުވަނީ ބަލި ހާލަތު ހުރި ގޮތުންނެވެ. ޕްރެސްގައި ވާހަކަ ދައްކަމުން ސެނެގާލްގެ އެސިސްޓެންޓް ކޯޗު ބޮގާޓް ބުނީ މި ވަގުތަށް މުޅި ސެނެގާލް ޓީމު ވެސް އޮތީ ވަރަށް ހަމަޖެހިގެން ކަމަށެވެ. އަދި ސެނެގާލުން ހާސިލްކުރަން ބޭނުންވާ ކަންތައްތައް ވަރަށް ސާފު ކަމަށާއި، ބޭނުންވަނީ ގަދަ 16 ފަހަނައަޅާ ކުއާޓާ ފައިނަލަށް ދާން ކަމަށެވެ.

އޭނާ ބުނީ ސެނެގާލް ޓީމުން ތައްޔާރުވަމުން އަންނަނީ ވެސް އެކަމަށް ކަމަށެވެ. ބޮގާޓް ބުނީ މުޅި ޓީމު ހަމަޖެހިފައި އޮވެ މެޗާ ކުރިމަތިލައި، މެޗުން މޮޅުވުމަށް ކުރެވެން ހުރި ހުރިހާ މަސައްކަތެއް ކުރަމުން އަންނަ ކަމަށެވެ. އިތުރަށް އޭނާ ވަނީ ކޯޗު ސީސޭ ބަލިއުޅޭކަމަށް ބުނެފައެވެ. އެގޮތުން ކޯޗު ބަލިވެ އުޅޭތާ މިހާރު ދެ ދުވަސް ވެދާނެކަން ފާހަގަ ކުރަމުން އޭނާ ބުނީ، ފަރިތަކުރުންތައް ކުރިއަށް ގެންދަނީ ކޯޗުގެ އިރުޝާދުގެ މަތިން އޭނާގެ ބެލުމުގެ ދަށުން ކަމަށެވެ. އަދި އުއްމީދު ކުރަނީ އާދިއްތަ ދުވަހު ކޯޗު އަލުން އެނބުރި ޓީމާ ގުޅި، ޓީމާއެކު ހުންނާނެ ކަމަށެވެ.

މީގެ އިތުރުން ބޮގާޓް ބުނީ ސެނެގާލަށް އިންގްލެންޑް ބަލިކުރެވުމަކީ ވަރަށް ބޮޑު ކަމަކަށްވާނެ ކަމަށެވެ. އޭނާ ބުނީ މީގެ ކުރިން 2002 ވަނަ އަހަރު އޮތް މުބާރާތުގެ ގަދަ 16ގައި ސްވެޑެން އަތުން މޮޅުވުމަށް އޭރުގެ ކުޅުންތެރިން އިސްކަން ދިނީ ކިހާ މިންވަރަކަށް ކަމެއް އޭނާ އަށް ނޭނގޭ ކަމަށެވެ. އަދި އެހާރެކޭ އެއްގޮތަށް މިހާރު ވެސް އެ މުހިންމުކަން ކުޅުންތެރިން ދޭން ޖެހޭނެ ކަމަށެވެ. ބޮގާޓް ބުނީ ޓީމުގައި މިހާރު ތިބި ކުޅުންތެރިންނަށް އާދިއްތަ ދުވަހުގެ ރޭ އޮންނަ މެޗަކީ އެ މިންވަރަށް މުހިންމު މެޗަކަށް ވާނެ ކަމަށެވެ.

އިތުރަށް އޭނާ ބުނީ އިންގްލެންޑަކީ އެންމެ މޮޅު ފަސް ޤައުމުގެ ތެރޭގައި ހިމެނޭނެ ޓީމެއް ކަމަށާއި، އެކަމަށް އަހުލުވެރިވެގެން ތިބި ކަމަށެވެ. އޭނާ ބުނީ އެކަހަލަ ޓީމެއް ބަލިކުރުމަކީ ފާއިތުވި ދުވަސްތަކުގައި ސެނެގާލްގެ ފުޓުބޯޅަ ކުރިއެރުވުމަށް ކުރި މަސައްކަތާއި، ކުރިއަރާފައިވާ، މިންވަރު ސާފުކޮށްދޭނެ ކަމެއް ކަމަށެވެ.

ސެނެގާލް އަދި އިންގްލެންޑް ވާދަކުރާ މެޗު ފަށާނީ އާދިއްތަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.