މިއީ ސްޕެއިން އަށް ވަރަށް ރީތި ޗެލެންޖެއް: އެންރީކޭ

ފީފާ ވޯލްޑް ކަޕް ގްރޫޕް ސްޓޭޖުގެ ދެ ވަނަ މެޗުގައި ޖަރުމަނާ ދެކޮޅަށް ކުޅުމަކީ ސްޕެއިން އަށް ވަރަށް ރީތި ޗެލެންޖެއް ކަމަށް އެ ޓީމުގެ ކޯޗު ލުއިސް އެންރީކޭ ބުނެފިއެވެ.

ޖަރުމަނު މެޗަށް ކުރިމަތިލާއިރު ސްޕެއިން ވަނީ ފުރަތަމަ މެޗުގައި ބޮޑު ތަފާތަކުން ކޮސްޓަރިކާ ބަލިކޮށްފައެވެ. އެހެންކަމުން މި މެޗުގެ ސީރިއަސްކަން ގެއްލުވާ ނުލާނެ ކަމަށް އެންރީކޭ ބުންޏެވެ. ޖަރުމަނު މެޗުގެ ކުރިން އޮތް ޕްރެސްގައި ވާހަކަ ދައްކަމުން އެންރީކޭ ބުނީ، އޭނާ އަށް ގަބޫލު ކުރެވޭ ގޮތުގައި ޖަރުމަނަކީ އަބަދު ވެސް އެޓޭކަށް އިސްކަން ދީގެން ކުޅޭ ޓީމެކެވެ. ޚާއްސަކޮށް ފުރަތަމަ މެޗުގެ ނަތީޖާ އައި ގޮތުން މި މެޗުގައި ޖަރުމަނުން އެޓޭކިން އަށް މާބޮޑަށް އިސްކަން ދޭނެ ކަމަށެވެ. އެންރީކޭ ބުނީ ޖަރުމަނު އަބަދުވެސް ކުޅޭނީ އިދިކޮޅު ޓީމުގެ ހާފުގައި ބޯޅަ ހިފަހައްޓައިގެންނެވެ. އޭނާ ބުނީ ކުޅުމުގެ ވައްޓަފާޅި ޖަރުމަނާ ސްޕެއިންއާ ދާދި އެއް ގޮތް ކަމަށެވެ. އެހެންކަމުން މިއީ ރީތި ޗެލެންޖަކަށްވާނެ ކަމަށެވެ.

އެންރީކޭ ބުނީ ފުރަތަމަ މެޗުން ބޭނުންވީ މޮޅެއް ކަމަށާއި، އެކަން ހާސިލްވުމުން ޓީމަށް ބޮޑު އިތުބާރެއް ލިބުނު ކަމަށެވެ. ނަމަވެސް ޖަރުމަނާ ދެކޮޅަށް ނުކުންނައިރު، އެކަން ކަމަށް ވިސްނާނެ ކަމަށް އޭނާ ބުންޏެވެ.

ޕްރެސްގައި ވާހަކަ ދައްކަމުން ސްޕެއިންގެ މިޑްފީލްޑަރު ޑެމީލް އޮލްމޯ ބުނީ ޖަރުމަނު އޮންނަނީ ބޮޑު ޕްރެޝަރެއްގައިކަން އެނގޭ ކަމަށެވެ. ނަމަވެސް އޭނާ ބުނީ ޖަރުމަނަކީ މިވަގުތު ވެސް ދުނިޔޭގެ އެންމެ މޮޅެތި ޓީމުތަކުގެ ތެރޭގައި ހިމެނޭނެ ޓީމެއް ކަމަށެވެ. އެހެންކަމުން އެއް މެޗުން ބަލިވުމުން ޖަރުމަނު ފަހަތަށް ޖައްސާނުލެވޭނެ ކަމަށް ވެސް އޭނާ ބުންޏެވެ. އޮލްމޯ ޖަރުމަނުން އެ މެޗު ކުޅޭނީ ފައިނަލެއް ގޮތަށް ދެކިގެންކަން އެނގޭ ކަމަށާއި، ސަބަބަކީ އެމީހުން ވެސް ދެން އޮތް ބުރުގެ ޖާގަ ބޭނުންވުން ކަމަށް އޭނާ ބުންޏެވެ. އޮލްމޯ ސްޕެއިންގެ އަމާޒަކީ މެޗުން ތިން ޕޮއިންޓު ހޯދުން ކަމަށެވެ.

ސެޕެއިން އަދި ޖަރުމަނު ބައްދަލު ކުރާ މެޗު ފަށާނީ އާދިއްތަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.