މަސްތުވާތަކެއްޗާއެކު ޕާޓީކުރަން ތިބި ބަޔަކު ހައްޔަރުކުރީ ޝާހިދުގެ ގެއިން ކަމަށް ދިޔަރެސްގައި ލިޔުނީ މިނިސްޓަރުގެ އަބުރުފުޅު ކަތިލުމުގެ ނިޔަތުގައި - ފޮރިން މިނިސްޓްރީ
ފުލުހުންގެ ޚިދުމަތުން ދީފައިވާ ސައްހަ މައުލޫމާތުން އެނގޭގޮތުގައި، މިއީ މިނިސްޓަރ ޝާހިދުއާ އެއްވެސް މިންވަރަކަށް ގުޅުންހުރި ކަމެއް ނޫން
ފޮރިން މިނިސްޓަރ އަބްދުﷲ ޝާހިދު
މަސްތުވާތަކެއްޗާއެކު ޕާޓީކުރަން ތިބި ބަޔަކު ހައްޔަރުކުރީ އަބްދުﷲ ޝާހިދުގެ ގެއިން ކަމަށް ދިޔަރެސްގައި ލިޔެފައިވަނީ މިނިސްޓަރުގެ އަބުރުފުޅު ކަތިލުމުގެ ނިޔަތުގައި ކަމަށާއި، އެއީ ހަގީގަތާ ޚިލާފު ވާހަކަތަކެއް ކަމަށް ފޮރިން މިނިސްޓްރީން ބުނެފިއެވެ.
ފޮރިން މިނިސްޓްރީން ނެރުނު ނޫސް ބަޔާނުގައި ބުނެފައިވަނީ، 12 ނޮވެމްބަރ 2022 ވަނަ ދުވަހުގެ ރޭގަނޑު 7:39ގައި ދިޔަރެސް ނޫހުގައި ޝާއިއުކޮށްފައިވާ "މަސްތުވާތަކެއްޗާއެކު ޕާޓީކުރަން ތިއްބައި ހައްޔަރުކުރި 12 މީހަކު ހައްޔަރުކުރީ އަބްދުﷲ ޝާހިދުގެ ގެއިން" ކަމަށް ލިޔެފައިވާ ޚަބަރުގައިވާ މައުލޫމާތުތަކަކީ ކަނޑައެޅިގެން ހަގީގަތާ ޚިލާފް ދޮގު މައުލޫމާތު ހިމަނައިގެން ލިޔެފައިވާ ޚަބަރެއް ކަމުގައެވެ. މިއީ ދިވެހި ރައްޔިތުންނަށް ސީދާ އޮޅުވާލުމުގެ މަގުސަދުގައި، އަދި މިނިސްޓަރ ޝާހިދު ބަދުނާމުކޮށް، އެމަނިކުފާނުގެ އަބުރުފުޅު ކަތިލުމުގެ ނިޔަތުގައި، "ދިޔަރެސް" ނޫހުގައި ޝާއިއުކޮށްފައިވާ ހަގީގަތާ ޚިލާފު ދޮގު ޚަބަރެއް ކަމަށެވެ.
މިނިސްޓްރީން ބުނީ، ކަން ހިނގާފައިވާ ގޮތަށް ބަލާއިރު، އަދި ދިވެހި ފުލުހުންގެ ޚިދުމަތުން ދީފައިވާ ސައްހަ މައުލޫމާތުން އެނގޭގޮތުގައި، މިއީ މިނިސްޓަރ ޝާހިދުއާ އެއްވެސް މިންވަރަކަށް ގުޅުންހުރި ކަމެއް ނޫންކަމާއި އަދި އެކަން ހިނގާފައިވަނީ މިނިސްޓަރ ޝާހިދުއާ އެއްވެސް ވަރަކަށް ގުޅުންހުރި އިމާރާތެއްގައި ނޫންކަން ވަރަށް ސާފުކޮށް އެނގޭ ކަމަށެވެ.
