މެންޗެސްޓަރ ޔުނައިޓެޑުގެ ކޯޗުކަމުން އަލެކްސް ފާގަސަން ވަކިވި ފަހުން އެ ޓީމުގެ ކާމިޔާބަކީ "ސުމެއް" ކަމަށް ކްރިސްޓިއާނޯ ރޮނާލްޑޯ ބުނެފިއެވެ.

ރޮނާލްޑޯ މިހެން ބުނީ އޭނާ ޕިއާސް މޯގަން އަށް ދިން ޚާއްސަ އިންޓަވިޔުއެއްގައެވެ. ދެ ވަނަ ފަހަރަށް ރޮނާލްޑޯ ޔުނައިޓެޑާ ގުޅުނީ މިދިޔަ އަހަރުއެވެ. ނަމަވެސް ރޮނާލްޑޯ އަށް ޔުނައިޓެޑުގައި އެންމެ އެދެވޭ ކުޅުމެއް ނުދެއްކެއެވެ. އޭގެ ފަހުން ކުލަބް ދޫކޮށްލަން ބޭނުންވާކަން ހާމަކޮށް، ރޮނާލްޑޯ އާއި ޔުނައިޓެޑާ ދެމެދު އޮތީ މައްސަލަތަކެއް އުފެދިފައެވެ.

އެ އިންޓަވިޔުގައި ރޮނާލްޑޯ ބުނީ އޭނާ ޔުނައިޓެޑު ދެކެ ލޯބިވާ ކަމަށެވެ. އޭނާ ބުނީ ސަޕޯޓަރުން ދެކެ ވެސް ލޯބިވާ ކަމަށާއި، އެ މީހުން އަބަދު ވެސް ތިބެނީ އޭނާގެ ފަޅީގައި ކަމަށެވެ. ރޮނާލްޑޯ ބުނީ ޔުނައިޓެޑުގައި ބައިވަރު ގޯސް ކަންތައްތަކެއް ހުރި ކަމަށާއި، އެކަން ތަފާތު ކުރަން ބޭނުންނަމަ، އެތައް ކަމެއް ކުރަން ޖެހޭނެ ކަމަށެވެ. އޭނާ ބުނީ ފާގަސަން ޔުނައިޓެޑު ދޫކޮށްލި ފަހުން ޓީމަށް އެއްވެސް ކުރި އެރުމެއް ނުލިބޭ ކަމަށެވެ.

މީގެ އިތުރުން ރޮނާލްޑޯ ބުނީ ޔުނައިޓެޑު ކަހަލަ ބޮޑެތި ޓީމުތައް އޮންނަންވާނީ އެންމެ އުހުގައި ކަމަށެވެ. ރޮނާލްޑޯ ބުނީ އޭނާ މެންޗެސްޓަރ ސިޓީ އަށް ދިޔުމަކީ ވެގެން ނުވާނެ ކަމަށް ފާގަސަން އޭނާ ގާތު ބުނި ކަމަށެވެ. އަދި އޭނާ އެކަމަށް އާނއެކޭ ވެސް ބުނެފައިވާނެ ކަމަށެވެ.

ރޮނާލްޑޯ އާއި ޔުނައިޓެޑާ ދެމެދު ގިނަ މައްސަލަތަކެއް ޖެހިފައިވާއިރު، މިއީ ރޮނާލްޑޯ އާންމުކޮށް އެވާހަކަތައް ދެއްކި ފުރަތަމަ ފަހަރެވެ. މީގެ ކުރިން ރޮނާލްޑޯ އޭނާގެ ސޯޝަލް މީޑިއާގައި ބުނީ އޭނާއާ ގުޅޭ ގޮތުން ދައްކަނީ ތެދު ވާހަކަތަކެއް ނޫން ކަމަށާއި، އެކަމުގެ ހަގީގަތް ވަރަށް އަވަހަށް ހާމަކުރާނެ ކަމަށެވެ.

މީގެ އިތުރުން ރޮނާލްޑޯ ވަނީ ވޭން ރޫނީ އަށް ވެސް ރައްދު ދީފައެވެ. ރޫނީ މީގެ ކުރިން ބުނީ ރޮނާލްޑޯގެ އަމަލުތަކަކީ އެއްވެސް ވަރަކަށް ބަލައިގަނެވޭނެ ކަމެއް ނޫން ކަމަށެވެ. އެކަމާ ގުޅިގެން ރޮނާލްޑޯ ބުނީ، ރޫނީ ކެރިއަރު ނިންމާލައިގެން ހުރިއިރު، އަދި ވެސް އޭނާ އަންނަނީ ކުޅެމުން ކަމަށެވެ. އެއީ ރޫނީ ހިތްހަމަ ނުޖެހޭ ސަބަބަކަށް ވެދާނެ ކަމަށް ވެސް ރޮނާލްޑޮ ބުންޏެވެ.