މިސްރުގެ އެހީގައި އަރަބި ބަހުގެ ތަމްރީނުދޭ މަރުކަޒެއް ރާއްޖޭގައި ޤާއިމުކުރަން މަޝްވަރާކޮށްފި
9 ނޮވެމްބަރު 2022 | ބުދަ 17:35ކުރު މުއްދަތުގެ ތަމްރީނާއި ސްކޮލަރޝިޕްގެ ފުރުސަތުތަކާއި މުދައްރިސުން ހަމަޖައްސަވައިދެއްވާނެ ކަމަށް ގްރޭންޑް އިމާމް ވިދާޅުވި
ނައިބު ރައީސް އަޒްހަރު ޔުނިވަރސިޓީއަށް ޒިޔާރަތް ކުރެއްވުން
ރައީސުލްޖުމްހޫރިއްޔާގެ ނައިބު ފައިޞަލް ނަސީމް، އަލްއަޒްހަރު އަލް ޝާރިފްގެ ގްރޭންޑް އިމާމް ޕްރޮފެސަރ ޝައިޚް އަޙްމަދު އަލްޠައްޔިބާއި ބައްދަލުކުރައްވައިފިއެވެ.
މި ބައްދަލުކުރެއްވުމުގައި ގްރޭންޑް އިމާމް ވަނީ ދިވެހިރާއްޖެއަށް ކުރު މުއްދަތުގެ ތަމްރީނާއި ސްކޮލަރޝިޕްގެ ފުރުސަތުތަކާއި މުދައްރިސުން ހަމަޖައްސަވައިދެއްވާނެ ކަމަށް ވިދާޅުވެފައެވެ. ނައިބު ރައީސް، މިސްރަށް މިހާރު ކުރައްވަމުން ގެންދަވާ ދަތުރުފުޅަކީ މިސްރުގެ ޝަރުމް އަލް ޝެއިޚްގައި ކުރިއަށްދާ މިއަހަރުގެ އދ. ގެ މޫސުމަށް އަންނަ ބަދަލުތަކާ ބެހޭ ކޮންފަރެންސްގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.
ކައިރޯގައި ކުރިއަށްދިޔަ މި ބައްދަލުކުރެއްވުމުގައި، ނައިބު ރައީސް ދެއްކެވި ވާހަކަފުޅުގައި، ދިވެހިރާއްޖެ އާއި މިސްރާއި ދެމެދު އޮތް ޒަމާންވީ ގާތް ގުޅުމުގެ އަގު ދިވެހިރާއްޖެއިން ވަރަށް ބޮޑަށް ވަޒަންކުރައްވާކަމުގައި ވިދާޅުވިއެވެ. އަދި އެމަނިކުފާނު ވަނީ ދެ ޤައުމުގެ ދެމެދުގައި ވާ ގާތް ރަޙްމަތްތެރިކަމުގެ ގުޅުމުގެ މައްޗަށް އަލިއަޅުއްވާލައްވައި، އިސްލާމީ އަދި ސަގާފީ އަހުލާގާއި، ތާރީޚީ ގުޅުން ފާހަގަކުރައްވާފައެވެ.
މި ބައްދަލުވުމުގައި، ނައިބު ރައީސްއާ ގްރޭންޑް އިމާމް ވަނީ މަތީ ތަޢުލީމާއި އިންސާނީ ވަސީލަތް ތަރައްގީ ކުރުމާއި އިމާމުން ތަމްރީނު ކުރުމާއި ހަރުކަށި ފިކުރާއި، ހަރުކަށި ފިކުރާ ދެކޮޅަށް ކުރާ މަސައްކަތާ ބެހޭ ގޮތުން ދެ ޤައުމުގެ މަސްލަޙަތު ހިމެނޭ ތަފާތު މައުޟޫތަކަށް މަޝްވަރާ ކުރައްވާފައެވެ. އަދި މިޞްރުގެ އެހީގައި އަރަބި ބަހުގެ ތަމްރީނުދޭ މަރުކަޒެއް ރާއްޖޭގައި ޤާއިމުކުރުމާ ބެހޭގޮތުންވެސް ވަނީ މަޝްވަރާކުރައްވާފައެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ނައިބު ރައީސް ވަނީ އިޖްތިމާއީ، އިގްތިސާދީ އަދި އިންސާނީ ވަސީލަތް ތަރައްޤީކުރުމުގެ ރޮނގުން މިޞްރު ސަރުކާރުން ވެދެއްވަމުން ގެންދަވާ އެހީތެރިކަމަށް ޝުކުރު އަދާކުރައްވާފައެވެ. އަދި އެމަނިކުފާނު ވަނީ އަލްއަޒްހަރު ޔުނިވަރސިޓީއަކީ ރާއްޖޭގެ ތަޢުލީމީ ދާއިރާގައި އިސްދައުރެއް އަދާކުރަމުން އަންނަ ޔުނިވަރސިޓީއެއްކަމަށާއި، 1980ގެ އަހަރުތަކުގެ ކުރީކޮޅުން ފެށިގެން ކޮންމެ އަހަރަކުވެސް ދިވެހި ދަރިވަރުންނަށް ދިގު މުއްދަތުގެ ސްކޮލަރޝިޕްތައް ދެމުން އަންނަތަނެއްކަމުގައި ފާހަގަކުރައްވާފައެވެ.
މީގެ އިތުރުން ނައިބު ރައީސް ވާހަކަފުޅުގައި މިސްރާއި އެކު ބައިނަލްއަޤްވާމީ ގޮތުންނާއި ދޭދޭގޮތުން ގުޅިގެން ހަރުކަށި ފިކުރާ ދެކޮޅަށް އެކުގައި މަސައްކަތްކުރެއްވުމަށް ދިވެހިރާއްޖެއިން އުންމީދުކުރައްވާކަމުގައި ވިދާޅުވިއެވެ. އަދި ގްރޭންޑް އިމާމް ވަނީ ދިވެހިރާއްޖެއަށް ވަޑައިގަތުމަށް، އެމަނިކުފާނު ދެއްވި ދައުވަތު ވެސް ގަބޫލުކުރައްވައިފައެވެ.
