2-1 ން ކާޑިޒް ބަލިކޮށް, ވޯލްޑްކަޕްގެ ކުރިން ރެއާލް މެޑްރިޑުން އެއްވަނާގައި އޮތް ބާސެލޯނާއާ ދެމެދު އޮތް ފަރަޤު ކުޑަކޮށްފިއެވެ.

ލަލީގާ ތާވަލްގެ އެއްވަނާގައި އޮތް ބާސެލޯނާއާ ރެއާލް މެޑްރިޑާ ދެމެދު މިހާރު އޮތީ ދެ ޕޮއިންޓްގެ ފަރަގެކެވެެ. ލީގު މެދުކަނޑާލުމުގެ ކުރިން ކުޅުނު ފަހު މެޗު ރެއާލްގެ ދަނޑުގައި ކުޅެ މޮޅުވީ އުނދަގުލުންނެވެ. ފުރަތަމަ ލަނޑު ފުރަތަމަ ހާފް ނިމެން ފަސް މިނެޓަށް ވެފައިވަނިކޮށް އެޑާ މިލިޓާއޯ ޖެހީ ޓޯނީ ކްރޫޒް ނަގައިދިން ހިލޭ ޖެހުމަކުންނެވެ. އެ ލަނޑު ރެފްރީ ޤަބޫލުކުރީ އޮފްސައިޑްތޯ ވީއޭއާރުން ބެލުމަށްފަހުއެވެ. ދެ ވަނަ ލަނޑު ދެވަނަ ހާފްގައި ޖެހީ ކްރޫޒްއެވެެ. ރެއާލްއިން ދެ ލަނޑު ޖެހި ފަހުން ކާޑިޒްގެ ޕެރޭޒް ލަނޑެއް ޖަހާ ފަރަޤު ކުޑަކުރިއެވެ.

ކޮންމެ ޓީމެއް 14 މެޗު ލީގުގައި ކުޅުނުއިރު އެއްވަނައިގައި ބާސެލޯނާ އޮތީ 37 ޕޮއިންޓާއެކުއެވެ. ދެވަނައިގައި ރެއާލް މެޑްރިޑް އޮތީ 35 ޕޮއިންޓާއެކުއެވެ. ނުވަ ޕޮއިންޓް ފަހަތުން ތިންވަނައިގައި އޮތީ ރެއާލް ސޮސިއެޑާޑްއެވެ. ރެއާލް އަތުން ބަލިވި ކާޑިޒް އަކީ ރެލިގޭޝަން ޒޯންގައި އޮތް ޓީމެކެވެ. ލީގު އަލުން ފަށާނީ ޑިސެމްބަރު 31 ގައެވެ.