ފަރިތަކުރުންތަކުގެ ތެރެއިން އަނިޔާވެ އެންކުންކޫ އަށް ވޯލްޑް ކަޕް ގެއްލިއްޖެ

ފީފާ ވޯލްޑް ކަޕަށް ތައްޔާރުވުމުގެ ގޮތުން ކުރިއަށް ގެންދިޔަ ފަރިތަކުރުންތަކުގެ ތެރެއިން އެންމެ ފަހުގެ ޗެމްޕިއަން ފްރާންސްގެ ފޯވާޑް ކްރިސްޓޮފާ އެންކުންކޫ އަށް އަނިޔާވެ މުބާރާތުގައި ނުކުޅެވޭނެކަން ޔަޤީން ވެއްޖެއެވެ.

ޖަރުމަނު ލީގުގައި އާރްބީ ލައިޕްޒިގަށް ވެސް ކުޅެމުން އަންނަ އުމުރުން 25 އަހަރުގެ ކުޅުންތެރިޔާ އަށް އަނިޔާވީ ފްރާންސް އިން އަންގާރަ ދުވަހު ކުރިއަށް ގެންދިޔަ ފަރިތަކުރުމުގެ ތެރެއިންނެވެ. ފަރިތަކުރުމުގެ ތެރެއިން ވާއަތު ފަޔަށް ލިބުނު އަނިޔާއެއްގެ ސަބަބުން އެންކުންކޫ ވަނީ ބިންމައްޗަށް ވެއްޓިފައެވެ. އޭގެ ސަބަބުން އެންކުންކޫގެ އިތުރު މެޑިކަލް ޓެސްޓުތަކެއް ވެސް ވަނީ ހަދާފައެވެ. އެ ޓެސްޓުތަކުގެ ނަތީޖާ ދައްކާ ގޮތުން ފަޔަށް ލިބުނު އަނިޔާގެ ސަބަބުން އެންކުންކޫ އަށް ވޯލްޑް ކަޕްގައި ނުކުޅެވޭނެވެ. އެހެންކަމުން ފްރާންސްގެ ޓްރެއިނިން ކޭމްޕު ދޫކޮށްލާނެ ކަމަށް މީޑއާތަކުގައި ބުނެފައިވެއެވެ.

މިކަމާ ގުޅިގެން ފްރާންސްގެ ފުޓުބޯޅަ އިދާރާއާ ހަވާލާދީ އެ ޤައުމުގެ ނޫހެއްގައި ބުނެފައިވަނީ އެންކުންކޫގެ މެޑިކަލް ފައިލްތައް ދުނިޔޭގެ ފުޓުބޯޅައިގެ މައި އިދާރާ (ފީފާ) އަށް ފޮނުވާފައިވާނެ ކަމަށެވެ. ސަބަބަކީ އެންކުންކޫގެ ބަދަލުގައި އެހެން ކުޅުންތެރިޔަކު ޓީމުގައި ހިމަނަން ކަމަށް ވެސް އެ އިދާރާއާ ހަވާލާދީ ބުނެފައިވެއެވެ. ރިޕޯޓުތައް ބުނާ ގޮތުން އެންކުންކޫގެ ބަދަލުގައި ޓީމުގައި ހިމަނާނީ އެއިންޓްރަކް ފްރެންކްފާޓް އަށް ކުޅެމުން އަންނަ އުމުރުން 23 އަހަރުގެ ފޯވާޑް ރަންޑަލް ކޮލޯ މުއާނީއެވެ.

މުބާރާތުގެ ކުރިން ފްރާންސް ޓީމަށް ވަނީ އަނިޔާގެ ގިނަ މައްސަލަތަކާ ކުރިމަތިލާން ޖެހިފައެވެ. އެގޮތުން 2018 ވަނަ އަހަރުގެ މުބާރާތް ކާމިޔާބުކުރުމުގައި އެންމެ އިސް ރޯލެއް އަދާކުރި އެންގޯލޯ ކާންޓޭ އާއި ޕައުލް ޕޮގްބާ އަށް އަނިޔާވެ މުބާރާތުގައި ނުކުޅެވޭނެވެ. އެންކުންކޫ އަށް އަނިޔާވީއިރު އޭނާ އައީ މިހާތަނަށް ލައިޕްޒިގްގައި ވެސް މޮޅު ކުޅުމެއް ދައްކަމުންނެވެ. ޖަރުމަނު ލީގުގައި މި ސީޒަންގައި ކުޅުނު 23 މެޗުން އޭނާ ވަނީ 17 ލަނޑު ޖަހާފައެވެ.