ވޯލްޑް ކަޕް ފުޓްބޯޅަ މުބާރާތުގައި ބުދަ ދުވަހުގެ ރޭ ކޮސްޓަރިކާއާ ދެކޮޅަށް ސްޕެއިން ނުކުންނަނީ އެއް ކަމެއްވިޔަ ނުދިނުމަށް އަޒުމު ކަނޑައަޅައިގެންނެވެ. އެއީ އެންމެ ފަހުން ވޯލްޑްކަޕުގައި ކުޅުނު ތިން ފަހަރުވެސް ފުރަތަމަ މެޗުން މޮޅުވެވިފައި ނުވާތީއެވެ.

މި ކަމަށް ނުކުންނައިރު ކެޕްޓަން ސާޖިއޯ ބުސްކެޓްސްގެ ފަހު ވޯލްޑްކަޕަކީ މިއީތޯ އެހުމުން އޭނާ ވަނީ އުމުރު މަތިވި ނަމަވެސް، މިއީ ފަހު ވޯލްޑް ކަޕް ކަމުގައިވާން ބޭނުންނުވާކަމުގެ އިޝާރާތެއްކޮށްފައެވެ. މި ފަހަރުގެ މުބާރާތަކީ ބުސްކެޓްސްގެ ހަތަރުވަނަ ވޯލްޑްކަޕެވެ. އޭނާ ވަނީ 2010 ވަނަ އަހަރުގެ ވޯލްޑް ކަޕް ސްޕެއިން ހޯދި އިރު މުހިންމު ދައުރެއް އަދާކޮށްފައެވެ. ބުސްކެޓްސް ބުނީ ފުރަތަމަ މެޗުން ތިން ޕޮއިންޓް ލިބުމަކީ މުބާރާތް ވަރަށް ފަސޭހަކޮށްދޭ ކަމެއް ކަމަށާއި، މިހެންވެ ތާރީޚު ބަދަލުކޮށްލަން ކުޅުންތެރިން ތިބީ ތައްޔާރަށް ކަމަށެވެ.

މުބާރާތަށް ސްކޮޑް ނެގި ފަހުން ގެންނަންޖެހުނު އެންމެ މުހިންމު ބަދަލަކީ، ވާތު ބެކް، ހޯޔޭ ގާޔާ ޓީމުން އުނިކުރަން ޖެހުމެވެ. އޭނާއަށް ލިބުނު އަނިޔާގެ ސަބަބުން ޓީމާ ވަކިކޮށް، އެތަން ފޫބައްދަން ގެނައީ ބާސެލޯނާގެ ޒުވާން ވާތު ބެކް، އަލެހަންދްރޯ ބަލްޑޭއެވެ. ނަމަވެސް އުމުރު ހަގުކަމުން ފުރަތަމަ 11ން ފުރުސަތު ނުލިބުމަކީ ވުން ކައިރި ކަމެކެވެ.

ކޯޗު ލުއިސް އެންރީކޭ ކުޅުވަނީ 4-3-3 ފޯމޭޝަނަށެވެ. މި ފޯމޭޝަނުގައި އޭނާ އިސްކަންދެނީ އިދިކޮޅު ޓީމުގެ ހާފުގެ ތެރޭގައި ބޯޅަ ހިފަހައްޓައިގެން ކުޅެވޭނެ ކުޅުންތެރިންނަށެވެ. ކީޕަރު ވާންޖެހޭނީ ޓީމުގެ ފޯވާޑުންނަށްވެސް އެހީތެރިވެދޭ ކުޅުންތެރިއަކަށެވެ. މި ފަހަރުގެ ސްކޮޑުން މެންޗެސްޓަރ ޔުނައިޓެޑްގެ ކީޕަރު، ޑޭވިޑް ޑެހެޔާއަށް ފުރުސަތު ނުދިނީ އެންރީކޭގެ މި ފިލޯސަފީއަށް ފިޓްނުވާތީއެވެ.

ހަގީގަތުގައި ސްޕެއިންގެ ފިލޯސަފީއަކީ އެންމެނަށް އެނގޭ އެއްޗެކެވެ. އެމީހުން ކުޅެނީ ކޮންކަހަލަ ފުޓްބޯޅައެއްކަމާއި، އެމީހުން ކުރާނެ ކަންކަންވެސް ވަރަށް ސާފެވެ. މިހެންވެ ސްޕެއިން ޓީމުގައި ޑިފެންޑަރުންގެ ގޮތުގައި ކުޅޭނެ ހަތަރު ކުޅުންތެރިންނަކީ ކޮބައިކަމެއް ކުޅުންތެރިންނަށްވެސް ޔަގީނެއް ނޫނެވެ. ވަރަށް ގިނަ ކުޅުންތެރިންނަށް މިހާތަނަށް ޓެސްޓިންގ ފުރުސަތު ދީފައިވާއިރު، ފަހަތުގައި ހުންނާނެކަން ކަށަވަރުވާ ހަމައެކަނި ކުޅުންތެރިއަކީ މެންޗެސްޓަރ ސިޓީގެ އެމެރިކް ލަޕޯޓާއެވެ.

ދެން އޮތް ސުވާލަކީ 19 އަހަރުގެ ފޯވާޑް، އަންސޫ ފަޓީއަކީ ބަރޯސާ ވެވޭވަރުގެ ފޯވަޑެއްތޯ ކުރެވޭ ސުވާލެވެ. ސްޕެއިން ޓީމުގައި ޒުވާން މިޑްފީލްޑަރުންވެސް ގިނައެވެެ. ބާސެލޯނާގެ ދެ ކުޅުންތެރިންގެ ތެރެއިން ޕެޑްރީ ވަނީ އޭނާ މިފަދަ ބޮޑު މުބާރާތަށް ތައްޔާރުވެފައިވާކަން ޔޫރޯ 2020ގައި ސާބިތުކޮށްދީފައެވެ. އެކަމަކު 17 އަހަރުގެ ގަވީއަށް މިއީ މުޅިން އައު ސޮފުހާއެކެވެ.