އެންމެ ބޮޑު އައިފޯނު ފެކްޓަރީގައި މުވައްޒަފުން މުޒާހަރާކުރަނީ

ޗައިނާގެ ޒެންގޒޫގައި ހުންނަ ދުނިޔޭގެ އެންމެ ބޮޑު އައިފޯނު ފެކްޓަރީގައި މަސައްކަތްކުރާ ގިނަ އަދަދެއްގެ މުވައްޒަފުން، ތަނުގެ ވެރިން ގެންގުޅޭ އުސޫލުތަކާމެދު ހިތްހަމަނުޖެހިގެން ހަޅުތާލުކޮށް އަދި މުޒާހަރާކުރަމުން ދާކަމަށް ޚަބަރު ލިބެއެވެ.

ބައެއްވީޑިއޯތަކުން ފެންނަގޮތުގައި އެތައްސަތޭކަ މުވައްޒަފުން ދަނީ ކެމްޕަސްތެރޭގައި ދެކޮޅަށް ހިނގައި، މުޒާހަރާ ކުރަމުންނެވެ. އެއާއެކު ހަޒްމަތު ސޫޓު ލައިގެން ފުލުހުން ނިކުމެ އެމީހުން ގައިގައި ތަޅާ ހަދާތަން ފެނެއެވެ.

ޗައިނާގައި އަނެއްކާވެސް އަންނަނީ ކޮވިޑް ފެތުރި، އަދި މީހުންވެސް މަރުވަމުންނެވެ. އެއާއެކު މިދިޔަ މަހުން ފެށިގެން އައިފޯން ކުންފުނި ފޮކްސްކޮންގެ ވެރިންވަނީ ފިޔަވަޅުތައް ހަރުކަށިކޮށްފައެވެ. މުވައްޒަފުން ކެމްޕަސް ތެރޭގައި ލޮކްޑައުންކޮށް ގެއަށް ނުދެވޭ ގޮތް ވަނީ ހަދާފައެވެ. އެއާއެކު ބައެއް މުވައްޒަފުން ވަނީ އަމުރުތަކާ ޚިލާފްވެ، އެތަނުން ނިކުމެގެން ގެއަށް ގޮސްފައެވެ.

ބުދަ ދުވަހުގެ ޚަބަރުތައް ބުނާގޮތުގައި ފެކްޓަރީ ވަށައިގެން ވަރަށް ގިނަ އަދެއްގެ ފުލުހުން ހަރަކާތްތެރިވަމުން އެބަ ގެންދެއެވެ.

މަސައްކަތްތެރިން ބުނާގޮތުގައި ވެރިން ވަނީ އެމީހުންނާއެކު ވެވުނު އެއްބަސްވުމާ ޚިލާފްވެފައެވެ. އަދި ލޮކްޑައުންކޮށް އެތެރޭގައި ހިފަހައްޓާއިރު ކާތަކެތިވެސް އެކަށީގެންނުވާކަމަށް، ހަޅުތާލު ކުރަމުންދާ މީހުން ބުނެއެވެ.

އަނެއްކޮޅުން އެއްބަޔަކު ކެނޑިގެން ދިއުމުން ނުވަތަ ކަނޑާލުމުން އަލަށް ވެއްދި ފަރާތްތަކުން ބުނަނީ، ކޮވިޑަށް ޕޮޒިޓިވް މުވައްޒަފުންނާ އެމީހުންނާ މައްސުނިކުރާކަމުގައެވެ.

ފޮކްސްކޮންގެ ވެރިން ކުރިން ވަނީ، ރިޓަޔަރކޮށްފައިވާ މަސައްކަތްތެރިން އައިފޯން ފެކްޓަރީގައި މަސައްކަތްކުރުމަށް ނުކުތުމަށްވެސް ގޮވާލާފައެވެ.