ޅ އަތޮޅުގައި އާރުޓީއެލް ފެރީގެ ޚިދުމަތް ފަށަން ފެރީތައް ފޮނުވައިފި
ފުރަތަމަ ހަފްތާގައި އޮންނާނީ މި ނިޒާމަށް އަހުލުވެރި ކުރުވުމުގެ ދަތުރުތައް
ޅ އަތޮޅުގައި ހައިސްޕީޑް ފެރީގެ ޚިދުމަތް ފެށުން
ހައި ސްޕީޑު ފެރީގެ ނިޒާމުން ރާއްޖޭގެ ހުރިހާ ރަށެެއް ގުޅާލުމަށް ކުރިއަށްގެންދާ މަސައްކަތުގެ ދަށުން ޅ އަތޮޅުގައި އެ ޚިދުމަތް ފެށުމަށް ބޭނުންވާ ލޯންޗު ފެރީތައް އެ ރަށަށް ފޮނުވައިފިއެވެ.
މި ފެރީތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ފޮނުވާފައިވަނީ ބުދަ ދުވަހުއެވެ. އެމްޓީސީސީން މައުލޫމާތު ދޭ ގޮތުގައި ބުރާސްފަތި ދުވަހުގެ މެންދުރުން ފަށައިގެން ޅ އަތޮޅުގެ ފެރީ ދަތުރުތައް ފެށުމަށް އެ ކުންފުނިން ގެންދަނީ މަސައްކަތް ކުރަމުންނެވެ. އެގޮތުން ފުރަތަމަ ހަފްތާގައި އޮންނާނީ މި ނިޒާމަށް އަހުލުވެރި ކުރުވުމުގެ ދަތުރުތައް ކަމަށާއި، ހަފްތާއެއް ވަންދެން ދަތުރުކުރާނީ ހިލޭކަމަށް އެމްޓީސީސީގެ ސީއޯއޯ ޝާހިދު ހުސައިން މޫސާ ވިދާޅުވިއެވެ.
ޅ އަތޮޅުގެ 7 ރޫޓެއްގައި ދަތުރުތައް ފަށާއިރު، މިއީ ރޫޓުތައް ދިރާސާ ކުރުުމަށް ކޮންމެ އަތޮޅެއްގައި ވެސް ރަސްމީކޮށް ދަތުރުތައް ފެށުމުގެ ކުރިން އެމްޓީސީސީން ބާއްވާ ދަތުރުތަކެކެވެ.
އެމްޓީސީސީން ބުނި ގޮތުގައި ރޫޓު ޓެސްޓު ކުރަން ކުރާ ދަތުރުތައް ފެށުމުން ރަށު ކައުންސިލް އިދާރާތައް މެދުވެރިކޮށް ޓިކެޓް ނެގޭނެއެވެ. މި ދަތުރުތައް ކުރަން ހަމަޖެހިފައިވަނީ އެއް ހަފްތާގެ މުއްދަތަކަށެވެ. ނަމަވެސް ޚިދުމަތް ރަސްމީކޮށް ފެށުމުން ޓިކެޓް ނަގަން ޖެހޭނީ އާރުޓީއެލް އެޕްލިކޭޝަން މެދުވެރިކޮށެވެ.
ޝާހިދު ވިދާޅުވީ، ފައިސާ ނަގައިގެން ދަތުރު ކުރި ނަމަވެސް 3 އަހަރުން ދަށުގެ ކުދިންނާއި، ޚާއްސަ އެހީއަށް ބޭނުންވާ މީހުންނަށް ހިލޭ ދަތުރު ކުރެވޭނެ ކަމަށެވެ.
އެމްޓީސީސީ އިން މިހާތަނަށް އާރުޓީއެލްގެ ޚިދުމަތް ފަށާފައިވަނީ ހއ. އަދި ހދ. ގެ އިތުރުން ށ އަތޮޅުގައެވެ. ށ. އަތޮޅުގައި މި ޚިދުމަތް ފެށުމާއެކު ޒޯން އެކެއްގެ ހުރިހާ ރަށެއްގައި މި ޚިދުމަތް ފެށުނީއެވެ.
އޭގެ އިތުރުން، ޅ އަތޮޅުގައިވެސް ފެރީގެ އަގުތައް ކަނޑައެޅިގެންދާނީ އެހެނިހެން އަތޮޅުތަކެކޭ އެއްގޮތަށްކަަމަށް އެމްޓީސީސީން މައުލޫމާތު ދެއެވެ. އެއީ 35 ރުފިޔާއާއި 125 ރުފިޔާގެ ރޭންޖުގެ އަގުތަކެވެ.
މިއީ އިންޓެގްރޭޓެޑް ނޭޝަނަލް ޕަބްލިކް ފެރީ ނެޓްވޯރކުގެ ދަށުން ފެށި ޚިދުމަތެކެވެ. މި ނެޓްވޯކަކީ މުޅި ރާއްޖެއަށް އަމާޒުކޮށް ފަސިންޖަރުންނާއި މުދާ އުފުލާ ފެރީ ހިމެނޭ ގޮތުން، ނޭޝަނަލް ސްޕެޝަލް ޕްލޭން (2020-2040)ގައި ހިމެނޭ ތިން ޒޯނާއި ހަ ރީޖަން ގުޅުވައިދިނުމަށް ފަރުމާކޮށްފައިވާ ވިއުގައެކެވެ. މި ގޮތުން ފެރީ ނެޓްވޯރކުން ހަ ރީޖަންގައި އެކުލެވޭ ހުރިހާ ރަށްތަކެއް ގުޅާލެވޭއިރު، އެއް ރީޖަން އަނެއް ރީޖަނާވެސް ގުޅިގެންދާނެއެވެ. މި ގޮތަށް ފަސިންޖަރުން އުފުލާ ފެރީ ގުޅުވާލެވޭނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް"، "ނަން-ކޮމިއުޓް ލިންކް"، އަދި "ހައިވޭ ލިންކް" މެދުވެރިކޮށެވެ.
