ރާއްޖޭގައި އަލަށް ޕްރީކާސްޓް ފެކްޓްރީއެއް ކ. ހިންމަފުށީގައި ހުޅުވައިފިއެވެ.

އީއެލްއެސްލިއޯގެ ފަރާތުން ޤާއިމުކުރި ފެކްޓްރީ ބުދަ ދުވަހު ރަސްމީކޮށް ހުޅުއްވައިދެއްވީ މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމެވެ.

ފެކްޓްރީ ހުޅުވުމުގެ ގޮތުން ހިންމަފުށީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެ ކުންފުނީގެ މެނޭޖިންގް ޑިރެކްޓަރު އަބްދުﷲ ސަވާދު ވިދާޅުވީ މި ފެކްޓްރީ މެދުވެރިކޮށް ތަފާތު ވައްތަރުގެ ގައުތައް ސަޕްލައިކޮށްދޭނެ ކަމަށެވެ. އަދި އީއެލްއެސްލިއޯ އަކީ ލަންކާއާއެކު ހަދާފައިވާ ޖޮއިންޓް ވެންޗަރ ކުންފުންޏެއް ކަމަށާއި މި ފެކްޓްރީގެ ސަބަބުން ކޮންސްޓްރަކްޝަން ދާއިރާއަށް ވެސް އިތުރު ލުއިފަސޭހަތަކެއް ލިބިގެންދާނެ ކަމަށެވެ.

ސަވާދު އިތުރަށް ވިދާޅުވީ ކުންފުނީގެ އަމާޒަކީ މި ފެކްޓްރީ މެދުވެރިކޮށް ރާއްޖޭގެ ކޮންސްޓްރަކްޝަން ސިނާއަތަށް މޮޑިއުލަރ ގެތައް ތައާރަފުކުރުން ކަމަށެވެ.

ރާއްޖެއެމްވީއަށް މައުލޫމާތު ދެއްވަމުން ކުންފުނީގެ ޑިރެކްޓަރ ޖަޔަރސްރީ އަނުރާ ވިތަނަގޭ ވިދާޅުވީ އެކުންފުނީގެ އަމާޒަކީ ރާއްޖޭގެ ކޮންސްޓްރަކްޝަން އިންޑަސްޓްރީއަށް ޒަމާނީ ވަސީލަތްތައް ތައާރަފުކޮށް، ކޮންސްޓްރަކްޝަން އިންޑަސްޓްރީ ކުރިއެރުވުން ކަމަށެވެ.

މި ފެކްޓްރީ މެދުވެރިކޮށް ތަފާތު ވައްތަރުގެ ސިމެންތި ގަލާއި ހެބިޓެކް ގައު އުފައްދާނެއެވެ. ކުންފުނީގެ އަމާޒަކީ ރާއްޖޭގެ މާކެޓަށް ހެބިޓެކް ގައުތައް ތައާރަފުކޮށް، މޮޑިއުލަރ ގެތައް ބިނާކުރުން ކަމަށްވާއިރު އޯޑަރު ދޭތާ ތިން މަސް ދުވަސް ތެރޭގައި ގެއެއް ރަވާލަދޭނެ ކަމަށް ވެސް ކުންފުނިން ބުންޏެވެ. އެގޮތުން ތިން ފަންގިފިލާއާ ހަމައަށް ގެތައް އިމާރާތްކޮށްދޭނެއެވެ.   

މޮޑިއުލަރ ގެތައް ހަދަނީ ހެބިޓެކް ގައުތަކުން، ޕްރިކާސްޓް ކުރުމަށްފަހު އޭގެން އެސެމްބެލްކޮށްގެންނެވެ.

މީގެއިތުރުން މި ފެކްޓްރީން ގެތަކަށް ބޭނުންވާ ތަފާތު ވައްތަރުގެ ސިމެންތި ގައު އުފެއްދުމާއި އެކި މަޝްރޫއުތަކުގައި ބޭނުންކުރާ ގައުތައް ވެސް އުފައްދާނެއެވެ. އެގޮތުން ޕާކުތަކާއި މަގުތަކަށް ބޭނުންވާ ގައުތައް ހިމެނެއެވެ.

މި ފެކްޓްރީގައި ގައުތައް ހެދުމަށް ދެ މެޝިނެއް ހުންނައިރު އެއް މެޝިނަކީ ސިމެންތި ގައު އުފައްދާ މެޝިނެކެވެ. އަނެއް މެޝިނަކީ ހެބިޓެކް ގައުތައް އުފެއްދުމަށް ޚާއްސަ މެޝިނެކެވެ.

އެ ކުންފުނިން ބުނީ އާންމު ގޮތެއް ދުވާލެއްގެ މައްޗަށް 12،000 ހާސް ގައު އުފެއްދުމުގެ ޤާބިލުކަން ފެކްޓްރީގައި އެބަހުރި ކަމަށެވެ.

މި ފެކްޓްރީގައި މިވަގުތު ޖުމްލަ 20 މީހުން މަސައްކަތް ކުރަމުންދާއިރު ރާއްޖޭގެ ޒުވާނުންނަށް ވެސް އެތަނުގައި މަސައްކަތް ކުރުމުގެ ފުރުސަތު އެބައޮތް ކަމަށް އެކުންފުނިން މައުލޫމާތު ދެއެވެ.