ޖަޕާނުން ވަނީ ވަރުގަދަ ޖަރުމަނު ބަލިކޮށްފައި، އަހަރަމެންނަށް މިއީ އުނދަގޫ މެއްޗެއް: ލުއިސް ފެނާންޑޯ

ފީފާ ވޯލްޑް ކަޕް ގްރޫޕް ސްޓޭޖުގެ ދެ ވަނަ މެޗުގައި ޖަޕާނާ ދެކޮޅަށް ނުކުންނައިރު، މެޗު ވަރަށް އުނދަގޫވާނެ ކަމަށް ކޮސްޓަރިކާގެ ކޯޗު ލުއިސް ފެނާންޑޯ ސުއަރޭޒް ބުނެފިއެވެ.

މެޗުގެ ކުރިން އޮތް ޕްރެސްގައި ވާހަކަ ދައްކަމުން ފެނާންޑޯ ބުނީ ޖަޕާންގެ ފުރަތަމަ މެޗުގައި އެ ޓީމުން ވަނީ ވަރުގަދަ ޖަރުމަނު ބަލިކޮށްފައި ކަމަށެވެ. އެހެންކަމުން އެއީ ކޮސްޓަރިކާ އަށް ޖަޕާން މެޗު އުނދަގޫވާނެ ކަމުގެ ހެތްކެއް ކަމަށް ވެސް އޭނާ ބުންޏެވެ. ފެނާންޑޯ ބުނީ ކޮސްޓަރިކާ އިން ޖަޕާނަށް ފުރިހަމަ އަށް އިހުތިރާމް ކުރާނެ ކަމަށާއި، ކޮސްޓަރިކާއިން ވިސްނަން ޖެހޭ ކަމަކީ އެ މީހުންގެ މަސައްކަތް އެންމެ ރަނގަޅު ހިސާބުން ނިންމާލުން ކަމަށެވެ.

އިތުރަށް ވާހަކަ ދައްކަމުން ފެނާންޑޯ ބުނީ ކޮސްޓަރިކާ އަލުން އުފަންވާން ޖެހޭ ވާހަކަ ދައްކަން ނުޖެހޭނެ ކަމަށެވެ. އޭނާ ބުނީ އަދިވެސް ކޮސްޓަރިކާ އޮތީ ދިރި ކަމަށާއި، އަދިވެސް ޓީމަށް ފުރުސަތު އޮތް ކަމަށެވެ. އޭނާ ބުނީ މިސާލެއްގެ ގޮތުގައި ބަލާނަމަ މީގެ 10 އަހަރު ކުރިން ހޮންޑިއުރަސް ވަނީ 8-1 އިން ކެނެޑާ ބަލިކޮށްފައި ކަމަށެވެ. ނަމަވެސް މިހާރު ކެނެޑާ އަކީ ކޮންކާކަފްގެ އެންމެ މޮޅު އެއް ޓީމުކަމަށް އޭނާ ބުންޏެވެ.

ފެނާންޑޯ ބުނީ ލިބޭ ބައްޔަށްފަހު، ގޮތް ދޫނުކޮށް ކުރިއަށް ދާން ޖެހޭނެ ކަމަށެވެ. އެ މަގުން މަސައްކަތް ނުކުރެވޭ ނަމަ، އެއީ މާބޮޑު ބައްޔެއް ކަމަށް ވެސް އޭނާ ބުންޏެވެ. އޭނާ ބުނީ މެޗަކީ ކިހާ މުހިންމު މެޗެއްކަން ކުޅުންތެރިންނަށް ވަރަށް ރަނގަޅަށް އެނގޭނެ ކަމަށެވެ. ނިންމާލަމުން ފެނާންޑޯ ބުނީ ފަހަތް ބެލުމެއް ނެތި ކުރިއަށް ދިޔުމަކީ ކާމިޔާބަށް ވާސިލްވެވޭނެ މަގެއް ކަމަށެވެ.