ވޯލްޑްކަޕް ފުޓްބޯޅަ މުބާރާތުގައި ސެނެގާލްއާ ދެކޮޅަށް މިއަދު ގަތަރު ނުކުންނަ މެޗަކީ މޮޅުވާން މަޖުބޫރު މެޗެކެވެ. އަމިއްލަ ގައުމުގައި ބާއްވާ މުބާރާތުގެ ދެ ވަނަ ބުރަށް ދެވެން އޮތީ މި މެޗުން މޮޅުވެގެންނެވެ. ދެ ވަނަ ބުރަށް ދިއުމުގެ އަމިއްލަ ބާރު ބޭއްވުމަށް ގަތަރުން ނުކުންނައިރު ގޯލު ބަލަހައްޓާނީ މިޝާލް ބަރްޝާމްއެވެ. އޭނާ އަކީ އޮލިމްޕިކްސްގެ އުސްފުންމުމުން ގޯލްޑް މެޑަލް ހާސިލުކުރި ގަތަރުގެ މުތާޒް އީސާ ބަރްޝިމްގެ ކޮއްކޮއެވެ. އިކުއެޑޯ މެޗުގައި ގޯލް ބެލެހެއްޓި ސާދް އަލް ޝީބަށް މި މެޗުގައި ފުރުސަތު ނުދޭން ކޯޗު ނިންމީ އެ މެޗުގައި އޭނާގެ ފުށުން ރަނގަޅު ކުޅުމެއް ނުފެނުމުންނެވެ.

އެ މެޗުން ބަލިވުމުން ގަތަރު ވެފައިވަނީ ވޯލްޑްކަޕް ފުޓްބޯޅަ މުބާރާތް އަމިއްލަ ގައުމުގައި ބާއްވައިގެން ފުރަތަމަ މެޗުން ބަލިވި ފުރަތަމަ ގައުމަށެވެ. އަނެއްކޮޅުން އެ މެޗުގައި ގޯލާ އަމާޒުކޮށް އެންމެ ބޯޅައެއް ވެސް ފޮނުވާލެވިފައިނުވުމަކީ ގަތަރަށް ކުރިމަތިވި ބޮޑު ލަދުވެތިކަމެކެވެ. މިކަމުން އަރައިގަތުމަށް މިއަދުގެ މެޗަށް ނުކުންނައިރު ތިން ޕޮއިންޓް ނުލިބިއްނަމަ ގަތަރު ވެގެންދާނީ މުބާރާތް ބާއްވައިގެ އެންމެ އަވަހަށް ވޯލްޑްކަޕުން ފޭލްވާ ގައުމަށެވެ. މި ގޯސް ރެކޯޑް ލިބުނަ ނުދީވޭތޯ ބަލަން ގަތަރުގެ ކުޅުންތެރިންނާއި ކޯޗު ވަނީ އަތުކުރި އޮޅާލާފައެވެ.

ހަގީގަތުގައި މުބާރާތް ހުޅުވުމުގެ ރަސްމިއްޔާތާއި މުބާރާތުގެ އިންތިޒާމްތައް ކިތަންމެ ފުރިހަމަ ނަމަވެސް ގަތަރުގެ ގައުމީ ޓީމު މުބާރާތުގައި ނެރޭ ނަތީޖާ އަކީ ވަރަށް މުހިންމު އެއްޗެކެވެ. ގަތަރަށް ވޯލްޑްކަޕުގައި ރަނގަޅު ނަތީޖާއެއް ނުނެރެވިއްޖެނަމަ އެއީ މުޅި އޭޝިޔާ އަށް ވެސް ލިބޭނެ ލަދުވެތިކަމެކެވެ. އަދި މިއީ ގަތަރަށް އަމާޒުވަމުންދާ ފާޑުކިއުންތަކުގެ ސަބަބުން ފީފާ ވެސް އެދޭނެ ކަމެއްނޫނެވެ.

ގަތަރުގެ ކޯޗު ފެލިކްސް ސަންޗޭޒަށް މިހާރު ޖެހިފައިވަނީ ފޯވަޑް އަލްމުއީޒް އާއި އަކްރަމް އަފީފް އަދި ކެޕްޓަން ހަސަން އަލް ހައިދޯސްގެ ބޭނުން އެންމެ އެކަށީގެންވާ ގޮތަކަށް ހިފޭނެ މޮޅު ގޮތެއް ރާވާށެވެ. މިކަމަށް ފޯމޭޝަން ބަދަލު ކުރަން ޖެހިއްޖެނަމަ އެކަން ވެސް ކުރަން އޭނާ ހުރީ ތައްޔާރަށެވެ. ބޮޑަށް ލަފާކުރެވޭ ގޮތުގައި ވާތުބެކް އަބްދުލް ކަރީމް ހަސަން ޑިފެންސިވްކޮށް ކުޅުވައި ގަތަރުން މިރޭގެ މެޗަށް ޓީމު ސެޓްކުރާނީ މެދުތެރެ އަށް ހަތަރު ކުޅުންތެރިން ލައިގެންނެވެ. އެއީ 3-4-3 ފޯމޭޝަނަށެވެ.