އަދީބަށް ނުފިލޭގޮތަށް ބޭހަށް ބޭރަށް ފޮނުވިދާނެ: ޑރ ޝަހީދު
25 ޖޫން 2017 | އާދީއްތަ 20:58ދިވެއްސަކު ކަނޑުވަމުންދާއިރު އަނެއް ދިވެއްސަކު ބަލަން ނުހުންނާނެ
ކުރީގެ ފޮރިން މިނިސްޓަރ އަދި އދ. ޚާއްސަ ރެޕަޓުއަރ ޑރ. އަހުމަދު ޝަހީދު
ކުރީގެ ނައިބުރައީސް އަޙުމަދު އަދީބަށް ފިއްލެވުމުގެ ފުރުޞަތު ލިބިވަޑައި ނުގަންނަވާނޭ ގޮތަށް، ބޭސްފަރުވާއަށް ރާއްޖެއިން ބޭރަށް ފޮނުވިދާނެ ކަމަށް ކުރީގެ ފޮރިން މިނިސްޓަރ އަދި އދ. ޚާއްސަ ރެޕަޓުއަރ ޑރ. އަހުމަދު ޝަހީދު ވިދާޅުވެއްޖެއެވެ.
އާދިއްތަ ދުވަހުގެ ރޭ ޑރ. ޝަހީދު ކުރައްވާފައިވާ ޓްވީޓެއްގައި ވިދާޅުވީ، އަދީބް ފިއްލަވަން ބޭނުންފުޅުވެވަޑައިގަތަސް ނުފިއްލެވޭނެ ގޮތަށް އެމަނިކުފާނު ބޭސްފަރުވާއަށް ރާއްޖެއިން ބޭރަށް ފޮނުވިދާނެ ކަމަށެވެ. މިހެން ވިދާޅުވެ، ޑރ. ޝަހީދު ވަނީ (އެކުވެރި ޤައުމުތަކުގެ) މިލިޓަރީ ހޮސްޕިޓަލްތަކާއި، އެކި ޤައުމުތަކާއިއެކު ވެފައިވާ އެއްބަސްވުންތައް ކޮބައިތޯ ސުވާލު ކުރައްވާފައެވެ.
މީގެ އިތުރުން، މީހަކު ކަނޑުވަމުންދާތަން ބަލަން އެއްވެސް ދިވެެއްސަކު ހުރެދާނެތޯ ޑރ. ޝަހީދު ވަނީ ސުވާލު އުފައްދަވާފައެވެ. އަދި އަދީބަށް ބޭސް ފަރުވާ ކުރުމުގެ ފުރުސަތު ދޭން ޖެހޭނީ، އިންސާނިއްޔަތަށްޓަކައި ކަމަށް ޑރ.ޝަހީދު ވިދާޅުވިއެވެ.
ޑރ. ޝަހީދު ކުރައްވާފައިވާ އިތުރު ޓްވީޓެއްގައި ވިދާޅުވީ، އދ. ގެ ހިއުމަން ރައިޓްސް ކައުންސިލާއި ސެކިއުރިޓީ ކައުންސިލްގެ ގޮނޑިއެއް ހޯދުމަށް ރާއްޖެއިން ކެމްޕެއިން ފަށާފައިވާ ނަމަވެސް އެކަން ކާމިޔާބު ކުރެވޭނެ އެއްވެސް މަގެއް ރާއްޖެއަށް ނެތްކަމަށެވެ. އަދި އެކަމަށް ބޭކާރު ޚަރަދުތައް ކުރުމުގެ ބޭނުމެއް ނެތްކަމަށް ޑރ. ޝަހީދު ވިދާޅުވިއެވެ. ރާއްޖޭގެ ފޮރިން މިނިސްޓަރ ޑރ. މުހައްމަދު އާސިމައަށް ވެސް ޓެގްކުރައްވާ ޑރ. ޝަހީދު ވިދާޅުވީ، ރައްޔިތުންގެ ފައިސާއިން ބޭކާރު ޚަރަދުކުރުމުގެ ފުރުސަތު ރައްޔިތުން މި ސަރުކާރަށް ނުދޭނެކަމަށެވެ.
ރާއްޖެއަަށް ހިއުމަން ރައިޓްސް ކައުންސިލްގެ ގޮނޑި ކާމިޔާބު ނުވާނެ އެއް ސަބަބެއްކަމަށް ޑރ. ޝަހީދު ވިދާޅުވީ، މަޝްހޫރު ބްލޮގަރ އަދި އިންސާނީ ހައްގުތަކުގެ ވާހަކަ ދައްކަމުންއައި ލިޔުންތެރިޔާ ޔާމީން ރަޝީދު އަނިޔާވެރިގޮތަކަށް މަރާލާފައި ވުމެއެވެ. އަދި އޭނާގެ އާއިލާއަށް އިންސަފު ހޯދައިދެވިފައި ނުވުމެވެ. ޑރ. ޝަހީދު ވިދާޅުވީ، ޔާމީން މަރާލުމުން އެ ގޮނޑި ރާއްޖެއަށް ލިބުމުގެ ފުރުސަތު މުޅިން ބަންދުވީ ކަމަށެވެ.
އދ. ގެ ހިއުމަން ރައިޓްސްކައުންސިލްގެ މި ގޮނޑިއަށް ރާއްޖެއާއި އެކު ދެން ވާދަކުރަނީ، އަފްގާނިސްތާން، ނޭޕާލް، ޕާކިސްތާން، އަދި ގަތަރުންނެވެ. މި ގައުމުތަކާއެކު ރާއްޖެ ވާދަކުރާއިރު، ހޮވޭނީ އެންމެ ގިނަ ވޯޓް ލިބޭ ގައުމެކެވެ. އދ. ހިއުމަން ރައިޓްސްގެ ގޮނޑިއެއް ރާއްޖެއިން އެންމެފަހުން ކާމިޔާބުކޮށްފައިވަނީ 2010 އަހަރު ރައީސް ނަޝީދުގެ ވެރިކަމުގައެވެ. އޭރު ވާދަކޮށްގެން އެންމެ ގިނަ ވޯޓް ހޯދީ ރާއްޖެއިންނެވެ.
