ފީފާ ވޯލްޑް ކަޕްގައި ވާދަ ކުރުމަށް އެންމެ ފަހުގެ ޗެމްޕިއަން ފްރާންސް ޤަތަރަށް ގޮސްފިއެވެ.

ފްރާންސް ޤަތަރަށް ގޮސްފައިވަނީ ބުދަ ދުވަހުގެ ވަގުތެއްގައެވެ. އެންމެ ފަހުން 2018 ވަނަ އަހަރު ރަޝިޔާގައި ބޭއްވި މުބާރާތް ކާމިޔާބުކުރި ފްރާންސް ޤަތަރަށް ގޮސްފައިވާއިރު، އެ ޓީމަށް ވަނީ އަނިޔާގެ މައްސަލަތަކާ ކުރިމަރިތިލާން ޖެހިފައެވެ. އެގޮތުން މުބާރާތުގެ ކުރިން އެންގޯލޯ ކާންޓޭ އާއި ޕައުލް ޕޮގްބާ އަށް އަނިޔާވެ މުބާރާތުގައި ނުކުޅެވޭނެ ކަން ވަނީ ޔަޤީންވެފައެވެ. މުބާރާތަށް ތައްޔާރުވުމުގެ ގޮތުން ފްރާންސް އިން ކުރިއަށް ގެންދިޔަ ފަރިތަކުރުންތަކުގެ ތެރެއިން ކްރިސްޓޮފާ އެންކުންކޫއަށް އަނިޔާވެ މުބާރާތުގައި ނުކުޅެވޭނެއެވެ. އޭނާގެ ބަދަލަށް ފްރާންސް އިން ވަނީ އެހެން ކުޅުންތެރިޔަކު ޓީމުގައި ހިމަނާފައެވެ.

ފްރާންސް ޓީމަކީ މިއަހަރުގެ މުބާރާތުގައި ގިނަ ބައެއްގެ ލޯ ހުއްޓޭނެ އެއް ޓީމެވެ. އެންމެ ފަހުގެ ޗެމްޕިއަނުންނަށް ވުމުގެ އިތުރުން އެ ޓީމުގައި މަޝްހޫރު ގިނަ ކުޅުންތެރިން ހިމެނެއެވެ. އެގޮތުން އެންމެ ފަހުން ބެލެންޑޯ އެވޯޑު ކާމިޔާބުކުރި ރެއާލް މެޑްރިޑުގެ ކެޕްޓަން ކަރިމް ބެންޒެމާގެ އިތުރުން ޒުވާން ތަރި ކީލިއަން އެމްބާޕޭ އާއި އެންޓޮއިން ގްރީޒްމަން ހިމެނެއެވެ.

ޤަތަރަށް ދިޔުމަށްފަހު ފްރާންސްގެ ކޯޗު ބުނީ އަމާޒަކީ ތަށި ދިފާއު ކުރުން ކަމަށެވެ. އޭނާ ބުނީ އެކަން ކުރުމަކީ އުނދަގޫ ކަމަކަށްވާނެ ކަމަށާއި، ނަމަވެސް ފްރާންސް އޮތީ މުބާރާތަށް ތައްޔާރަަށް ކަމަށެވެ.

އެންމެ ފަހުގެ ޗެމްޕިއަނުންނަށް ޖެހިގެން އައި އަހަރުގެ މުބާރާތެއް އެންމެ ފަހުން ކާމިޔާބުކުރެވުނީ ބްރެޒިލްއަށެވެ. އެ ޤައުމުން ވަނީ 1958 ވަނަ އަހަރުގެ މުބާރާތް ކާމިޔާބުކޮށް، ޖެހިގެން އައި 1962 ވަނަ އަހަރުގެ މުބާރާތް ވެސް ކާމިޔާބުކޮށްފައެވެ.

މިއަހަރުގެ މުބާރާތުގައި ފްރާންސް އޮތީ އޮސްޓްރޭލިއާ، ޑެންމާކު އަދި ޓިއުނީޝިޔާއާއެކު ގްރޫޕް ޑީ ގައެވެ. ފްރާންސްގެ ފުރަތަމަ މެޗުގައި މި މަހުގެ 23 ވަނަ ދުވަހު އެ ޤައުމުން ނުކުންނާނީ އޮސްޓްރޭލިޔާއާ ދެކޮޅަށެވެ. އެއަށްފަހު ދެ ވަނަ މެޗުގައި ޑެންމާކާ ދެކޮޅަށް ނުކުންނާނީ 26 ގައެވެ. ގްރޫޕް ސްޓޭޖުގެ ފަހު މެޗުގައި ޓިއުނީޝިޔާއާ ދެކޮޅަށް ނުކުންނާނީ 30 ގައެވެ.