ޅ. އަތޮޅަށް އާރުޓީއެލް ފެރީން ހިލޭ ދަތުރުކުރާ މުއްދަތު އިތުރުކޮށްފި
26 ނޮވެމްބަރު 2022 | ހޮނިހިރު 18:11އެމްޓީސީސީން ކުރިން ބުނީ ޅ. އަތޮޅުގައި އަގުނަގައިގެން ދަތުރުތައް ފެށުމަށް ހަމަޖެހިފައިވަނީ 28 ނޮވެމްބަރުގައި ކަމަށް
ޅ އަތޮޅުގައި އާރުޓީއެލް ފެރީ ދަތުރުތައް ފެށުން
ދިވެހިރާއްޖޭގެ ރަށްތައް ހައި ސްޕީޑް ފެރީ ވިއުގަ އަކުން ގުޅާލުމަށް ފަރުމާކޮށްފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ދެވަނަ ފިޔަވަހީގެ ދަށުން، ޒޯން 2 ގައި ހިމެނޭ ޅ. އަތޮޅުގައި ރާއްޖެ ޓްރާންސްޕޯޓް ލިންކް ނުވަތަ އާރުޓީއެލް ފެރީ ޚިދުމަތަށް އަހުލުވެރިކުރުމުގެ ދަތުރުތަކުގެ މުއްދަތު އިތުރުކޮށްފިއެވެ.
އަހުލުވެރިކުރުވުމުގެ ދަތުރުތައް ނޮވެމްބަރު 21 އިން 27 އަށް ކުރާގޮތަށް ފުރަތަމަ އޮތްއިރު މި މުއްދަތުގައި އާރް.ޓީ.އެލް ފެރީގެ ދަތުރުތައް ކަސްޓަމަރުންނަށް ކޮށްދޭން ހަމަޖެހިފައިވަނީ މުޅިން ހިލެއެވެ. މިމުއްދަތު އިތުރުކޮށްފައިވާކަމަށް ޕްލޭނިންގ މިނިސްޓްރީން ވަނީ ބުނެފައެވެ. އެއީ ކިހާ މުއްދަތެއްކަމެއް މިނިސްޓްރީން ހާމައެއްނުކުރެއެވެ. އަދި އިތުރުކުރާ މުއްދަތުގައިވެސް އަގެއް ނުނަގާނެއެވެ.
އެމްޓީސީސީން ކުރިން ބުނީ ޅ. އަތޮޅުގައި އަގުނަގައިގެން ދަތުރުތައް ފެށުމަށް ހަމަޖެހިފައިވަނީ 28 ނޮވެމްބަރުގައި ކަމަށެވެ.
ރަސްމީކޮށް އަގުނަގައިގެން ޙިދުމަތް ދޭން ފެށުނުކަމުގައިވީނަމަވެސް، ތިން އަހަރުން ދަށުގެ ކުޑަކުދިންނަށާއި، ނޭޝަނަލް ސޯޝަލް ޕްރޮޓެކްޝަން އޭޖެންސީ ނުވަތަ އެންސްޕާ ގައި ރަޖިސްޓްރީވެފައިވާ ޙާއްޞަ އެހީއަށް ބޭނުންވާ ފަރާތްތަކަށް ހިލޭ ދަތުރުކުރެވޭނެއެވެ. ޒޯން 2 ގެ ޅ.އަތޮޅުގެ އާރް.ޓީ.އެލް ފެރީ ޚިދުމަތް ހަފުތާ އަކު ހަތް ދުވަހު، 2 އާރް.ޓީ.އެލް ސްޕީޑް ފެރީ މެދުވެރިކޮށް 3 ރޫޓަކުން ލިބިގެންދާނެއެވެ.
އެމްޓީސީސީ އިން މިހާތަނަށް އާރުޓީއެލްގެ ޚިދުމަތް ފަށާފައިވަނީ ޒޯން އެކެއްގައި ހިމެނޭ ހއ، ހދ، ގެ އިތުރުން ށ، އަތޮޅުގައެވެ.
