ސިޔާސީ ދާއިރާގައި މަސައްކަތްކުރާ އަންހެނުންނަށް ސޯޝަލް މީޑިއާގައި ފުރައްސާރަކުރުން ދަނީ އިތުރުވަމުން: ރޮޒައިނާ
ގާނޫނާއި ގަވާއިދުތައް ހެދުމުގައި އަންހެނުންގެ ޚިޔާލު އިތުރުކުރަންޖެހޭ
މެމްބަރު ރޮޒައިނާ އާދަމް
ސޯޝަލް މީޑިއާގެ ވަސީލަތްތަކުގައި އަންހެނުންނަށް ފުރައްސާރަކުރުން އިތުރުވަމުން އަންނަ ކަމަށް، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ މިފަދައިން ވިދާޅުވީ، ހުކުރު ދުވަހު ބައިނަލްއަގުވާމީގޮތުން ފާހަގަކުރި، އަންހެނުންނަށް ކުރާ އަނިޔާއާ ދެކޮޅަށް މަސައްކަތް ކުރުމުގެ ދުވަހާ ގުޅިގެން، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އަންހެނުންގެ ރޫހުގެ ރައީސްގެ ހައިސިއްޔަތުން ނެރުއްވި ބަޔާނުގައެވެ. އެ ބަޔާނުގައި ރޮޒައިނާ ވިދާޅުވީ، އަންހެނުންނަށް ކުރާ ގެވެށި އަނިޔާގެ އިތުރުން، ފަހަކަށް އައިސް ސޯޝަލް މީޑިއާ މެދުވެރިކޮށް އަންހެނުން ނަފްސާނީގޮތުން ބަލިކަށި ކުރުވަން ފުރައްސާރަކުރާ ކަމަށެވެ. އަދި ޚާއްސަކޮށް ސިޔާސީ ދާއިރާގައި މަސައްކަތްކުރާ އަންހެނުންނަށް މިފަދަ ކަންކަމާ ދިމާވާކަން އޭނާ ފާހަގަކުރެއްވިއެވެ.
ރޮޒައިނާ ވިދާޅުވީ، ގާނޫނާއި ގަވާއިދުތައް ހެދުމުގައި އަންހެނުންގެ ޚިޔާލު އިތުރުކުރަން ޖެހޭ ކަމަށާއި، ބަދަލު ގެނެވޭނީ އޭރުން ކަމަށެވެ. އަދި ސިޔާސީ ޕާޓީއަކީ މަޖިލީހާއި ސަރުކާރުގެ މަގާމުތަކަށް އަންހެނުން ގެނައުމަށް އޮތް މަގުކަމަށާއި، އަންހެނުން ބާރުވެރިކޮށް، އަންހެނުންގެ ހައްގުތަކަށް ވަކާލާތުކުރުމަށް ހަރުދަނާ އަންހެން ލީޑަރުން ސިޔާސީ ހަރަކާތްތަކަށް ނެރުން މުހިންމު ކަމަށްވެސް އޭނާގެ ބަޔާނުގައި ވިދާޅުވިއެވެ.
ސިޔާސީ ދާއިރާއަށް އަންހެނުން ނެރުމަށް ކުރާ މަސައްކަތަށް އޮތް ހުރަހަކީ ސޯޝަލް މީޑިއާގައި އަންހެނުންނަށް ކުރާ ފުރައްސާރަކަން ފާހަގަކުރައްވައި ރޮޒައިނާ ވިދާޅުވީ، ބިރުދެއްކުމާއި ޖިންސީ ފުރައްސާރަ ކުރަމުންދާ ކަމަށެވެ. އެގޮތުން، އަންހެނުންގެ ހަށިގަނޑު ހުންނަގޮތާ ގުޅިގެން އަނގަބަހުންނާއި ކުރަހައިގެން ނުވަތަ ފޮޓޯތައް ހަދައިގެން ފާޑުކިޔާކަމަށް ވިދާޅުވިއެވެ. މިކަމުގައި ފިރިހެނުންނާ އެއްގޮތަށް އަންހެނުންވެސް ބައިވެރިވާކަން އޭނާ ފާހަގަކުރެއްވިއެވެ.
ރޮޒައިނާ ވަނީ، ހުރިހާ ފަރާތްތަކުންވެސް ސިޔާސީގޮތުން ޚިޔާލުތަފާތުވިނަމަވެސް އެކަކު އަނެކަކަށް ދޭން ޖެހޭ އިހުތިރާމު އަބަދުވެސް ދިނުމަށް އެދިވަޑައިގެންފައެވެ. އަދި ރީތި ގޮތުގައި ފާޑުކިޔުމާ، ފުރައްސާރަ ކުރުމާއި އަނިޔާ ކުރުމަށް ގޮވާލުމުގައި ތަފާތުތައް ހުންނާނެ ކަމަށާއި، އަންހެނުންނާއި ފިރިހެނުން ގުޅިގެން އަންހެނުންނަށް ކުރާ އަނިޔާއާ ދެކޮޅަށް މަސައްކަތް ކުރުމަށްވެސް އޭނާ ގޮވާލެއްވިއެވެ.
އެމްޑީޕީގެ އަންހެނުންނަށް ޚާއްސަކޮށް ދެއްވި މެސެޖުގައި ރޮޒައިނާ ވިދާޅުވީ، އަންހެނަކާމެދު އިހާނެތިކޮށް ކަމެއް ވާނަމަ ޕާޓީގެ ހުރިހާ އަންހެނުން އެކުގައި އެކަމާ ދެކޮޅަށް ތެދުވެގެން ނޫނީ އެކަން ނުހުއްޓުވޭނެ ކަމަށެވެ. އަދި އެކަކު އަނެކަކަށް އެހީވެ، އަަންހެނުން ބާރުވެރިކޮށް ސިޔާސީ ދާއިރާގައި ކުރިއަށް ނެރުމަށް މަސައްކަތް ކުރުމަށްވެސް ގޮވާލެއްވިއެވެ.
ސޯޝަލް މީޑިއާގައި އަންހެނުންނަށް ކުރާ ފުރައްސާރަ އިތުރުވެފައިވާ ކަމަށް ރޮޒައިނާ ވިދާޅުވެފައިވާއިރު، ދާދިފަހުން އޭނާއަށް އަމާޒުކޮށް ސޯޝަލް މީޑިއާގައި ބައެއް ފަރާތްތަކުން ވަނީ ފުރައްސާރަކޮށް އިންޒާރުވެސް ދީފައެވެ. މީގެ ތެރޭގައި ސިޔާސީ ދާއިރާގައި އިސްކޮށް ހަރަކާތްތެެރިވާ ބައެއް ފަރާތްތައްވެސް ހިމެނެއެވެ. މި މައްސަލަ ތަހުގީގުކުރުމަށް އެމްޑީޕީންވެސް ވަނީ ގޮވާލާފައެވެ.
