މަޖިލީހުގެ ރިޔާސަތުގައި ޝަރީފް އިށީންދެވަޑައިގަތުމުން ރައީސް ނަޝީދުގެ ނުރުހުން
މަޖިލީސް ނިންމަން އޮންނަ ގޮތަކީ، "ވަލްހަމްދުލިއްﷲ، މަޖިލިސް ނިމުނީ" މިހެން ބުނެ ނިންމާލުން ކަމަށް ރައީސް ނަޝީދު ވިދާޅުވި
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
ހޯމަ ދުވަހުގެ މަޖިލީހުގެ ޖަލްސާ ކުއްލި ގޮތަކަށް މެދުކަނޑާލުމާއި ގުޅިގެން މަޖިލީހުގައި މެންބަރުން އަޑު އުފުލާ، ހިނގި ކަންކަމުގެ ތެރޭގައި މަޖިލީހުގެ ރިޔާސަތުގައި މަރަދޫ ދާއިރާގެ މެންބަރު އިބްރާހިމް ޝަރީފް އިށީންނަވާފައިވާތީ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އެކަމާ މެދު ނުރުހުން ފާޅުކުރައްވައިިފިއެވެ.
މަޖިލީހުގެ ރިޔާސަތުގައި އިންނަވާ ވާހަކަދައްކަވަމުން ރައީސް ނަޝީދު ވަނީ ހޯމަ ދުވަހުގެ ޖަލްސާ ނިންމާފައި ވަނީ މަޖިލީހުގެ ޖަލްސާ ނިންމަން ޖެހޭ ގޮތަށް ކަމަށާއި، އެގޮތަކީ "ވަލްހަމްދުލިއްﷲ، މަޖިލިސް ނިމުނީ" މިހެން ބުނުން ކަމަށެވެ. އަދި މަޖިލީހުގެ ޖަލްސާ ނިމުނު ގޮތާ މެދު ބައެއް މެންބަރުންނަށް އޮޅުން އަރާފައިވާ ކަމަށް ވެސް ރައީސް ނަޝީދު ވަނީ ވިދާޅުވެފައެވެ. މީގެ އިތުރުން މަޖިލީހުގައި މައްސަލައެއް ނުވަތަ ބިލެއްގެ ބަހުސްގެ މަރުހަލާ ނިމުމަށް ފަހު ތިން ވަނަ ކިޔުން ނުކިޔާތީ ވޯޓަށް އެހުމުގެ އެއްވެސް ކަމެއް ހޯމަ ދުވަހުގެ ޖަލްސާގައި ކުރިއަށް ގެންގޮސްފައި ނުވާ ކަމަށް އެމަނިކުފާނު ވަނީ ވިދާޅުވެފައެވެ. އަދި މަޖިލިސް ނިންމަމުން ރިޔާސަތުން ދައްކާ ވާހަކަ އަކީ ރެކޯޑްކުރެވޭ ވާހަކަތަކެއް ކަމަށް ވެސް ރައީސް ނަޝީދު ވަނީ ވިދާޅުވެފައެވެ. އެހެންކަމުން ހޯމަ ދުވަހުގެ ޖަލްސާގައި ގަވާއިދާއި ޚިލާފަށް ކަމެއް ހިނގާފައި ނުވާ ކަމަށް އެމަނިކުފާނު ވިދާޅުވިއެވެ.
އެހެން ވިދާޅުވުމަށް ފަހު މަޖިލީހުގެ އެޖެންޑާ އާއި އެކު ރައީސް ނަޝީދު ވަނީ ކުރިއަށް ވަޑައިގަންނަވާފައެވެ. އެ ހިސާބުން މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވަނީ ނިޒާމީ ނުކުތާއެއް ނަންގަވާ މަޖިލީހުގައި ހޯމަ ދުވަހު 3 ގޯސް ހަދާފައިވާ ކަމަށް ފާހަގަކުރައްވާފައެވެ. އަދި މަޖިލީހުގައި ހޯމަ ދުވަހު ކަން ހިނގި ގޮތާއި ރައީސް ނަޝީދު ކަންކަން ހިނގި ކަމަށް ވިދާޅުވާއި ގޮތާއި ތަފާތުކަމަށް ވެސް އޭނާ ވަނީ ވިދާޅުވެފައެވެ. ޝަރީފްގެ ވާހަކަ މެދުކަނޑާލެއްވުމަށް ފަހު ރައީސް ނަޝީދު ވަނީ މަޖިލީހުގެ ސަގާފަތާއި، އާދަކާދަ އާއި އުސޫލާއި ޚިލާފަށް މަޖިލީހުގެ ރިޔާސަތުގައި އިށީންނެވިތަން އެމަނިކުފާނަށް ފެނިވަޑައިގެންނެވި ކަމަށް ވިދާޅުވެފައެވެ. މަޖިލީހުގެ ރިޔާސަތަކީ މެމްބަރުން ވޯޓުދެއްވައިގެން ހޮވާ ކަމަކަށް ވާއިރު އެކަން ނުކުރައްވާ ރިޔާސަތުގައި އިށީންނެވުމަކިީ ދެރަ ކަމެއް ކަަމަށް ރައީސް ނަޝީދު ވިދާޅުވިއެވެ. އަދި ޝަރީފްގެ ނިޒާމީ ނުކުތާ ބަލައިގަންނަކަން ނުވަތަ ނޫން ކަން ރައީސް ނަޝީދު ފާހަގައެއް ނުކުރައްވައެވެ. އަދި ޝަރީފްގެ ވާހަކަ ފުރިހަމަކުރުމަށް އިތުރު ފުރުސަތެއް ދެއްވާފައެއް ވެސް ނުވެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި، މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް އިޞްލާޙު ގެނައުމުގެ ބިލު މުޅި މަޖިލީހުގެ ކޮމިޓީން ދިރާސާކޮށް ނިންމިގޮތުގެ ރިޕޯޓު މަޖިލީހުގެ ތަޅުމަށް ހުށަހަޅާފައިވެއެވެ. އަދި ރިޕޯޓަށް ބަހުސް ކުރަން މެންބަރަކު އެދިފައި ނެތުމުން، ރިޔާސަތުން ވަނީ ބިލަށް ވޯޓަށް އަހާ ވަރަށް މެންބަރުން ތަޅުމުގައި ނެތްކަމަށް ވިދާޅުވެ ކުއްލި ގޮތަކަށް ޖަލްސާ މެދުކަނޑާލާފައެވެ.
އެއާއި އެކު މަޖިލީހުގެ ތަޅުމުގައި މެންބަރުން ވަނީ ޓެކްސް ބޮޑުކުރާ ބިލަށް ވޯޓުލާނެ ގަޑިއާއި ތާރީހެއް ދިނުމަށް ޑިމާންޑްކޮށްފައެވެ. އަދި މަޖިލިސް ކުއްލި ގޮތަކަށް ނިންމާލާފައިވަނީ، މަޖިލީހުގެ ރައީސްއާއި ރިޔާސަތް އަދި އިދިކޮޅު ޕީޕީއެމް މެންބަރުންނާއި ގުޅިގެން ކަމަށް މެންބަރުން ދަނީ ވިދާޅުވަމުންނެވެ.
