ޗައިނާއާއެކު 30 އެއްބަސްވުންވި، އޭގެތެރޭގައި މަކުނުދޫއާއި ގުޅޭ އެއްބަސްވުމެއް އެބައޮތް، އެކަން ހާމަކުރޭ - ފައްޔާޒް
މަކުނުދޫއާއި ގުޅޭގޮތުން ޗައިނާއާ އެކު އެއްބަސްވުމެއްގައި ސޮއިކޮށްފައިވޭ
އެމްޑީޕީގެ ޗެއަރޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް
މި ސަރުކާރުން ޗައިނާއާ އެކު 30 އެއްބަސްވުމެއްގައި ސޮއިކޮށްފައިވާ ކަމަށާއި، ނަމަވެސް މައުލޫމާތު ހާމަކުރީ 20 އެއްބަސްވުމެއްގެ ކަމުން، ބާކީ 10 އޮތް އެއްބަސްވުމުގެ ތަފްސީލް ހާމަކުރަންޖެހޭ ކަމަށް އެމްޑީޕީގެ ޗެއަރޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެއެވެ.
ފައްޔާޒް ވިދާޅުވީ އެމްޑީޕީގެ ސަރުކާރުގައި އިންޑިއާއާ އެކު 100 އެއްބަސްވުމެއްގައި ސޮއިކޮށްފައިވާ ވާހަކަ ވަރަށް ބޮޑު ވަރަށް ބިރުވެރި ވާހަކައަކަށް ވެގެން އުޅުނު ތަން ދެކިވަޑައިގެންނެވި ކަމަށެވެ. ނަމަވެސް ދެ މަސް ވެސް ނުވަނީސް، މި ސަރުކާރުން 20 އެއްބަސްވުމެއްގައި ސޮއިކޮށްފައިވާ ކަމަށާއި، އެއީ އެމްޑީޕީގެ ވެރިކަމުގެ 5 އަހަރު ތެރޭގައި ސޮއިކުރި އަދަދުގެ 5 ބައިކުޅަ އެއްބައި ކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ ރައީސް މުއިއްޒުގެ ސަރުކާރުން ޗައިނާ އާއެކު ސޮއިކުރީ ހަމައެކަނި 20 އެއްބަސްވުމެއްގައި ނޫން ކަމަށެވެ. ނަމަވެސް ޖުމްލަ 30 އެއްބަސްވުމެއްގައި ސޮއިކޮށްފައިވާ ކަމަށާއި، މި ވާހަކަފުޅު ވިދާޅުވަނީ އެކަން އެނގިވަޑައިގެން ހުންނަވާ ކަމަށެވެ. އަދި 20 އެއްބަސްވުމެއްގެ ވާހަކަ މި ސަރުކާރުން ދައްކާއިރު، އިތުރަށް ސޮއިކުރި 10 އެއްބަސްވުމުގައި އޮތް އެއްޗެއް އެއްވެސް މީހަކަށް ނޭނގޭ ކަމަށް ފައްޔާޒް ވިދާޅުވިއެވެ.
އެގޮތުން މަކުނުދޫއާއި ގުޅޭގޮތުން ޗައިނާއާ އެކު އެއްބަސްވުމެއްގައި މި ސަރުކާރުން ސޮއިކޮށްފައިވާ ކަމަށާއި، އެއީ 30 އެއްބަސްވުމުގެ ތެރެއިން ހާމަނުކުރާ އެއްބަސްވުމެއް ކަމަށް ފައްޔާޒު ވިދާޅުވިއެވެ.
ފައްޔާޒުގެ ވާހަކަފުޅުގައި އޭނާ ވަނީ ޓްރާންސްޕޭރެންޓް ވާނެކަމަށާއި ހުރިހާ މައުލޫމާތެއް ސާފުކޮށްދޭނެކަމަށް ވިދާޅުވި ބޭފުޅުންގެ ހާލަތާ މެދު ސުވާލުކުރައްވާފައެވެ. އަދި ޗައިނާ ދަތުރާ ގުޅޭ ނޫސްވެރިންގެ ބައްދަލުވުމެއް ނުބޭއްވޭއިރު، ފުރިހަމަ މައުލޫމާތު ވެސް ނުދެވޭކަމަށް ފައްޔާޒް ވިދާޅުވިއެވެ.
ފައްޔާޒު ވިދާޅުވީ ބައެއް އެއްބަސްވުންތަކަކީ ހުރިހާ ރައްޔިތުން ހާމަކުރެވޭނެ އެއްޗެއް ނޫން ކަމަށާއި، ދައުލަތެއްގެ ސިފަ ހުންނަންޔާ އެފަދަ އެއްބަސްވުންތައް ނުދެއްކޭނެ ކަމަށެވެ. ނަމަވެސް އެމްޑީޕީ ސަރުކާރުން އެ އެއްބަސްވުމެއް ނުދެއްކުމުން، އެ ހާމަކުރައްވާނެކަމަށް ވިދާޅުވެ ވެރިކަމަށް ވަޑައިގެންނެވި ބޭފުޅުން ޖެހިވަޑައިގަންނަވާނީ އެ އެއްބަސްވުންތައް ދައްކަވަން ކަމަށެވެ.
