މޮރޮކޯއާ ދެކޮޅަށް ކުޅޭ މެޗަކީ ކެނެޑާ އަށް ފުޓުބޯޅައިގައި ކުރިއަށް ދެވޭނެކަން ދައްކުވައިދޭން ލިބޭ ރަނގަޅު ފުރުސަތެއް ކަމަށް އެ ޓީމުގެ ކޯޗު ޖޯން ހާޑްމަން ބުނެފިއެވެ.
ހާޑްމަން މިހެން ބުނީ ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި ބުރާސްފަތި ދުވަހުގެ ރޭ މޮރޮކޯއާ ދެކޮޅަށް ނުކުތުމުގެ ކުރިން ވާހަކަ ދައްކަމުންނެވެ. އެ މެޗަށް ކުރިމަތިލާއިރު ވެސް ކެނެޑާ ވަނީ މުބާރާތުން ކަޓައިފައެވެ. އެއީ ގްރޫޕް ސްޓޭޖުގައ މިހާތަނަށް ކުޅުނު ދެ މެޗުން ވެސް އެ ޓީމު ބަލިވެފައި ވުމުންނެވެ.
ހާޑްމަން ބުނީ އެ މެޗަކީ ކެނެޑާގެ ކުޅުންތެރިންނާއި މުޅި ކެނެޑާ އަށް ކުރިއަށް ދާން ލިބޭނެ ވަރަށް ބޮޑު ފުރުސަތެއްގެ ގޮތުގައި އޭނާ ދެކޭ ކަމަށެވެ. އޭނާ ބުނީ ކެނެޑާގެ ސްކޮޑުގައި ތިބި ކުޅުންތެރިންނާއެކު އެ ޓީމުން މިއަހަރުގެ މުބާރާތުގައި ރަނގަޅު ވާދައެއް ކުރި ކަމަށެވެ. އޭނާ ބުނީ މުބާރާތުގައި ކެނެޑާ ދެއްކާނެ ކުޅުމަަށް ފުޓުބޯޅަ އަށް ލޯބި ކުރާ އެތައް ބަޔަކު އިންތިޒާރު ކުރި ކަމަށެވެ. އޭނާ ބުނީ މުބާރާތުގައި ކެނެޑާ އިން ދައްކައިދިނީ އެ ޓީމަކީ ވެސް ވާދަކުރެވޭ ފެންވަރުގެ ޓީމެއް ކަމަށެވެ. އޭނާ ބުނީ ހިތްވަރު އެލުވާނުލާ، މޮރޮކޯ މެޗަށް ނިކުނެ ބޭނުންވަނީ ތާރީޚު ލިޔަން ކަމަށެވެ. ހާޑްމަން ބުނީ ފާއިތުވި ދުވަސްތަކުގައި ކެނެޑާ އިން ވަރަށް މަސައްކަތް ކޮށްފައިވާނެ ކަމަށެވެ.
މީގެ އިތުރުން ހާޑްމަން ބުނީ މުބާރާތުގައި ކެނެޑާއަށް މާ ދުރަށް ނުދެވޭނެކަން އިނގޭ ކަމަށެެވެ. ނަމަވެސް އަދިވެސް ކުޅުންތެރިން ތިބީ އެމީހުންގެ އާއިލާ އަދި ސްޕޯޓަރުންނަށްޓަކައި ފަހު މެޗުގައި މޮޅު ކުޅުމެއް ދެއްކުމުގެ އުއްމީދުގައި ކަމަށް ވެސް ހާޑްމަން ބުންޏެވެ.
މިއަހަރުގެ މުބާރާތަކީ ކެނެޑާ އަށް ތާރީޚީ މުބާރާތެކެވެ. މިއީ ގިނަ އަހަރުތަކަކަށްފަހު އެ ޤައުމުން ވޯލްޑް ކަޕްގައި ވާދަ ކުރި ފުރަތަމަ އަހަރެވެ. މިއަހަރު ނޫނީ އެންމެ ފަހުން އެ ޤައުމުން ވޯލްޑް ކަޕްގައި ކުޅުނީ 1986 ވަނަ އަހަރުއެވެ. އެ އަހަރުގެ މުބާރާތް ކެނެޑާ އިން ނިންމާލީ ޕޮއިންޓެއް ނުލިބި ތާވަލްގެ ފުލުންނެވެ. މިއަހަރުގެ މުބާރާތަށް ކެނެޑާ އައީ 36 އަހަރުގެ މެދު ކެނޑުމަކަށްފަހުއެވެ.
