ވިޒިޓް މޯލްޑިވްސްއިން އިނގިރޭސިވިލާތުގައި ރޯޑްޝޯތަކެއް ފަށައިފި
12 ނޮވެމްބަރު 2022 | ހޮނިހިރު 04:50އެންމެ ފަހު ރޯޑްޝޯ ފަށާފައިވަނީ ނޮވެމްބަރު 11ގައި
އިނގިރޭސިވިލާތުގައި ކުރިއަށްގެންދިޔަ ރޯޑްޝޯއެއްގައި ރާއްޖޭގެ ސްޓޭންޑް
އިނގިރޭސިވިލާތުގެ މާކެޓުގައި ރާއްޖޭގެ މަގުބޫލުކަން އިތުރުކޮށް، ދެމެހެއްޓުމަށް ކުރަމުންދާ މަސައްކަތުގެ ދަށުން މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ން، އެ ގައުމުގެ ތިން ސިޓީއެއްގައި ޚާއްސަ ރޯޑްޝޯތަކެއް ފަށައިފިއެވެ.
މި ސިލްސިލާ ރޯޑްޝޯތަކުގެ ފުރަތަމަ ޝޯ އޮތީ ޑަބްލިއުޓީއެމް 2022ގެ އެންމެ ފަހު ދުވަހާ ދިމާކޮށް 9 ނޮވެމްބަރުގައި ލަންޑަންގައެވެ. އަދި ދެވަނަ ރޯޑްޝޯ ބާއްވާފައިވަނީ 10 ނޮވެމްބަރުގައި މެންޗެސްޓަރގައެވެ. މި ސިލްސިލާގެ އެންމެ ފަހު ރޯޑްޝޯ ފަށާފައިވަނީ ނޮވެންބަރު މަހުގެ11 ވަނަ ދުވަހު ނިއުކާސަލްގައެވެ.
"ކަނެޓް ވިތު މޯލްޑިވްސް، ޔޯރ އަލްޓިމޭޓް ޑެސްޓިނޭޝަން"ގެ ނަމުގައި ކުރިއަށްގެންދާ މި ރޯޑްޝޯތަކަކީ އިނގިރޭސިވިލާތުގެ ޓްރެވަލް ޓްރޭޑާ އޮތް ގުޅުން އިތުރަށް ބަދަހިކޮށް، ފަތުރުވެރިކަމުގެ މަންޒިލެއްގެގޮތުގައި ރާއްޖެއާ ބެހޭގޮތުން އެ ފަރާތްތައް އަހުލުވެރިކޮށް، މި މާކެޓުން ރާއްޖެއަށް އަންނަ ފަތުރުވެރިންގެ އަދަދާއި ބުކިންގތައް އިތުރުކުރުމުގެ ބޭނުމުގައި ކުރިއަށްގެންދާ ހަރަކާތެކެވެ. މި ރޯޑްޝޯތަކުގައި ރާއްޖޭގެ ފަތުރުވެރިކަމުގެ އިންޑަސްޓްރީން ލަންޑަންގައި ބޭއްވި ރޯޑްޝޯގައި ޖުމުލަ 12 ކުންފުންޏަކުން ބައިވެރިވެ، މެންޗެސްޓަރއާއި ނިއުކާސަލްގައި ބާއްވާ ރޯޑްޝޯތަކުގައި 11 ކުންފުންޏަކުން ބައިވެރިވެއެވެ. މި ހަރަކާތުގައި ރާއްޖޭގެ ފަތުރުވެރިކަމުގެ ޕްރޮޑަކްޓްތައް ކަމަށްވާ; ރިސޯޓް، ހޮޓެލް، ގެސްޓްހައުސް އަދި ލިވަބޯޑްތައް އިތުރަށް އިޝްތިހާރުކޮށް، މަންޒިލްގެ އެންމެ ފަހުގެ މައުލޫމާތުތައް ހިއްސާކުރާނެއެވެ. އަދި ގުދުރަތީގޮތުން ރާއްޖޭގެ ރަށްތައް އުފެދިފައިވާ ގޮތާއި، ރާއްޖެއިން ފަތުރުވެރިންނަށް ލިބެން ހުރި ތަފާތު ތަޖުރިބާތައް އެމްއެމްޕީއާރުސީއާއި އިންޑަސްޓްރީގެ ބައިވެރިން މާކެޓްކުރާނެވެ.
