މިހާރު ހުޅުމާލެ އިން މަސްވެރިންނަށް ތެޔޮ ލިބޭނީ މިފްކޯއާ އެއް ރޭޓެއްގައި ކަމަށް އެފްއެސްއެމްގެ މެނޭޖިން ޑިރެކްޓަރު މުހައްމަދު ގަސަމް ވިދާޅުވެއްޖެއެވެ.

"ރާއްޖެ އެމްވީ" އަށް ދެއްވި ބަސްތީގަތުމެއްގައި ގަސަމް ވިދާޅުވީ މިހާރު ހުޅުމާލެ މަސްވެރިންގެ ޖެޓީ އިން މަސްވެރިންނަށް ތެޔޮ ވިއްކަމުން ދަނީ 17.63 ރުފިޔާ އަށް ކަމަށެވެ. އެއީ ކުރިން މަސްވެރިންނަށް ތެޔޮ ވިއްކަމުން އައި 19.3 ރުފިޔާގެ އަގަށް ވުރެ 1 ރުފިޔާ 40 ލާރި ހެޔޮ އަގެއްކަން އޭނާ ފާހަގަކުރެެއްވިއެވެ. އަގު ހެޔޮކޮށް ތެޔޮ ވިއްކަން ފެށީ މިދިޔަ އާދިއްތަ ދުވަހު ކަމަށާއި، އާދިއްތަ ދުވަހު އެކަނި ވެސް 11 ދޯންޏަށް ތެޔޮ އަޅާފައިވާ ކަމަށް ގަސަމް ވިދާޅުވިއެވެ. އަދި އެ ދުވަހު 22،000 ލީޓަރު ތެޔޮ އަޅާފައިވާ ކަމަށް އޭނާ ވިދާޅުވިއެވެ. އަގު ހެޔޮކޮށް ތެޔޮ ލިބޭނީ މަސްވެރިންނަށް އެކަނި ނަމަވެސް އެހެން ފަރާތްތަކަށް ވެސް ތެޔޮ އެޅުމަށް ފުރުސަތު ލިބިގެންދާނެ ކަމުގައި ގަސަމް ވިދާޅުވިއެވެ.

މީގެ އިތުރުން މިހާރު ތެލުގެ އަގު އުފުލިފައިވީ ނަމަވެސް ސަރުކާރުން މަސްވެރިންނަށް ހެޔޮ އަގުގައި ތެޔޮ ފޯރުކޮށްދޭން ބޭނުންވާ ކަމަށް ގަސަމް ވިދާޅުވިއެވެ. ފާއިތުވި ދުވަސްތަކުގައި މިފްކޯ އިން ތެޔޮ ވިއްކާ އަގާއި އާއްމުކޮށް ތެޔޮ ވިއްކާ އަގާއި ތަފާތުތަކެއް ހުރި ކަމަށާއި އެކަމުގެ ޝަކުވާ މަސްވެރިންނާއި ސަރުކާރުގެ ފަރާތުން ލިބެމުން އައި ކަމަށް އޭނާ ވިދާޅުވިއެވެ. އެހެންކަމުން މިފްކޯ އިން ތެޔޮ ވިއްކާ އަގުގައި މާލެ ސަރަހައްދުން ތެޔޮ ނުލިބޭ މައްސަލައަށް ހައްލެއް ހޯދައި ދިނުމަށް އެސްޓީއޯ އާއި ސަރުކާރާއެކު ކުރި މަސައްކަތްތަކަށް ފަހު އެންސިސް މަސް ފެކްޓްރީގައި ތެޔޮ ވިއްކަން ނިންމާފައިވާ ކަމަށް ގަސަމް ވިދާޅުވިއެވެ.

އެންސިސްއާ އެކު ވެފައިވަނީ 2 އަހަރު ދުވަހުގެ އެއްބަސްވުމެއް ކަމަށާއި، އެ އެއްބަސްވުމުގެ ދަށުން އެންސިސް އަށް ރަނިން ފިއުލް އަށް އެ މުއްދަތުގައި ހާއްސަ ޑިސްކައުންޓެއް ދީފައިވާ ކަމަށް ގަސަމް ވިދާޅުވިއެވެ. މީގެއިތުރުން ކުރިއަށް އޮތްތަނުގައި އެހެން ހިސާބުތަކުގައި ވެސް މިފްކޯއާ އެއް ރޭޓެއްގައި ތެޔޮ ވިއްކުމަށް މަސައްކަތްކުރަމުންދާ ކަމަށް އޭނާ ވިދާޅުވިއެވެ.