މެދު ޒިޔާރަތުގައި ދިދަ ނަގަން ނިންމާފައިވަނީ ވަކި ދުވަސް ދުވަހަކާ ގުޅުވައިގެން: މިނިސްޓަރު
17 ނޮވެމްބަރު 2022 | ބުރާސްފަތި 02:11މީގެކުރިންވެސް މެދު ޒިޔާރަތުގައި ދިދަ ނަގާފައިވަނީ ވަކި ދުވަސްތަކެއް ފާހަގަކުރުމަށް
މެދުޒިޔާރަތް
މެދު ޒިޔާރަތުގައި ދިދަ ނަގަން ނިންމާފައިވަނީ ވަކި ދުވަސް ދުވަހަކާއި ގުޅިގެން ވަކި މުނާސަބަތުތަކުގައި ކަމަށް ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެއެވެ.
މާލޭގެ މެދު ޒިޔާރަތުގައި ނޮވެމްބަރު 11 ވަނަ ދުވަހު ދިދަ ނެގުމާ ގުޅިގެން ބައެއް ފަރާތްތަކުން ވަނީ ސަރުކާރަށް ވަރަށް ބޮޑަށް ކިޔާފައެވެ. އެއީ ސަގާފީ ކަމެއް ނޫންކަމަށާއި އުވިފައިވާ މުންކަރާތެއް ދިރުވަނީކަމަށް ބުނެ ބައެއް ދީނީ އިލްމުވެރިން ސަރުކާރަށް ވަނީ ފާޑުކިޔާފައެވެ. އެއާއެކު ދެން ފެނިގެންދިޔައީ ދިދަ ބޭލިތަނެވެ.
ބުދަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގައި ވަޒީރުންނާ ސުވާލުކުރުމުގެ އެޖެންޑާގެ ދަށުން އުނގޫފާރު ދާއިރާގެ މެންބަރު މުހައްމަދު ވަހީދު ވަނީ ދިދަތައް ނެގީ ކިހިނެއް ކޮންގޮތަކަށް ކޮންބޭފުޅެއް އަންގަވައިގެންތޯ މިނިސްޓަރު އަރިހު އައްސަވާފައެވެ. އެސުވާލަށް ޖަވާބު ދެއްވަމުން މިނިސްޓަރު ވިދާޅުވީ މެދު ޒިޔާރަތުގައި މިފަހަކަށް އައިސް ޒީނަތްތެރިކުރުމުގެ މަސައްކަތްތަކެއް ކުރެވެމުން ގޮސްފައިވާކަމަށެވެ. އެގޮތުގެ މަތިން ދިދަ ނެގުމަށް ނިންމެވީކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ދިދަ ނަގަން ނިންމާފައިވަނީ ވަކި ދުވަސްތަކާއި ގުޅުވައިގެން ކަމަށާއި މީގެކުރިންވެސް މެދު ޒިޔާރަތުގައި ދިދަ ނަގާފައިވަނީ އެގޮތަށް ވަކި ދުވަސްތަކެއް ފާހަގަކުރުމަށް ކަމަށެވެ.
ތާރީހުން އެނގެން އޮންނަގޮތުން އެންމެ ފަހުން މެދު ޒިޔާރަތުގައި ދިދަ ނަގާފައިވަނީ 1970ގެ އަހަރުތަކުގައެވެ.
