ފީފާ ވޯލްޑް ކަޕް ގްރޫޕް ޑީގައި އެންމެ ފަހުގެ ޗެމްޕިއަން ފްރާންސާ ދެކޮޅަށް ނުކުންނަން ޑެންމާކު އޮތީ އެންމެ ފުރިހަމައަށް ތައްޔާރުވެގެން ކަމަށް، އެ ޓީމުގެ ކޯޗު ކެސްޕާ ހުލްމަޑް ބުނެފިއެވެ.

މުބާރާތުގެ ދެ ވަނަ މެޗަށް ކުރިމަތިލާއިރު ޑެންމާކު ވަނީ ކުޅުނު ފުރަތަމަ މެޗުގައި ޓިއުނީޝިޔާއާ އެއްވަރުވެފައެވެ. އެއާ ޚިލާފަށް ފްރާންސް ވަނީ އޮސްޓްރޭލިޔާ ބަލިކޮށް މޮޅަކުން މުބާރާތް ފަށާފައެވެ. ދެ ވަނަ މެޗުގައި ޑެންމާކާ ދެކޮޅަށް ނުކުންނައިރު ފްރާންސަށް އޮތް އެންމެ ބޮޑު ބިރަކީ، އެންމެ ފަހުން ޑެންމާކާ ދެކޮޅަށް ކުޅުނު ދެ މެޗުންވެސް އެ ޓީމު ބަލިވެފައިވުމެވެ. ފްރާންސްގެ ކޯޗު ޑިޑިއޭ ޑެޝޯމްޕްސްވެސް ވަނީ ވަރަށް ބޮޑަށް އެކަން ފާހަގަކޮށްފައެވެ.

ފްރާންސް މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ހުލްމަޑް ބުނީ، މުބާރާތުގެ ފެށުން ޑެންމާކަށް ދިޔަ ގޮތުންވެސް، ފްރާންސް މެޗަކީ ވަރަށް މުހިންމު މެޗަކަށް ވާނެ ކަމަށެވެ. އޭނާ ބުނީ އިދިކޮޅު ފްރާންސް ޓީމަކީ ވަރަށް މޮޅު ބައެއް ކަމަށާއި، އެމީހުންނަނީ ދުނިޔޭގެ އެންމެ މަތީ ލެވެލްގައި ފާހަގަކޮށްލެވޭ ވަރުގެ ޓީމެއް ކަމަށެވެ. އަދި އެންމެ ފަހުގެ ޗެމްޕިއަނުންގެ ހައިސިއްޔަތުންވެސް ފްރާންސް އޮތީ ވަރަށް ވަރުގަދަކޮށް ކަމަށެވެ. މީގެ އިތުރުން ހުލްމަޑް ބުނީ، ފްރާންސް ޓީމުން ފުރަތަމަ މެޗުގައި ނެރުނު ނަތީޖާއިންވެސް އެމީހުންނަކީ ވަރުގަދަ ބައެއްކަން އެނގޭ ކަމަށެވެ.

މި ޕްރެސްގައި ވާހަކަދައްކަމުން، ޑެންމާކުގެ އުންމީދުތަކާ ގުޅިފައިވާ މިޑްފީލްޑަރު ކްރިސްޓިއަން އެރިކްސަން ބުނީ، މެޗުގެ ނަތީޖާ ބިނާވެގެންދާނީ ދަނޑުމަތީގައި ކަންތައް ވާ ގޮތުގެ މައްޗަށް ކަމަށެވެ. އެރިކްސަން ބުނީ ކުރީފަހަރަށްވުރެ މިފަހަރުގެ މެޗު ހުރިހާ ގޮތަކުންވެސް ތަފާތުވާނެ ކަމަށެވެ. އޭނާ ބުނީ މިހާރު މެޗުތަކުގައި އިތުރު ވަގުތުގެ ގޮތުގައި ގިނަ މިނެޓު ދައްކާކަމަށާއި، އެއީ ކުރިން ނޭނގޭ ކަމެއް ކަމަށެވެ. އޭނާވެސް ބުނީ ކޯޗު ބުނި ގޮތަށް ޓީމު އޮތީ މެޗަށް ތައްޔާރަށް ކަމަށާއި، ޑެންމާކަށް ނަތީޖާ ނެރެވޭނެ ކަމަށެވެ.

ޑެންމާކާއި، އެންމެ ފަހުގެ ޗެމްޕިއަން ފްރާންސް ބައްދަލުކުރާ މެޗު ފަށާނީ ހޮނިހިރު ދުވަހުގެ ރޭ ރާއްޖެ ގަޑިން 21:00ގައެވެ.