ސެނެގާލަށް ވުރެ އިކުއެޑޯ ޓީމަށް ސަމާލުވާން ޖެހޭނެ: ވެންހާލް

ސެނެގާލް ޓީމަށް ވުރެ އިކުއެޑޯ ޓީމަށް ސަމާލުވާން ޖެހޭނެ ކަމަށް ނެދަލޭންޑްސްގެ ކޯޗު ލުއިސް ވެންހާލް ބުނެެފިއެވެ.

ވެންހާލް މިހެން ބުނީ ފީފާ ވޯލްޑް ކަޕް ގްރޫޕް ސްޓޭޖުގެ ދެ ވަނަ މެޗުގައި އިކުއެޑޯއާ ދެކޮޅަށް ނުކުތުމުގެ ކުރިން އޮތް ޕްރެސްގައި ވާހަކަ ދައްކަމުންނެވެ.

އޭނާ ބުނީ އިދިކޮޅު ޓީމެއްގެ ގޮތުގައި އިކުއެޑޯ ފެންނަނީ ސެނެގާލަށް ވުރެ ރޭވުންތެރިކަމާއި ވަރުގަދަކޮށް ކަމަށެވެ. އަދި އިކުއެޑޯގައި ތިބީ ހުރިހާ ގޮތަކުން ބަލާނަމަ ވަރުގަދަ ކުޅުންތެރިންތަކެއް ކަމަށާއި، އެއީ ސެނެގާލަށް ވުރެ އިކުއެޑޯ މެޗު އުނދަގޫވާނެ އެންމެ މުހިންމު އެއް ސަބަބު ކަމަށެވެ.

މީގެ އިތުރުން ވެންހާލް ބުނީ އޭނާ އެއްވެސް ވަރަަކަށް ސިޔާސީ ވާހަކަ ދައްކަން ބޭނުންނުވާ ކަމަށެވެ. އޭނާ ބުނީ ފީފާ ނުވަތަ އެހެން ވެސް އިދާރާއަކުން ވަކި ގޮތެއް ނިންމުމުން އެކަމަށް އިހުތިރާމު ކުރަން ޖެހޭނެ ކަމަށެވެ. ވަން ލަވް ކެޕްޓަން ބޭންޑުގެ މައްސަލައިގައި ވެންހާލް ބުނީ އެއީ އޭނާ ދައްކަން ބޭނުންވާ ވާހަކައެއް ނޫން ކަމަށާއި، ޤަތަރުގައި ތިބީ ފުޓުބޯޅަ ކުޅެން އައިސް ކަމަށެވެ.

މީގެ އިތުރުން މި ޕްރެސްގައި ވެންހާލް ވަނީ ސެނެގާލްގެ ނޫސްވެރިޔަކު ކުރި ސުވާލަށް އޭނާ އަށް އުފާވެރި ޖަވާބެއް ދީފައެވެ. ނޫސްވެރިޔާ ބުނީ އޭނާ އަކީ ނެދަލޭންޑްސްގެ ސަޕޯޓަރެއް ކަމަށެވެ. ވެންހާލް ބުނީ އޭނާ ވަރަށް އުފާވެއްޖެ ކަމަށާއި، ނޫސްވެރިޔާއާ އޭނާ ބައްދަލުކުރާނެ ކަމަށެވެ.

މުބާރަތުގައި ނެދަލޭންޑްސް އިން އިކުއެޑޯއާ ދެކޮޅަށް ނުކުންނާނީ ހުކުރު ދުވަހުގެ ރޭ 21:00 ގައެވެ.