ޔޫކްރައިންގެ މުސްތަޤުބަލު ކަށަވަރު ކުރުމަށްޓަކާ އެ ޤައުމަށް އެހީތެރިކަން ފޯރުކޮށްދިނުމަށް ފެއިލްވުމަކީ، ޚުދުމުޚުތާރު އަނިޔާވެރި ވެރިކަމާއި ހަމަނުޖެހުމާއި ޔަޤީންކަން ގެއްލިފައިވާ މިޞްރާބަކަށް ދުނިޔޭގެ ހުންގާނެ އަނބުރުވާލަފާނެ ކަމެއް ކަމަށް، އެމެރިކާގެ ދިފާޢީ ވަޒީރު ޑޭވިޑް ލޮއިޑް އޮސްޓިން ވިދާޅުވެއްޖެއެވެ.

ކެނެޑާގައި ކުރިއަށް ދިޔަ ސެކިއުރިޓީ ފޯރަމެއްގައި މި މޭރުމުން ވާހަކަ ކުރިއަށް ގެންދަވަމުން އޮސްޓިން ވަނީ، ޔޫކްރައިންގައި ކުރަމުން ދާ ހަނގުރާމައާއި ބައިނަލްއަޤުވާމީ މުޖުތަމަޢު ގުޅޭ ގޮތްތައް ކިޔާ ދެއްވާފައެވެ. މިއީ ރަޝިއާއިން ޔޫކްރައިންގައި ކުރަމުންދާ، 9 މަހެއްހާ ދިގުލާފައިވާ ވަރުގަދަ ހަނގުރާމައާ ގުޅިގެނން މިހާތަނަށް އޮސްޓިން ދެއްވި އެންމެ ވަރުގަދަ އެއް ތަޤުރީރުވެސްމެއެވެ.

އޮސްޓިން ވަނީ ދުނިޔޭގެ ފެންވަރުގައި، ނިއުކްލިއަރ ހަތިޔާރުގެ ބާރުވެރިކަން އިތުރު ކުރުމުގެ ނުރައްކާ އޮތް ކަމުގެ އިންޒާރުވެސް ދެއްވާފައެވެ.

ދުނިޔޭގެ އެންމެ ބާރުގަދަ އަދި އެންމެ ހަތުރުވެރި 2 ޤައުމުގެ ގޮތުގައި އޮތް އެމެރިކާއާއި ޗައިނާގެ އެންމެ އިސްލީޑަރުން ބައްދަލު ކުރެއްވިތާ 1 ދުވަސް ފަހުން ދެއްވި މި ތަޤުރީރުގައި އޮސްޓިން ވަނީ، ރަޝިއާއާއި ޔޫކްރައިންގެ ކޯޅުންގަނޑުގެ ނަޒަރިއްޔާއިން ޗައިނާއަށް އިޝާރާތްތަކެއް ކުރައްވާ، ވަށްބަހުން ޖައްސަވާފައެވެ.

އެގޮތުން އެ ސަރަޙައްދުގެ ފުރިހަމަ މިލްކުވެރިކަމަށް ޗައިނާއިން ތަކުރާރުކޮށް ވަކާލާތު ކުރަމުން ޓައިވާން ސަރަޙައްދުން، ޗައިނާގެ އަސްކަރީ މަތިންދާބޯޓުތައް ރެކޯޑް އަދަދަކަށް ދަތުރު ކުރަމުން ދާ ކަން، އޮސްޓިން ވަނީ ފާހަގަ ކުރައްވާފައެވެ. އަދި އެއީ ނުރައްކާ ބޮޑު ކަމެއް ކަމަށްވެސް އެމެރިކާގެ ދިފާއީ ވަޒީރު ވަނީ ވިދާޅުވެފައެވެ.

އަމިއްލަ ޑިމޮކްރަޓިކް ވެރިކަމެއް އޮންނަ ޓައިވާންއާއި ދާދި ކައިރީގައި ޗައިނާއިން އަސްކަރީ ހަނގުރާމައެއްގެ ކުޅިގޮނޑި ފަތުރާލި ފަހުން، ޓައިވާން ސަރުކާރާއި ޗައިނާ ސަރުކާރާ ދެމެދު އޮތް ނުތަނަވަސްކަން ވަނީ ގަދަވެއެވެ. އަދި އެމެރިކާގެ ހައުސް ސްޕީކަރ ނޭންސީ ޕެލޯސީ، ޓައިވާނަށް ކުރެއްވި ދަތުރާއެކު، އެ ނުތަނަވަސްކަން ވަނީ ވަކިން ގަދަވެފައެވެ.