ހދ. މަކުނުދޫގައި ވައްކަމާއި ފޭރުން ފަދަ ކަންކަން އިތުރުވެފައިވާތީ އެރަށު ކައުންސިލުން ކަންބޮޑުވުން ފާޅުކޮށްފިއެވެ.
ހޯމަ ދުވަހު ނެރުނު ނޫސްބަޔާނެއްގައި އެރަށު ކައުންސިލުން ބުނީ މަކުނުދޫގައި ވައްކަމާއި ފޭރުން ފަދަ ކުށްތައް އިތުރުވެ، ރައްޔިތުންގެ މުދަލާއި ރައްކާތެރިކަން ގެއްލި ރައްޔިތުންގެ ކަންބޮޑުވުން އެކަމުގައި އިންތިހާއަށް އެބައޮތް ކަމަށެވެ. އަދި މިވަގުތު މަކުނުދޫގައި އަމާންވެއްޓެއް ޤާއިމުވެފައި ނެތްކަމަށެވެ. މި ހާލަތަކީ ރައްޔިތުން އިތުރަށް ސަމާލުވެ، ރައްޔިތުންގެ މުދަލަށް އިތުރަށް ރައްކާތެރިވާން ޖެހޭނެ ވަގުތެއް ކަމަށް ބަޔާނުގައި ވަނީ ފާހަގަކޮށްފައެވެ.
މަކުނުދޫގައި މިފަދަ ކުށްތައް ތަކުރާރުވެ އެދެވޭ ހައްލެއް މިއަދާއި ހަމައަށް ވެސް ލިބިފައިނުވާތީ، އެ ރަށުގައި އަމާންވެއްޓެއް ޤާއިމު ކުރުމަށް މި ހިނދުން ހިނދަށް ކުރަން ޖެހޭ އެންމެހާ މަސައްކަތްތައް ކުރުމަށް ކަމާއި ބެހޭ މުއައްސަސާތަކަށް އެ ކައުންސިލުން ވަނީ ގޮވާލާފައެވެ.
