އުރުގުއޭ އަކީ ވޯލްޑްކަޕް ފުޓްބޯޅަ މުބާރާތުގެ ފުރަތަމަ ޗެމްޕިއަން ޓީމެވެ. ނަމަވެސް މިޒަމާނުގެ ފުޓްބޯޅައިގައި އެމީހުންނަށް ހޯދުނު މާބޮޑު ކާމިޔާބީއެއް ނެތެވެ. މިހެންވެ އުރުގުއޭ އަށް ފާޑުކިއުންތައް އަމާޒުވެއެވެ. ހާއްސަކޮށް އެއް ސަރަހައްދެއްގައި ތިބެ ބްރެޒިލާ އާއި އާޖެންޓީނާ ހޯދަމުންދާ ކާމިޔާބީތަކުގެ ސަބަބުން އުރުގުއޭއާ މެދު ނުތަނަވަސްވާ މީހުން ގިނައެވެ.

މި ފަހަރުގެ ވޯލްޑް ކަޕަށް އުރުގުއޭ ކޮލިފައިވީ މާބޮޑު ދަތިކަމެއްނެތިއެވެ. އެކަމަކު ވޯލްޑް ކަޕުގައި ކޯޗު ޑިއެގޯ އަލޮންސޯ ޓީމު ރާވާނެ ގޮތަކާ މެދު އަދިވެސް ބަހުސް ކުރެވެއެވެ. އާއްމުކޮށް އޭނާ ކުޅުވަނީ 4-3-3 އަށެވެ. އޭނާ އަށް ދިމާވެފައިވާ އެންމެ ބޮޑު އެއް މައްސަލައަކީ ފުރަތަމަ އެގާރައިގައި ހިމަނާނީ އުމުރުގެ ގޮތުން ކިހާ ދޮށީ ކިތައް ކުޅުންތެރިންކަމެއް ނޭނގުމުގެ މައްސަލައެވެ. އާއްމުކޮށް ފަސޭހަ އަދި މޮޅުވާންޖެހޭ މެޗުތަކުގައި އަލޮންސޯ ދެ ފޯވަޑުން ބޭނުންކުރެއެވެ. އެއީ އެޑިސަން ކަވާނީ އާއި ލުއިސް ސުއަރޭޒްއެވެ. އެކަމަކު އުމުރުން ދުވަސްވީ މި ދެ ފޯވަޑުން އެކުއެކީގައި ބޭނުންކުރުމަކީ ޓީމަށް ފައިދާހުރި ކަމެއް ނޫން ކަމުގެ ބަހުސްތަކަށް ކޯޗު ޖަވާބުދޭކަށް ބޭނުމެއް ނޫނެވެ. މީގެ އިތުރުން އުމުރުން 36 އަހަރުގެ ކެޕްޓަން ޑިއެގޯ ގޮޑިން ލައްވައި ކުޅުވާނީ ކޮންތާކަށްކަމާމެދު ވެސް ވަނީ ސުވާލު އުފެދިފައެވެ. ތަޖުރިބާކާރު ކީޕަރު ފެނާންޑޯ މުސްލޭރާ އަށް އަނިޔާވެފައިވާތީވެ އޭނާގެ ބަދަލުގައި ގޯލަށް ކުޅޭނެ މީހަކާމެދު ވެސް ހިލާފުތަކެއް އެބަހުރިއެވެ.

މިހެންވެ އުރުގުއޭ ޓީމު ތައްޔާރު ކުރުމުގައި ކޯޗަށް ގިނަ ދަތިތަކެއް އެބަހުރިއެވެ. ހާއްސަކޮށް ސީނިއާ ކުޅުންތެރިންގެ އުމުރުގެ މައްސަލަ އަކީ ހައްލުކުރަން ޖެހިފައިވާ ބޮޑު މައްސަލައެކެވެ. ކަވާނީ އާއި ސުއަރޭޒަށް މިހާރު ހަނި ޖާގަތަކުން ދެމިގަނެ ކުރިންހާ ފަސޭހައިން ގޯލު ޖަހައި ނޫޅެވޭކަން ކޯޗު ގަބޫލުނުކުރި ނަމަވެސް އުރުގުއޭގެ ރައްޔިތުންނަށް މިކަން އެނގެއެވެ. އެންމެ ފަހުން ޓީމުގައި ވިދާނެ ކަމަށް ބެލެވުނު މިޑްފީލްޑަރު ރޮޑްރިގޯ ބެންޓެންކޫރަށް ވެސް އެކަށީގެންވާ ކުޅުމެއް އެންމެ ފަހުގެ މުބާރާތުގައި ވެސް ނުދެއްކުނެވެ. މިވަގުތު ގިނަ ބައެއްގެ ނަޒަރު ހުއްޓިފައިވާ ޒުވާން ކުޅުންތެރިއަކީ ލިވަޕޫލްގެ ފޯވަޑް ނޫނޭޒްއެވެ. އެކަމަކު އޭނާ އަކީ ރުޅި އަތުވެއްޖެނަމަ ކާޑާ ރައްޓެހި ކުޅުންތެރިއެކެވެ.