8 އަހަރަށްފަހު ވޯލްޑް ކަޕްގައި ވާދަކުރުމަށް ނެދަލޭންޑްސް ޤަތަރަށް
އެންމެ ފަހުން އެ ޤައުމު ވާދަކުރީ 2014 ވަނަ އަހަރު ބްރެޒިލްގައި އޮތް ވޯލްޑް ކަޕްގައި
ނެދަލޭންޑްސް ޓީމުގެ ކުޅުންތެރިން ދަތުރުކުރި ފްލައިޓުގައި
ފީފާ ވޯލްޑް ކަޕްގައި ވާދަކުރުމަށް ނެދަލޭންޑްސް ޓީމު ޤަތަރަށް ދަތުރުކޮށްފިއެވެ.
ނެދަލޭންޑްސް ޓީމު ޤަތަރަށް ދަތުރުކޮށްފައިވަނީ އަންގާރަ ދުވަހުގެ ރޭގެ ވަގުތެއްގައެވެ. ޤަތަރަށް ދިޔުމަށްފަހު ނެދަލޭންޑްސްގެ ކޯޗު ލުއިސް ވެން ހާލް ބުނީ، ހީކުރެވުނު ވަރަށްވުރެ ޤަތަރު ހޫނު ގަދަ ނޫން ކަމަށެވެ. އެއީ ރަނގަޅުކަމެއް ކަން ފާހަގަކުރަމުން ކޯޗު ބުނީ، ބުދަ ދުވަހު ނެދަލޭންޑްްސްގެ ފަރިތަކުރުންތައް ފަށާނެ ކަމަށެވެ. މިވަގުތު އެންމެ ޚާއްސަކަމެއް ދެނީ މުބާރާތުގެ ކުރިން ރަނގަޅު ފަރިތަކުރުމެއް ކުރިއަށް ގެންދިޔުމަށް ކަމަށް ވެސް އޭނާ ބުންޏެވެ.
މީގެ އިތުރުން އޭނާ ބުނީ މުބާރާތުގައި ނެދަލޭންޑްސް އޮތީ ހިތްހަމަޖެހޭ ގްރޫޕެއްގައި ކަމަށެވެ. ވެން ހާލް ބުނީ ގްރޫޕާމެދު ޝަކުވާ ކުރުމުގެ ބޭނުނެއް ނެތް ކަމަށާއި، މުބާރާތަށް ފޯކަސް ބަހައްޓަން ޖެހޭ ކަމަށެވެ.
މިއަހަރުގެ މުބާރާތުގައި ނެދަލޭންޑްސް އޮތީ މުބާރާތް ބާއްވާ ޤައުމު ޤަތަރުގެ އިތުރުން އިކުއެޑޯ، އަދި ސެނެގާލާއެކު ގްރޫޕް އޭގައެވެ. ގްރޫޕް ސްޓޭޖުގައި ނެދަލޭންޑްސްގެ ފުރަތަމަ މެޗުގައި މި މަހުގެ 21 ވަނަ ދުވަހު ނިކުންނާނީ ސެނެގާލާ ދެކޮޅަށެވެ. އެއަށްފަހު ދެ ވަނަ މެޗުގައި އިކުއެޑޯއާ ދެކޮޅަށް ނިކުންނާނީ 25 ވަނަ ދުވަހުއެވެ. ގްރޫޕް ސްޓޭޖު ފަހު މެޗުގައި މުބާރާތް ބާއްވާ ޤައުމު ޤަތަރާ ދެކޮޅަށް ނިކުންނާނީ 29 ގައެވެ.
މިއީ އަށް އަހަރު ދުވަހުގެ މެދު ކެނޑުމަކަށްފަހު ނެދަލޭންޑްސް އިން ވޯލްޑް ކަޕްގައި ވާދަކުރާ ފުރަތަމަ ފަހަރެވެ. އެންމެ ފަހުން އެ ޤައުމު ވާދަކުރީ 2014 ވަނަ އަހަރު ބްރެޒިލްގައި އޮތް ވޯލްޑް ކަޕްގައެވެ. އެ އަހަރުގެ މުބާރާތުގައި އެ ޤައުމަށް ލިބުނީ ތިން ވަނައެވެ. އޭގެ ކުރިން 2010 ވަނަ އަހަރުގެ މުބާރާތުގައި އެ ޤައުމު ވަނީ ފައިނަލްގައި ކުޅެ، ސްޕެއިން އަތުން ބަލިވެފައެވެ.
