މިހާތަނަށް ފްރާންސް ޓީމުން ފެނުނީ ކުޅުންތެރިންގެ މޮޅުކަމާއި ކޯޗުގެ ރޭވުންތެރިކަން

ވޯލްޑްކަޕް ފުޓްބޯޅަ މުބާރާތުގައި މިރޭ ޓިއުނީޝިޔާއާ ދެކޮޅަށް ނުކުންނައިރު ފްރާންސް ވަނީ މުބާރާތުގެ ދެ ވަނަ ބުރުގައެވެ.

މިހާތަނަށް ކުޅުނު ދެ މެޗުން ވެސް މޮޅުވެ ސައްތައިން ސައްތަ ރެކޯޑަކާއެކު އެންމެ ފަހުގެ ޗެމްޕިއަނުން ދެ ވަނަ ބުރަށް ދަތުރުކުރީ ޓީމުގެ ކުޅުދާނަކަން ސާބިތުކޮށްދެމުންނެވެ. މުހިންމު އެތައް ކުޅުންތެރިންނެއް އަނިޔާގެ ސަބަބުން ވޯލްޑްކަޕް ސްކޮޑުގައި ނުހިމެނުނު ނަމަވެސް ފްރާންސްގެ ކުޅުންތެރިންގެ މޮޅުކަމާއި ކޯޗުގެ ރޭވުންތެރިކަން ދިޔައީ މުޅި ދުނިޔެ އަށް ސާބިތުކޮށްދެމުންނެވެ. މިހެންވެ މިރޭ ފްރާންސް ޓީމުން ބަދަލުތަކެއް ފެނިގެންދާނެއެވެ.

އެކަމަކު ފޯވާޑް ކީލިއަން އެމްބާޕޭ މިރޭގެ މެޗުގައި ވެސް ފުލްކޮށް ކުޅޭނެއެވެ. ކޯޗު ޑިޑިއޭ ޑެޝޯން ބުނީ ދެ ވަނަ ބުރުގައި އޮތުމަކީ ރިސްކު ނަގަންޖެހޭ ކަމެއް ނޫން ކަމަށާއި އެމްބާޕޭ އަކީ މުބާރާތުގައި ތަށި ހޯދުމުގެ އިތުރަށް އިންޑިވިޖުއަލް އެވޯޑްތަކަށް ވެސް ވާދަކުރެވޭނެ ކުޅުންތެރިއެއް ކަމަށެވެ. ނަމަވެސް މި މެޗާ ކުރިމަތިލާއިރު އޭނާ އަށް 8000 ޕައުންޑްގެ ސަސްޕެންޝަނެއްގެ ބިރު ވަނީ ކުރިމަތިވެފައެވެ. އެއީ މެޗުތަކަށް ފަހު ޕްރެސް ކޮންފަރެންސްއަށް ދާން ދެކޮޅު ހަދާތީއެވެ. ފްރާންސްގެ ކޭމްޕުން ބުނާ ގޮތުގައި މިވަގުތު ދުނިޔޭގައި ހުރި އެންމެ އަގުބޮޑު ކުޅުންތެރިޔާ ޕްރެސް އަށް ދާން ދެކޮޅު ހަދަނީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އާ އެކު އޭނާގެ ކުރިމަގު އޮތްގޮތާ މެދު ނޫސްވެރިން ކުރާ ސުވާލުތަކަށް ޖަވާބު ނުދޭން ވެގެންނެވެ. ގިނަ ބަޔަކު ސިފާކުރާ ގޮތުގައި ޕީއެސްޖީއާ އާއި އެމްބާޕޭގެ ގުޅުން ރަނގަޅެއް ނޫނެވެ.

ވަކިވަކި ކުޅުންތެރިންގެ ތެރެއިން ޑިފެންޑަރު ރަފެއޭލް ވެރާން މި މެޗުގައި ނުފެނުމަކީ އެކަށީގެންވާ ކަމެކެވެ. އޭނާގެ އުކުޅުވަޅަށް ހާނިއްކަވެފައިވާތީ އޭނާ ލައްވައި ކުޅުވައިގެން ކުރިއަށް ހުރި މެޗުތަކަށް ހުރަސް އެޅޭކަށް ކޯޗު ބޭނުމެއް ނުވެއެވެ. ނަމަވެސް ފޯވާޑް އޮލީވިއޭ ޖީރޫޑް މެޗުގައި ކުޅެން ކެތްމަދުވެފައި ހުރީ އޭނާގެ ކުރިމަތީގައި އޮތް އުފާވެރި ރެކޯޑެއްގެ ސަބަބުންނެވެ. ޖީރޫޑް ވަނީ މިހާތަނަށް ގައުމީ ޓީމަށް 51 ގޯލު ޖަހާފައެވެ. މިހެންވެ އިތުރަށް އެންމެ ގޯލެއް ޖެހުނަސް ފްރާންސްގެ ކުރީގެ ފޯވަޑް ތިއޭރީ އޮންރީ ފަހަތަށް އެއްލާލައި ގައުމީ ޓީމަށް އެންމެ ގިނަ ގޯލު ޖެހި ކުޅުންތެރިޔާގެ ރެކޯޑް ޖީރޫޑަށް ހޯދޭނެއެވެ. އޭނާ އަށް ލިބޭނެ އެންމެ ބޮޑު އުފަލަކަށްވާނީ ވޯލްޑް ކަޕް މެޗެއްގައި ގޯލު ޖަހައިގެން މި ރެކޯޑް އަމިއްލަ ކުރުމެވެ.

ފްރާންސް ވޯލްޑްކަޕް 2018 ކާމިޔާބުކުރި އިރު އެންމެ ބޮޑަށް ފެނުނީ ޑިފެންސިވްކޮށް ޓީމުގެ ވަރުގަދަކަމެވެ. މުޅި ޓީމުގެ ރޭވުންތެރިކަން ފުރިހަމައެވެ. ނަމަވެސް ޔޫރޯ 2020 ގައި ސްވިޒަލޭންޑްގެ ދެމެހެއްޓެނެވި ގޮތެއްގައި އެއްވާނެއްގައި ކުޅުމުގެ ނަތީޖާއަކަށްވީ އެމީހުން އަތުން ބަލިވެ ފްރާންސް ކެޓުމެވެ. މިއީ ކޯޗު ޑެޝޯމްޕްގެ 3-4-1-2 ގެ ފޯމޭޝަނަށް ބަދަލުތަކެއް ގެންނަންޖެހޭ ކަމުގެ ހެއްކެކެވެ. މިކަން ކުރުމަށް ފްރާންސްގައި ތަރިން މަދެއް ނޫނެވެ. އެކަމަކު ޓީމުގެ އެކި މަގާމުތަކުގެ ތެރެއިން ސުވާލު އުފެދޭ ހަމައެކަނި މަގާމަކީ ކަނާތު ބެކެއްގެ މަގާމެވެ. ބެންޖަމިން ޕަވާޑަކީ އެޓޭކުގައި ވަރަށް ރަނގަޅަށް ބައިވެރިވާ ކަނާތު ބެކެކެވެ. ކިންގްސްލީ ކޯމަން އެމަގާމަށް ފިޓްކުރަން އުޅުނަސް އެކަން މާބޮޑަށް ކާމިޔާބެއްނުވިއެވެ.