މި ރޯޑްޝޯތައް ކުރިއަށްދާގޮތަށް ބަލާއިރު، ހަރަކާތް ފެށެނީ މަންޒިލާއި އިންޑަސްޓްރީ ޕާޓްނަރުންގެ ތަޢާރަފަކާއެކުއެވެ. އެއަށްފަހު ރާއްޖެއާބެހޭ ޚާއްސަ ޕްރެޒެންޓޭޝަނެއް ބައިވެރިންނަށް ދައްކާލައެވެ. މި ޕްރެޒެންޓޭޝަންގައި ރާއްޖެއިން ފަތުރުވެރިންނަށް ލިބެންހުރި ތަފާތު ތަޖުރިބާތަކާއި، މަންޒިލާގުޅޭ އެންމެ ފަހުގެ ޓްރެވަލް ގައިޑްލައިންތަކަށް އަލިއަޅުވާލައެވެ. އަދި ރާއްޖޭގެ ޖަޒީރާ ރަށްތަކުން ފަތުރުވެރިންނަށް ލިބޭ ރައްކާތެރިކަންވެސް ރޯޑްޝޯ ސިލްސިލާގައި އިޝްތިހާރު ކުރެއެވެ. ނިންމާލުމުގެ ކުރިން ކޮންމެ ރޯޑްޝޯއެއްގައި ވެސް ޚާއްސަ ގުރުއަތެއް ނަގައި، ނަސީބުވެރި ދެ ފަރާތަކަށް ރާއްޖޭގައި ހިލޭ ޗުއްޓީ ހޭދަކުރުމުގެ ފުރުސަތު ހަދިޔާކުރެއެވެ.
މި ރޯޑްޝޯތަކުގެ ބޭނުމަކީ އިނގިރޭސިވިލާތް ރާއްޖޭގެ މުހިންމު އެއް ސޯސް މާކެޓެއްގެ ގޮތުގައި ދެމެހެއްޓުމާއި، މި މާކެޓުގެ ޓްރެވަލް އޭޖެންޓުންނާ އިންޑަސްޓްރީގެ ޕާޓްނަރުންނާ ދެމެދު އޮތް ވިޔަފާރީގެ ގުޅުންތައް އިތުރަށް ބަދަހިކުރުމެވެ. މިއީ އިނގިރޭސިވިލާތަށް އެމްއެމްޕީއާރުސީން ގެންގުޅޭ މާކެޓިންގ ސްޓްރެޓެޖީގެ ދަށުން ކުރިއަށްގެންދާ ހަރަކާތެކެވެ. އިނގިރޭސިވިލާތަކީ ރާއްޖޭގެ ޓްރެޑިޝަނަލް އެއް ސޯސް މާކެޓަށްވާއިރު، މި އަހަރުގެ ނޮވެމްބަރު މަހުގެ 2 ވަނަ ދުވަހާ ހަމައަށް 147،535 އެރައިވަލްސްއާއެކު، މިއީ ރާއްޖެއަށް ތިން ވަނައަށް އެންމެ ގިނައިން ފަތުރުވެރިން މި އަހަރު ޒިޔާރަތްކުރި މާކެޓެވެ. މިއީ މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވާ ޖުމްލަ 1،354،828 ފަތުރުވެރިންނަށް ބަލާއިރު މާކެޓް ހިއްސާގެ %10.9 އެވެ. އެމްއެމްޕީއާރުސީން އަންނަނީ މި މާކެޓަށް އަމާޒުކޮށްގެން މަންޒިލްގެ މަގުބޫލުކަން ދަމަހައްޓައި އިތުރުކުރުމަށް ގިނަ ހަރަކާތްތައް ހިންގަމުންނެވެ. މީގެތެރޭގައި އިނގިރޭސިވިލާތުގެ ބާޒާރުގައި ބާއްވާ ފެއަރތަކާއި މައުރަޒުތަކުގައި ބައިވެރިވުން، މާކެޓިންގ ކެމްޕޭންތައް، އަދި ސޯޝަލް އަދި ޑިޖިޓަލް މީޑިއާ މާކެޓިންގ ކެމްޕޭންތައް ހިމެނެއެވެ. އަދި ކުރިއަށް އޮތް މަސްތަކުގައިވެސް މި މާކެޓުގައި މިފަދަ ގިނަ ހަރަކާތްތަކެއް ހިންގުމަށް ވަނީ ރާވާފައެވެ.