ފުލުހުންގެ ފަރާތުން ލިބުނު މައުލޫމާތުގެ އަލީގައި، މި ޚަބަރުގައިވާ މައުލޫމާތަކީ ދޮގު މަޢުލޫމާތެއްކަން އެނގިގެން، މި މިނިސްޓްރީގެ ފަރާތުން އެ ޚަބަރަކީ ހަގީގަތާ ޚިލާފް، ދޮގު މައުލޫމާތު ހިމެނޭ ޚަބަރެއްކަން ނޫހުގެ ކިޔުންތެރިންނާއި ދިވެހި ރައްޔިތުންނަށް އޮޅުން ފިލުވައިދީ، ކަން ހިނގި ގޮތުގެ އަސްލު ހޯދައި، ހާމަކޮށްދިނުމަށް ދިޔަރެސް ނޫހުގައި އެދިފައި ވާނެކަމަށް ފޮރިން މިނިސްޓްރީން ވަނީ ބުނެފައެވެ. ނަމަވެސް ދިޔަރެސް ނޫހުން މިކަމަށް އިޖާބަ ނުދޭ ކަމަށާއި، ތަކުރާރުކޮށް މިމިނިސްޓްރީން ގުޅުމުން ފޯނަށް މިހާރު ޖަވާބެއް ވެސް ނުދޭ ކަމަށް ފޮރިން މިނިސްޓްރީން ބުނެއެވެ.
މިކަމުން ވެސް އެނގި ޔަގީން ވަނީ މި ދޮގު ޚަބަރު ދިޔަރެސް ނޫހުގައި ޝާއިއުކުރީ، ވަކި ސިޔާސީ މަގުސަދެއް ހާސިލް ކުރުމުގެ ނިޔަތުގައި ކަމަށާއި، މިއީ ދެފުށް ފެންނަ މިނިވަން ޕްރޮފެޝަނަލް ނޫސްވެރިކަމެއް ކުރިއަށް ގެންދިއުމަށް މި ސަރުކާރުން ނޫސްވެރިންނަށް ދީފައިވާ މިނިވަންކަމުގެ ނިވަލުގައި ތިބެ، އެމިނިވަންކަން ނަހަމަގޮތުގައި ބޭނުންކޮށްގެން ދިޔަރެސް ނޫހުން ހިންގި ވަރަށް ނާތަހުޒީބު ފިނޑި އަމަލެއް ކަމަށް ފޮރިން މިނިސްޓްރީން ވަނީ ބުނެފައެވެ. އަދި މި ކަންކޮށްފައި ވަނީ ޒާތީ ތައައްސުބް އިސްކޮށް، ސިޔާސީ މަންފާއެއް ހޯދުމުގެ ވިސްނުމުގައި ކަމަށް ފޮރިން މިނިސްޓްރީން ބުނެއެވެ.
މިޚަބަރާ ގުޅިގެން މި މިނިސްޓްރީގެ ޕަބްލިކް އިންފޮމޭޝަން ޔުނިޓުން މިހާރު ވަނީ މިމައްސަލަ އިތުރަށް ތަހުގީގުކޮށް އެކަށީގެންވާ ފިޔަވަޅު އަޅައިދިނުމަށް އެދި މޯލްޑިވްސް ބްރޯޑްކާސްޓިންގ ކޮމިޝަނުގައި ރަސްމީކޮށް ލިޔުމުން އެދިފައިކަމަށް ފޮރިން މިނިސްޓްރީން ބުނެއެވެ.
މި ޚަބަރު ރަނގަޅުކޮށް، ކިއުންތެރިންގެ ކިބައިން މައާފަށް އެދި، ކުރިމަގުގައި މިފަދަ ދޮގު ޚަބަރު ޝާއިއުނުކޮށް، ޕްރޮފެޝަނަލް ނޫސްވެރިންގެ ގޮތުގައި ނޫސްވެރިކަން ކުރުމަށް ދިޔަރެސް ނޫހަށް މިނިސްޓްރީން ވަނީ އިލްތިމާސްކޮށްފައެވެ.
