އެސްޓަން ވިލާގެ އަތްދަށުވެ، ބްރައިޓަން ކުރިއަށް ޖެހިލަން ލިބުނު ފުރުސަތުގެ ބޭނުމެއް ނުހިފުނު
މެޗުން މޮޅުވެގެން ތާވަލުގެ ފަސްވަނައަށް ޖެހިލުމުގެ ފުރުސަތު ބްރައިޓަންއަށް އޮތް
ބްރައިޓަންއާއި އެސްޓަން ވިލާ ބައްދަލުކުރި މެޗުގެ ތެރެއިން
ފީފާ ވޯލްޑް ކަޕަށް ލީގު މެދުކަނޑާލުމުގެ ކުރިން، ލީގު ތާވަލުގެ ކުރިއަށް ޖެހިލަން ބްރައިޓަންއަށް ލިބުނު ފުރުސަތު ގެއްލިއްޖެއެވެ.
ބްރައިޓަންއަށް ފުރުސަތު ގެއްލުނީ ބްރޭކްގެ ކުރިން ކުޅުނު ފަހު މެޗުގައި އެސްޓަން ވިލާ އަތުން ބަލިވުމުންނެވެ. ބްރައިޓައިންގެ އަމިއްލަ ދަނޑުގައި ކުޅުނު މެޗު އެސްޓަން ވިލާ ކާމިޔާބުކުރީ 2-1ންނެވެ. މި މެޗުގައި ފުރަތަމަ ލަނޑު ޖަހައި ލީޑު ނެގީ ބްރައިޓަންއެވެ. މެޗުގެ އެއްވަނަ މިނެޓުގައި ބްރައިޓަންއަށް ލީޑު ނަގައިދިނީ އެލެކްސިސް މެކް އެލިސްޓާއެވެ.
ނަމަވެސް އެސްޓަންއިން ވަނީ މެޗުގެ 20 ވަނަ މިނެޓުގައި ލަނޑެއްް ޖަހައި ނަތީޖާ ހަމަހަމަކޮށްފައެވެ. އެސްޓަންއަށް ނަތީޖާ ހަމަހަމަކޮށްދިނީ ޑެނީ އިންގްސްއެވެ. މިއީ ލިބުނު ޕެނަލްޓީއަކުން އޭނާ ކާމިޔާބުކޮށްދިން ލަނޑެކެވެ. ދެވަނަ ހާފުގެ 54 ވަނަ މިނެޓުގައި އެސްޓަންއަށް ލީޑު ނަގައިދިނީވެސް ޑެނީއެވެ.
މެޗުން މޮޅުވެގެން ތާވަލުގެ ފަސްވަނައަށް ޖެހިލުމުގެ ފުރުސަތު ބްރައިޓަންއަށް އޮތެވެ. ނަމަވެސް މެޗުން ބަލިވުމުން އެޓީމު އޮތީ ތާވަލުގެ ހަތްވަނާގައި، 21 ޕޮއިންޓާއެކުއެވެ. މެޗުން މޮޅުވި އެސްޓަން ވިލާ އޮތީ 15 މެޗުން ލިބުނު 18 ޕޮއިންޓާއެކު ތާވަލުގެ 12 ވަނާގައެވެ.
