ބަލިވުމުން ތެދު ކުރިއަށްދާނެ ފެންވަރު އާޖެންޓީނާ ޓީމުގައި އެބައޮތް ކަމަށް, އެ ޓީމުގެ ކޯޗު ލިއޮނެލް ސްކަލޯނީ ބުނެފިއެވެ.

އޭނާ މިހެން ބުނީ ފީފާ ވޯލްޑް ކަޕް ގްރޫޕް ސީގައި މެކްސިކޯއާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. މުބާރާތުގެ ފުރަތަމަ މެޗުގައި ސައޫދީ އަރަބިއްޔާ އަތުން ބަލިވުމުން އާޖެންޓީނާއަަށް ވަނީ ބޮޑު ޕްރެޝަރަަކާ ކުރިމަތިލާން ޖެހިފައެވެ. މުބާރާތުގެ ގްރޫޕް ސްޓޭޖު ފަހަނައަޅައި ގަދަ 16ށް ދާން ބޭނުންނަމަ އެ ޓީމަށް ޖެހޭނީ މެކްސިކޯ ބަލިކުރާށެވެ.

އެ މެޗުގެ ކުރިން ސްކަލޯނީ ބުނީ، ޓީމު ބަލިވުމުން ދެން ކުރަން ޖެހޭނެ ހަމައެކަނި ކަމަކީ ތެދުގެ ކުރިއަށްދިއުން ކަމަށެވެ. އޭނާ ބުނީ އާޖެންޓީނާ ޓީމުގައި އެ ފެންވަރު އެބަހުރި ކަމަށާއި، އެކަމާ އެއްވެސް ސުވާލެއްވެސް ނެތް ކަމަށެވެ. މެކްސިކޯއާ ދެކޮޅަށް ކުޅޭ މެޗަކީ މުޅިން ތަފާތު މެޗެއް ކަމަށާއި، އާޖެންޓީނާއިން އެކަމާ ވަރަށް ފުންކޮށް ވިސްނާ ކަމަށެވެ. ސްކަލޯނީ ބުނީ އެންމެ ފަހުން ކުޅުނު މެޗުގައިވެސް ކަންތައް ދިމާވެފައި އޮތްގޮތުން އާޖެންޓީނާއިން އެމީހުންގެ ކުޅުނު ވައްޓަފާޅި ބަދަލުނުކުރާނެ ކަމަށެވެ.

މީގެ އިތުރުން ސްކަލޯނީ ބުނީ، މިހާރު އޮތް އާޖެންޓީނާ ޓީމު އެންމެ ފަހުވަގުތާ ޖެހެންދެންވެސް މެޗުން މޮޅުވުމަށް ކުރެވެން ހުރި ހުރިހާ މަސައްކަތެއް ކުރާނެކަމަށެވެ. ސްކަލޯނީ ބުނީ ކުރިން ޕްރެސްގައިވެސް އޭނާ ބުނިގޮތަށް އާޖެންޓީނާ އޮތީ ރަނގަޅަށްކަން ދައްކައިދޭން ޖެހޭނެއެވެ.

މި ޕްރެސްގައި ވާހަކަދައްކަމުން އާޖެންޓީނާގެ ފޯވާޑް ލައުޓާރޯ މާޓިނޭޒް ބުނީ، އާޖެންޓީނާއަކީ ވަރުގަދަ ޓީމެއް ކަމަށާއި، އެއްބައިވަންތަ ކުޅުންތެރިން ތިބި ޓީމެއް ކަމަށެވެ. ކުޅުންތެރިންނަށް ބޭނުންވަނީ ކޮން ކަމެއްކަން އެނގޭކަމަށާއި، އެންމެން މަސައްކަތްކުރަނީ އެކަން ހާސިލްކުރުމަށް ކަމަށެވެ. އޭނާ ބުނީ ވޯލްޑް ކަޕްގެ ފެށުން މޮޅަކުން ފެށުމަށް ވަރަށް އުންމީދުތައް ކުރިކަމަށާއި، ނަމަވެސް ފުރަތަމަ މެޗުން ބަލިވީ އަމިއްލައަށް ހެދުނު ގޯސްތަކެއްގެ ސަބަބުން ކަމަށެވެ. ނަމަވެސް އެއީ މާޒީ ކަމަށާއި، މިހާރު ވިސްނުން ހުރީ ކުރިއަށް އޮތް މެކްސިކޯ މެޗަށް ކަމަށެވެ.

މުބާރާތުގައި އާޖެންޓީނާއާއި މެކްސިކޯ ބައްދަލުކުރާ މެޗު ފަށާނީ އާދިއްތަވިލޭރޭ ރޭ ރާއްޖެ ގަޑިން 12 ޖަހާއިރުއެވެ.