ސެނެގާލް އަކީ ބަލިވާން ބޭނުންވާ ޤައުމެއް ނޫން ކަމަށް އެ ޓީމުގެ ކޯޗު އަލިއޫ ސީސޭ ބުނެފިއެވެ.

ސީސޭ މިހެން ބުނީ ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި އިކުއެޑޯއާ ދެކޮޅަށް ނުކުންނަ މެޗުގެ ކުރިން އޮތް ޕްރެސްގައި ވާހަކަ ދައްކަމުންނެވެ. އެ މެޗުގައި އިކުއެޑޯގެ މައްޗަށް ކުރި ހޯދައިގެން ސެނެގާލަށް މުބާރާތުގެ ދެ ވަނަ ބުރުން ޖާގަ ލިބޭނެއެވެ. ޕްރެސްގައި ވާހަކަ ދައްކަމުން ސީސޭ ބުނީ އޭނާ އަކީ ބަލިވާން ބޭނުންނުވާ ޤައުމަކުން އައިސް ހުރި މީހެއް ކަމަށެވެ. އޭނާ ބުނީ ސެނެގާލުން އަބަދުވެސް ލޯބި ކުރަނީ މޮޅުވުމަށް ކަމަށެވެ. ސީސޭ ބުނީ އޭނާގެ އިތުރުން ކުޅުންތެރިންނާއި ސަޕޯޓަރުން ވެސް ބޭނުންވަނީ އިކުއެޑޯ މެޗުން މޮޅުވާން ކަމަށެެވެ.

އިތުރަށް ވާހަކަ ދައްކަމުން ސީސޭ ބުނީ ސެނެގާލް ކަހަލަ ޓީމެއް ކުރިއަށް ބުރަށް ނުދިޔުމަކީ ހަޖަމު ކުރަން ދަތިކަމަކަށް ވާނެ ކަމަށެވެ. ސީސޭ ބުނީ އަނެއްކާ ވެސް ދައްކަން އޮތީ ފުޓުބޯޅައިގެ ވާހަކަ ކަމަށާއި، މުހިންމީ ކޮންމެހެން ކުރަން ޖެހޭ ކަންކަން ކުރުމަށްފަހު، މޮޅުވުން ކަމަށެވެ.

މީގެ އިތުރުން ސީސޭ ބުނީ ޓީމު އޮތީ ރަނގަޅު ހާލަތެއްގައި ކަމަށާއި، ޕްރެޝަރާ ކުރިމަތިލާ، އެކަންކަން ހުރަސް ކުރަމުން އަންނަ ކަމަށެވެ. ސީސޭ ބުނީ އޭނާ އަށް އެ ތަކުލީފުތަކާއި، ބޮލު ރިހުންތަކަކީ ރަނގަޅު އެއްޗެއް ކަމަށެވެ. އޭނާ ބުނީ މަތީ ލެވެލްގެ ބޮޑު މުބާރާތްތަކުގައި ކުޅެން ކުޅުންތެރިން އެތައް އަހަރުތަކެއް ވަންދެން މަސައްކަތް ކުރަމުން އަންނަ ކަމަށެވެ. އަދި ކުރިއަށް ދެވެން އޮތީ ހަމައެކަނި މެޗުން މޮޅުވެގެންކަން ޤަބޫލު ކުރާ ކަމަށެވެ. ބަލިވުމުން އަނބުރާ ޤައުމަށް ދާންޖެހޭ ޖެހުމަށް ވިސްނަން ބޭނުންނުވާ ކަމަށް ވެސް އޭނާ ބުންޏެވެ.

ނިންމާލަމުން ސީސޭ ބުނީ އޭނާއާއެކު އޮތް ސެނެގާލް ޓީމަކީ ތަޖުރިބާ ހުރި ޓީމެއް ކަމަށެވެ. ނަމަވެސް ވޯލްޑް ކަޕް ކަހަލަ ބޮޑު މުބާރާތްތަކާ ކުރިމަތިލާ، އައު ޗެލެންޖު ނަގަންޖެހޭ ޒުވާން ކުޅުންތެރިން ވެސް ތިބިކަން އޭނާ ފާހަގަކުރިއެވެ. އަދި މެޗަށް ތައްޔާރުވަނީ އެންމެ ފުރިހަމަ އަށް ކަމަށާއި، ޓީމާ މެދު އިތުބާރު އޮތް ކަމަށެވެ.

މުބާރާތުގައި ސެނެގާލް އަދި އިކުއެޑޯ ބައްދަލު ކުރާ މެޗު ފަށާނީ އަންގާރަ ދުވަހުގެ ރޭ ރާއްޖެ ގަޑިން 20:00 ގައެވެ.