ސަރުކާރު ބަދަލުކުރަން މުޒާހަރާކުރަން ފުރުސަތެއް ނުދޭނަން: ރަނިލް
24 ނޮވެމްބަރު 2022 | ބުރާސްފަތި 02:18ރަނިލް ވިދާޅުވީ ގައުމަށް ކުރިމަތިވެފައިވާ އިގްތިޞާދީ ކާރިސާ ނިމުމަކަށް ގެނެސް އިގްތިޞާދު ހަމައަކަށް އެޅުމުން ނޫނީ ގާނޫނު ހަދާ މަޖިލީސް އުވާނުލައްވާނެކަމަށް
ލަންކާގެ ރައީސް ރަނިލް ވިކްރަމްސިންހަ
ސްރީލަންކާގެ ގާނޫނު ހަދާ މަޖިލިސް އުވާލާ އަވަސް އިންތިޚާބެއް ބޭއްވުމަށް ލަންކާގެ އިދިކޮޅުން ކުރާ ޑިމާންޑާ ލަންކާގެ ރައީސް ރަނިލް ވިކްރަމްސިންގހަ ދެކޮޅު ހައްދަވައިފިއެވެ.
މީގެއިތުރުން ރަނިލް ވަނީ ސަރުކާރު ވައްޓާލުމަށް ކުރިޔަށް އޮތްތަނުގައި މުޒާހަރާކުރުމުގެ ފުރުސަތު ނުދެއްވާނެކަމަށާއި އެފަދަ މުޒާހަރާތައް އަސްކަރިއްޔާ ބޭނުންކުރައްވައިގެން ރޫޅާލައްވާނެކަމަށް ވިދާޅުވެފައެވެ. އުމުރުފުޅުން 73 އަހަރުގެ ރަނިލް ލަންކާގެ ރައީސްކަމާ ހަވާލުވެވަޑައިގެންނެވީ މިއަހަރުގެ ޖުލައި މަހު އޭރު ލަންކާގައި ހުންނެވި ރައީސް ގޮތަބަޔާ ރާޖަޕަކްސަ ގައުމުން ފިއްލުވުމާއެކުއެވެ. 1948 ވަނަ އަހަރަށްފަހު ލަންކާއަށް ކުރިމަތިވި އެންމެ ވަރުގަދަ އިގްތިޞާދީ ކާރިސާގެ މެދުތެރެއިން ގައުމުގައި ބޮޑެތި ދިގުދެމިގެންދާ މުޒާހަރާތަކެއް ވަނީ ގޮތަބަޔާ އާ ދެކޮޅަށް ކޮށްފައެވެ. އެމުޒާހަރާތަކުގެ މެދުން ގޮތަބަޔާ ގައުމު ދޫކުރައްވާ ވަޑައިގެންނެވި އެންމެ އުނދަގޫ ވަގުތު ރަނިލް ވަނީ ވެރިކަމާއި ހަވާލުވެވަޑައިގަންނަވާފައެވެ.
ރަނިލް ވިދާޅުވީ ގައުމަށް ކުރިމަތިވެފައިވާ އިގްތިޞާދީ ކާރިސާ ނިމުމަކަށް ގެނެސް އިގްތިޞާދު ހަމައަކަށް އެޅުމުން ނޫނީ ގާނޫނު ހަދާ މަޖިލީސް އުވާނުލައްވާނެކަމަށެވެ.
ގާނޫނު ހަދާ މަޖިލީހުގައި ވާހަކަދައްކަވަމުން ރަނިލް ވިދާޅުވީ މުޒާހަރާކުރާ ފަރާތްތަކުން އެމަނިކުފާނަކީ ޑިކްޓޭޓަރެއްގެ ގޮތުގައި ލޭބަލް ކުރިޔަސް މަގުމަތީގައި މުޒާހަރާކުރުމަށް ފުލުހުންގެ ހުއްދަ ހޯދަންޖެހޭނެކަމަށެވެ. ސަރުކާރު ވައްޓާލުމަށް ބޮޑު މުޒާހަރާއެއް ރާވާފައިވާކަމަށާއި ނަމަވެސް އެކަން ކުރުމުގެ ފުރުސަތު ނުދެއްވާނެކަމަށް ރަނިލް ވިދާޅުވިއެވެ. އެފަދަ މުޒާހަރާއެއް ބާއްވާނަމަ އަސްކަރިއްޔާގެ ބޭނުންކުރައްވާނެކަމަށާއި އެމަރޖެންސީ ގާނޫނުގެ ބޭނުންކުރައްވައިގެން ވެސް މުޒާހަރާ ހުއްޓުވާނެކަމަށް ރަނިލް ވިދާޅުވިއެވެ.
ރަނިލް ވިދާޅުވީ މުޒާހަރާ ބޭއްވުމުގައި އިސްކޮށް ހަރަކާތްތެރިވަނީ ފްރޮންޓްލައިން ސޯޝަލިސްޓް ޕާޓީކަމަށެވެ.
ރާޖަޕަކްސަގެ ދައުރު ނިމެންދެން ރަނިލް އަށް ވެރިކަމުގައި ހުންނެވޭނެއެވެ. އެއީ 2024 ވަނަ އަހަރުގެ ނޮވެމްބަރު މަހާ ހަމައަށެވެ. ނަމަވެސް އިދިކޮޅު ޕާޓީތަކުން އަންނަނީ ވީއެންމެ އަވަހަކަށް ގާނޫނު ހަދާ މަޖިލީހުގެ އިންތިޚާބެއް ބޭއްވުމަށެވެ. އިދިކޮޅުން އެހެން ގޮވާލަމުންދަނީ ރަނިލްގެ ސަރުކާރަށް ދެފުށް ފެންނަ އިންތިޚާބެއް ނުބޭއްވޭނެކަމަށް ބުނެއެވެ. ދެން ރިޔާސީ އިންތިޚާބެއް އެންމެ އަވަހަށް ވެސް ލަންކާގައި އޮންނާނީ 2024 ވަނަ އަހަރުއެވެ.
