ޓީ20 ކްރިކެޓް ވޯލްޑް ކަޕްގެ ޗެމްޕިއަންކަން އިންގްލޭންޑް ހޯދައިފިއެވެ.
އިންގްލޭންޑުން މުބާރާތް ކާމިޔާބުކުރީ ފައިނަލް މެޗުގައި ޕާކިސްތާނު ބަލިކޮށްގެންނެވެ. އާދީއްތަ ދުވަހު ކުޅުނު ފައިނަލްގައި ފުރަތަމަ ކުޅެން ޖެހުނީ ޕާކިސްތާނަށެވެ. 20 އޯވަރު ހަމަވިއިރު ޕާކިސްތާނަށް ހެދުނީ 137 ލަނޑެވެ. ޖަވާބުގައި ކުޅެން އަރައި އިންގްލެންޑުން ވަނީ، 19 އޯވަރުގެ ތެރޭގައި ފަސް ކުޅުންތެރިން ނުބައިވިއިރު 138 ލަނޑު ހަމަކޮށް މެޗުން މޮޅުވެފައެވެ.
މިއީ އިންގްލޭންޑުން މި މުބާރާތް ކާމިޔާބުކުރި ދެވަނަ ފަހަރެވެ. ޓީ20 ކްރިކެޓް ވޯލްޑް ކަޕް އެންމެ ފުރަތަމަ ބޭއްވީ 2007 ވަނަ އަހަރުއެވެ. އޭގެ ފަހުން 2010 ވަނަ އަހަރު އޮތް މުބާރާތް އިންގްލޭންޑުން ވަނީ ކާމިޔާބުކޮށްފައެވެ. މިފަހަރުގެ މުބާރާތް ކާމިޔާބުކުރުމާއެކު އިންގްލޭންޑް ވެފައިވަނީ މުބާރާތް އެންމެ ގިނަ ފަހަރު ކާމިޔާބުކުރި ދެގައުމުގެ ތެރެއިން އެއްގައުމަށެވެ. މީގެ ކުރިން ވެސްޓް އިންޑީޒްވެސް ވަނީ ދެފަހަރުގެ މަތިން މި މުބާރާތް ކާމިޔާބުކޮށްފައެވެ. އެޓީމުން މުބާރާތް ކާމިޔާބުކުރީ 2012 އަދި 2016 ވަނަ އަހަރުއެވެ.
