އާޖެންޓީނާ އަކީ ދުނިޔޭގައި އޮތް އެންމެ ވަރުގަދަ އެއް ޓީމު: އަލްމަލްކީ

އާޖެންޓީނާ އަކީ ދުނިޔޭގައި އޮތް އެންމެ ވަރުގަދަ އެއް ޓީމު ކަމަށް ސައުދީ އަރަބިއްޔާގެ މިޑްފީލްޑަރު ޢަބްދުﷲ އަލް މަލްކީ ބުނެފިއެވެ.

އަލްމަލްކީ މިހެން ބުނީ މިއަހަރުގެ ވޯލްޑް ކަޕްގައި ސައުދީގެ ފުރަތަމަ މެޗުގައި އާޖެންޓީނާއާ ދެކޮޅަށް ނުކުތުމުގެ ކުރިން އޮތް ޕެރެސް ކޮންފަރެންސްގައެވެ.

އޭނާ ބުނީ އާޖެންޓީނާ އަކީ ދުނިޔޭގައި އޮތް އެންމެ މޮޅު، އެންމެ ވަރުގަދަ އެއް ޓީމު ކަމަށެވެ. އެހެންކަމުން އެ މެޗުގައި އާޖެންޓީނާއާ ދެކޮޅަށް ކުޅުމަކީ ސައުދީގެ ކުޅުންތެރިން ވަަރަށް ތައްޔާރަށް އޮތް ކަމެއް ކަމަށް އޭނާ ބުންޏެވެ. އަލްމަލްކީ ބުނީ މެޗު ކުޅެން ޖެހޭ މާހައުލަކީ މުޅިން ތަފާތު މާހައުލެއް ކަމަށާއި، ނަމަވެސް ސައުދީން އެ މީހުންގެ އެންމެ ފުރިހަމަ ކުޅުން ދައްކަން މަސައްކަތް ކުރާނެ ކަމަށެވެ.

މީގެ އިތުރުން އެ ޕްރެސްގައި ސައުދީގެ ކޯޗު ހާވޭ ރެނާޑް ބުނީ އާޖެންޓީނާއާ ދެކޮޅަށް ނުކުންނަ ސައުދީ ޓީމުގެ ގޯލްކީޕަރަކީ ވޯލްޑް ކަޕް ކޮލިފައިންގެ 18 މެޗުގެ ތެރެއިން 17 މެޗުގައި އިތުބާރާއެކު ގޯލް ބެލެހެއްޓި ކީޕަރެއް ކަމަށެވެ. އޭނާ ދެއްކީ ރަނގަޅު ކުޅުމެއްކަން ފާހަގަކުރަމުން ރެނާޑް ބުނީ، ޓީމުގެ ފަހަތުގައި މައްސަލައެއް އުޅޭނެ ކަމަކަށް ނުބެލެވޭ ކަމަށެވެ. ރެނާޑް ބުނީ ވޯލްޑް ކަޕްގެ ކުރިން ކުޅުނު މެޗުތަކުގައި ސައުދީގެ ނަތީޖާ ރަނގަޅު ކަމަށެވެ. އޭނާ ބުނީ މުޅި ޓީމުގައި މިވަގުތު އޮތީ ވަރަށް ރަނގަޅު ރޫހެއް ކަމަށެވެ. އާޖެންޓީނާގެ މެޗުގައި އެ ހުރިހާ ކަމެއް ބޭނުންވާނެ ކަން ފާހަގަ ކުރަމުން އޭނާ ބުނީ، އަބަދުވެސް ބަލަން ވާނީ ޓީމަށް އެންމެ ރަނގަޅު ގޮތަށް ކަމަށެވެ.

ރެނާޑް ބުނީ އެންމެ ރަނގަޅު ނަތީޖާ އަކީ އަބަދުވެސް ފުރަތަމަ މެޗަށް ވިސްނުން ކަމަށެވެ. އޭނާ ބުނީ އެ މެޗުގެ ކުރިން ދެ ވަނަ މެޗާއި ތިން ވަނަ މެޗުގައި މިވެނި ގޮތަކަށް ވެދާނެއޭ ނުބުނާނެ ކަމަށެވެ. އޭނާ ބުނީ ތައްޔާރުވާން ޖެހޭނީ އާޖެންޓީނާ މެޗަށް ކަމަށާއި، އެއީ އެންމެ މުހިންމު ކަންތައް ކަމަށެވެ. މީގެ އިތުރުން ރެނާޑް ބުނީ އެ މީހުން އައިސް ތިބީ ޤަތަރުގެ ދޯހާގެ ރީތިކަން ބަލަން ނޫން ކަމަށެވެ. އޭނާ ބުނީ ސައުދީ އޮތީ ދޯހާއާ މާ ދުރުގައި ނޫން ކަމަށާއި، އެމީހުންނަށް ޤަތަރު ވަރަށް ރަނގަޅަށް އެނގޭ ކަމަށެވެ. ރެނާޑް ބުނީ ބައެއް މީހުން ޤަތަރާ މެދު ހިތްހަމަނުޖެހުންތަކެއް ހުރި ނަމަވެސް، ސައުދީ ޓީމުން ޤަތަރާ މެދު ހިތްހަމަޖެހޭ ކަމަށެވެ.

ގްރޫޕް ސީ ގެ ފުރަތަމަ މެޗުގައި ސައުދީން އާޖެންޓީނާއާ ދެކޮޅަށް ނުކުންނާނީ އަންގާރަ ދުވަހު ރާއްޖެ ގަޑިން 15:00 ގައެވެ.