ޤައުމީ ބިލިއާޑް މުބާރާތުގެ ޑަބަލްސް އިވެންޓުގެ ޗެމްޕިއަންކަން ޙަސަން ޝާޒް މުހައްމަދު އަދި އަޙުމަދު އިޔާދުގެ ޕެއާ އިން ހޯދައިފިއެވެ.

މި ޕެއާ އިން ޗެމްޕިއަންކަން ހޯދީ ބުދަ ދުވަހުގެ ރޭ ކުރިއަށް ދިޔަ ފައިނަލްގައި އިސްމާއީލް ރަޒީން އަދި ޙަސަން ޝަފްރާޒްގެ ޕެއާގެ މައްޗަށް ކުރި ހޯދައިގެންނެވެ. ފައިނަލްގައި ޝާޒް އަދި އިޔާދުގެ ޕެއާ ވަނީ 9-4 އިން ރަޒީން އަދި ޝަފްރާޒް ބަލިކޮށްފައެވެ.

މިއަހަރުގެ ޤައުމީ ބިލިއާޑް މުބާރާތުގެ ޑަބަލްސް އިވެންޓުގައި ޖުމުލަ ވަނީ 35 ޕެއާއަކުން ވާދަކޮށްފައެވެ. އެއީ އަންހެން އެއް ޕެއާ އާއި 34 ފިރިހެން ޕެއާއެވެ.

މުބާރާތުގެ ކުޅުން ބުރާސްފަތި ދުވަހުގެ ރޭ ވެސް ކުރިއަށްދާނެއެވެ. ބުރާސްފަތި ދުވަހުގެ ރޭ ކުރިއަށްދާނީ މިކްސް ޑަބަލްސް އިވެންޓުގެ މެޗުތަކެވެ. މި އިވެންޓުގައި 10 ޕެއާއަކުން ވާދަކުރެއެވެ.

މިއަހަރުގެ މުބާރާތުގައި މިހާރު ވަނީ ސިންގަލްސް އިވެންޓުތައް ވެސް ނިމިފައެވެ. މިއަހަރުގެ ފިރިހެން ސިންގަލްސްގެ ޗެމްޕިއަންއަކީ މުޙައްމަދު ސާހިލްއެވެ. އަދި އަންހެން ޗެމްޕިއަންއަކީ އައިޝަތު އަލީއެވެ.