ވޯލްޑްކަޕް ފުޓްބޯޅަ މުބާރާތުގައި މިރޭ ޕޯޗުގަލްއާ ދެކޮޅަށް ގާނާ ނުކުންނަނީ މުބާރާތުގައި ވާދަކުރާ ގައުމުތަކުގެ ތެރެއިން ފީފާ ރޭންކިންގެ ފުލުގައި އޮތީ އެމީހުން ކަމުގައިވާތީ, އެކަމަށް ތައްޔާރުވެގެންނެވެ. ޕޯޗުގަލްގައި ދުނިޔޭގެ އެންމެ މޮޅު އެއް ކުޅުންތެރިޔާ ކްރިސްޓިއާނޯ ރޮނާލްޑޯވެސް ހުރުމުން, އެމީހުންނަށް ދޭންވާ އިހްތިރާމް ފުރިހަމައަށް ދީގެންނެވެ.

ނަމަވެސް ރޮނާލްޑޯ މިވަގުތު ހުރީ ވަރަށް ބޮޑު ނުތަނަވަސްކަމެއްގެ ތެރޭގައެވެ. ކުލަބާ މައްސަލަޖެހި ރޮނާލްޑޯ ކުޅެމުން އައި މެންޗެސްޓަރ ޔުނައިޓެޑުންވެސް ވަނީ އޭނާ ދޫކޮށްލާފައެވެ. އަދި ނޫސްވެރިންނާ ބޭއަދަބީކޮށް މުއާމަލާތުކުރުމުގެ ސަބަބުން އޭނާއަށް ވަނީ ކުލަބު ލެވެލްގައި ދެ މެޗެއްގެ ސަސްޕެންޝަނެއްވެސް ކުރިމަތިވެފައެވެ.

ނަމަވެސް ގާނާގެ ކޯޗު އޮޓޯ އޮއްޑޯ ބުނީ، ރޮނާލްޑޯއަށް ދިމާވެފައިވާ މައްސަލަތަކާމެދު އޭނާގެ ޓީމުން ނުވިސްނާނެކަމަށެވެ. އަދި އެކަމާ ފަރުވާލެއްވެސް ނެތްކަމަށެވެ. ސަބަބަކީ ކަރުދާހުގައިވާގޮތުން ޕޯޗުގަލްއަކީ ހުރިހާ ގޮތަކުންވެސް ގާނާ ޓީމަށްވުރެ މޮޅުވެފައި މާތަޖުރިބާކާރު ޓީމަކަށްވާތީ ކަމަށެވެ. މިހެންވެ ގާނާގެ ފޯކަސް ހުރީ މި މެޗުން ތިން ޕޮއިންޓް ހޯދުމަށެވެ. މިކަމަށް ކުޅުންތެރިން ގަދައަޅައި މަސައްކަތްކުރަން ޖެހިފައިވާ އެއް ސަބަބަކީ، އެންމެ ފަހުން ވޯލްޑްކަޕުގައި ކުޅުނު ތިން ފަހަރުވެސް ފުރަތަމަ މެޗުން މޮޅުވެފައި ނުވާތީއެވެ. މިއާ ޚިލާފަށް ޕޯޗުގަލްއަކީ އެމީހުން އެންމެ ފަހުން ކުޅުނު ތިން ވޯލްޑްކަޕުގައިވެސް ފުރަތަމަ މެޗު ކާމިޔާބުކޮށްފައިވާ ޓީމެކެވެ. ގާނާގެ ކެޕްޓަން އަންދްރޭ އަޔޭ މިރޭގެ މެޗަށް ނުކުމެއްޖެނަމަ އޭނާ ވެގެންދާނީ ގާނާގެ ގައުމީ ޓީމަށް ވޯލްޑްކަޕުގައި އެންމެ ގިނަ މެޗު ކުޅެދިން ކުޅުންތެރިޔާއަށެވެ. މިހާތަނަށް އޭނާ ކުޅެފައިވަނީ ހަ މެޗެވެ.

ވޯލްޑްކަޕަށް ތައްޔާރުވާން ގާނާއިން އާއްމުގޮތެއްގައި ދެ ގޮތަކަށް ކުޅުނެވެ. ފުރަތަމަ ގޮތަކީ 4-2-3-1 ފޯމޭޝަންއެވެ. ދެ ވަނަ ގޮތަކީ 3-4-3 ފޯމޭޝަންއެވެ. އެކަމަކު މީގެ ތެރެއިން އެންމެ ޓީމަށް އެންމެ ފައިދާހުރީ ކޮން ފޯމޭޝަނަކަށް ކުޅެގެން ގާނާ ޓީމަށް އަދި ދެނެގަނެވިފައެއްނުވެއެވެ. ގާނާގެ އެންމެ ޚާއްސަ ކަމަކީ މެދުތެރެ ވަރުގަދަވުމެވެ. ނަމަވެސް މައްސަލައަކީ ޓީމުގެ ކުރީގައި ތިބޭ ކުޅުންތެރިން ގޯލާ ބީރައްޓެހިވުމެވެ. މީގެ އިތުރުން ތޯމަސް ޕާޓޭއާއި އެހެން ކުޅުންތެރިންގެ އެންމެ މޮޅަށް ކުޅޭ ޕޮޒިޝަނާމެދުވެސް ޚިޔާލު ތަފާތުވުންތަކެއް އެބަހުއްޓެވެ. ކޯޗު ބުނީ މިފަދަ ކަންކަން މުޅިން ހައްލު ނުވިނަމަވެސް، ވޯލްޑްކަޕުގައި ކުޅުންތެރިންގެ ވިސްނުމާއި ފިކުރު ތަފާތުވާނެކަމަށާއި އެއްވެސް ޓީމަކީ ހުރިހާ މައްސަލަތަކެއް ހައްލުވެގެން ވޯލްޑްކަޕަށް އައިސްފައިވާ ޓީމަކަށް ނުވާނެކަމަށެވެ.

މި ދެ ގައުމު މިހާތަނަށް ވޯލްޑްކަޕުގައި ވާދަކުރީ އެންމެ ފަހަރަކުއެވެ. 2014 ވަނަ އަހަރު ކުޅުނު އެ މެޗުން ޕޯޗުގަލް މޮޅުވީ 2-1ންނެވެ.