ކީރިތި ކުރައްވައި ރައީސް ދެއްވި ޚާއްސަ މެސެޖުން ފެނުނީ ރައްޔިތުންނަށް އޮތް ލޯބި

މިއަދު ދިވެހި ޤައުމު އަލިވިލުނީ ކޮވިޑް-19 އަށް މާލެއިން މީހަކު ޕޮޒިޓިވްވި ޚަބަރާއެކުއެވެ. ކޮވިޑް-19 އާއި ގުޅިގެން ފަހުގެ ތާރީޚެއްގައި ދިވެހިން ސިއްސުވާލި ބޮޑު ޚަބަރަކަށް އެކަން ވެގެން ދިޔައީ މީގެ ކުރިއާ ޚިލާފަށް މިފަހަރު ޕޮޒިޓިވްވި މީހާއަކީ ރާއްޖޭން ބޭރުގެ ދަތުރުފަތުރުގެ ހިސްޓްރީއެއް އޮތް މީހަކަށް ނުވާތީއެވެ. މާލެ ތެރެއިން ޕޮޒިޓިވްވި ފުރަތަމަ ކޭސްއަށް ވާތީއެވެ.

އެހިސާބުން ރައްޔިތުންގެ މެދުގައި އުފެދުނު ހިތްނުތަނަވަސްކަމާއި ބިރުވެރިކަން، އެވަގުތުން ފެށިގެން ފެންނަމުން ދިޔައެވެ. މާލެ ސަރަޙައްދު ލޮކްޑައުން ކުރުމުގެ ކުރިން ފެނުނީ ފިހާރަތަކާއި ކަބޯތަކެތި ވިއްކާ ތަންތަން ތޮއްޖެހުނު މަންޒަރެވެ. މުޅި މާލެ ހަލަބޮލިވެގެން ދިޔަ މަންޒަރެވެ. މިފަދަ ހައްސާސް ދަނޑިވަޅެއްގައި ރައްޔިތުންގެ ހިތްތަކަށް ތަސައްލީއެއް ގެނުވި އެއް ކަމަކަށް ދިވެހި ޤައުމުގެ ހުންގާނުގައި ހިއްޕަވައިގެން ހުންނެވި، ޤައުމުގެ ރައީސް އިބްރާޙިމް މުޙައްމަދު ސޯލިޙު ޤައުމާ މުޚާތަބު ކުރައްވައި ދެއްކެވި ވާހަކަފުޅު ވެގެންދާނެ ކަން ޔަޤީނެވެ. އަސަރާއެކު ކީރިތ ކުރައްވައި ރައީސް ދެއްވި މެސެޖުންވެސް ދިވެހިންގެ ހިތްތަކަށް އިތުރު ހިތްވަރަކާއި، އެއްބައިވަންތަކަމުގެ އިތުރު ޖޯޝެއް ގެނުވިކަން ޔަޤީނެވެ.

ވާހަކަފުޅު ފައްޓަވަމުން ރައީސް ވަނީ ޤައުމުގެ ޙާލަތަށް އަލިއަޅުވާލައްވައި، ދިވެއްސަކު މާލެއިން ޕޮޒިޓިވްވުމާ ގުޅިގެން އަޅަންޖެހޭ ފިޔަވަޅުތަކަށް ދައުލަތުގެ މުއައްސަސާތައް ތައްޔާރުކަމަށް ވިދާޅުވެފައެވެ. އަދި ޖެނުއަރީ މަހުގެ ފުރަތަމަ ހަފްތާއިން ފެށިގެން ދައުލަތުގެ ހުރިހާ މުއައްސަސާތައް ގުޅިގެން މިފަދަ ދުވަހެއް އައުމުގެ ކުރިން އަޅަންޖެހޭ ފިޔަވަޅުތައް އެޅުމަށް އަވަސްވެގަތްކަން ރައީސް ފާހަގަކުރެއްވިއެވެ.

ނުހަނު އަސަރާއި ބަލާޢަތްތެރިކަމާއެކު މި ވާހަކަފުޅު ކުރިއަށް ގެންދަވަމުންގޮސް ވަކި ހިސާބަކުން ފެނިގެންދިޔައީ ފެންކަޅިވެ، ވާހަކަފުޅު ކުރިއަށް ނުގެންދެވިގެން އުޅުނު މަންޒަރެވެ. އޭރު ދައްކަވަމުން ގެންދެވީ ރާއްޖެއަށް ކުރިމަތިވެފައިވާ މި ހިތްދަތި ދަނޑިވަޅުގެ ވާހަކައެވެ. ދިވެހި ރައްޔިތުންގެ ކިބައިން ކެތްތެރިވުމަށް އެދިވަޑައިގަންނަވާ ކަމަށް ވިދާޅުވެ، ދިވެހިންނަށް ކުރިމަތިވެދާނެ ދަތިތަކުގެ ވާހަކަ ރައީސް ދެއްކެވީ ފެންކަޅިވެ އިންނަވައިގެންނެވެ.

ކީރިތި ކުރައްވައި ހުރިހާ ރައްޔިތުންގެ ކިބައިން ރައީސް އެދިވަޑައިގަތީ ރައްޔިތުން އެކަކު އަނެކަކަށް އޯގާތެރިވެ، ދީނުގެ މަތިވެރި އުސޫލުތަކުގެ ތެރެއިން އެކަކު އަނެކަކަށް އެހީތެރިވުމަށެވެ. އަދި މިވަގުތަށް އެޅެން އޮތް އެންމެ މުހިއްމު ފިޔަވަޅަކީ ބޭރަށް ނުނިކުމެ ގޭގައި މަޑުކުރުން ކަމަށާއި، ސިއްޙީ ތަޖުރިބާކާރުންގެ ލަފައަށް އަމަލު ކުރުންކަން ރައީސްގެ މެސެޖުގައި ފާހަގަ ކުރެއްވިއެވެ.

ރައީސްގެ ވާހަކަފުޅުން ފެނިގެން ދިޔައީ އެމަނިކުފާނުގެ ހިތްޕުޅުގައި ދިވެހި ރައްޔިތުންނަށް ދެވިފައިވާ މަތިވެރި ލޯތްބާއި ޤަދަރެވެ. އެމަނިކުފާނު އެދިވަޑައިގަންނަވަނީ ރައްޔިތުންނަށް ވީ ޙާލެއްގައި ވުމަށް ކަމަށާއި، ރައްޔިތުންގެ ރައްކާތެރި ކަމަކީ އެމަނިކުފާނުގެ ރައްކާތެރިކަން ކަމަށް ވިދާޅުވި ބަސްފުޅުގެ ތެދުކަން ފެނިގެންގޮސްފިއެވެ.