އުފެދުމުގައިވެސް އެއްފައިގެ ބައެއް މަދު އަހުމަދު ޝަވަން މުހައްމަދަށް ފައެއް ޖަހައިދިނުމަށް ސަރުކާރުގެ ފަރާތުން އެހީތެރިކަން ފޯރުކޮށްދޭން ނިންމާފައިވާ ކަމަށް ޝަވަންގެ މަންމަ އައިޝަތު ވިޝާހް ބުނެފިއެވެ.
ޝަވަންއަކީ އުފެދުމުގައިވެސް ފައިގެ ކަކުލުހުޅުން ތިރި ނެތް ކުއްޖެކެވެ. އުމުރުން މިހާރު ހަތް އަހަރުވެފައިވާ ޝަވަންއަށް މިގޮތަށް ދިމާވީ ދުވަސްނުފުރާ ވިހެމުގެ ސަބަބުން ކަމަށް އޭނާގެ މަންމަ ވަނީ ބުނެފައެވެ. ނަމަވެސް ޝަވަން އަންނަނީ އޭނާގެ ކުރިމަގު އުޖާލާކުރުމަށް އާއިލާގެ އެހީތެރިކަމާއެެކު ނުހަނު ބުރަ މަސައްކަތް ކުރަމުންނެވެ.
މިފަހުން ސޯޝަލް މީޑިއާގައި ވަނީ އޭނާ ފުޓްބޯޅަ ކުޅޭ މަންޒަރުތަކެއް އާންމުވެފައެވެ. ގިނަ ބައެއްގެ ލޮލުގައި އޭނާ އަޅައިގަތީ އެހިސާބުންނެވެ. މިއާއެކު ޝަވަންގެ އާއިލާއިން އެދެމުން ދިޔައީ އޭނާއަށް ފައެއް ޖަހައިދިނުމަށް އެހީތެރިވުމަށެވެ.
ޝަވަން އާއި އޭނާގެ އާއިލާގެ އުންމީދުތައް ފުރިހަމަކޮށްދިނުމަށް އަދުގެ ސަރުކާރުން މިހާރު ވަނީ ނިންމާފައެވެ. އެގޮތުން ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)، އެޑިއުކޭޝަން މިނިސްޓްރީ އަދި ޖެންޑަރ މިނިސްޓްރީގެ އިތުރުން އެދާއިރާގެ މެމްބަރުވެސް މިކަމަށް އެހީތެރިވުމަށް ނިންމާފައިވާކަމަށް ޝަވަންގެ މަންމަ ބުންޏެވެ. ރާއްޖެޓީވީއަށް ދިން އިންޓަރވިއުއެއްގައި ޝަވަންގެ މަންމަ ބުނީ މި އިދާރާތަކުގެ އެދުމަށް ޑޮކްޓަރުގެ ލިޔެކިޔުންތައްވެސް މިހާރު ވާނީ އެއިދާރަތަކަށް ފޮނުވާފައި ކަމަށެވެ.
