އިންސާނިއްޔަތަށް މިއަދު އޮތީ 2 ގޮތެއް: ގުޓެރޭޒް

ބައިނަލްއަޤުވާމީ ފެންވަރުގައި ކުރިއަށް ގެންދާ މޫސުމީ ނޭދެވޭ ބަދަލުތަކާ ބެހޭ އެންމެ ވަރުގަދަ ބައްދަލުވުން ކަމުގައި ކޮޕް27 ގައި ބައިވެރިވުމަށް މިޞްރަށް ދަތުރުކޮށްފައިވާ ޤައުމުތަކަށް އޮތީ 2 އިޚްތިޔާރެއް ކަމަށާ، އެއީ ޖައްވު ހޫނު ކުރާ ވިހަ ގޭސް ބޭރު ކުރާ މިންވަރު މަދު ކުރުމަށް އެންމެން ގުޅިގެން މަސައްކަތް ކުރުން ނުވަތަ، އަންނަން އޮތް ޖީލުތަކުގެ މައްޗަށް، މޫސުމީ ކާރިޘާއަކާ ކުރިމަތިލާން މަޖުބޫރު ކުރުމުގެ ޙުކުމް އިއްވުން ކަމަށް، އދގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒް ވިދާޅުވެއްޖެއެވެ.

ރަޝިއާއިން ޔޫކްރައިންގައި ކުރަމުންދާ ހަނގުރާމައާ، ބާޒާރުތަކުގައި ތަކެތީގެ އަގުތައް އުފުލުމާއި، ހަކަތައިގެ ސަޕްލައިގެ ދަތިކަމާއެކު ޤައުމުތަކުން މޫސުމީ ނޭދެވޭ ބަދަލުތަކަށް ދޭ ސަމާލުކަން ހިސާބަކަށް ކުޑަވެފައިވާ މި ދަނޑިވަޅުގައި، ދުނިޔޭގެ އެކި ކަންކޮޅުތަކުން ގިނަ ޤައުމުތަކެއްގެ ލީޑަރުން މިހާރު ގެންދަވަނީ މިޞްރުގެ ޝަރަމްއައްޝައިޚްގައި ބައްދަލު ކުރައްވަމުންނެވެ. 2 ހަފުތާއެއްހާ ދުވަހުގެ މުއްދަތަށް ދެމިގެންދާ ކޮޕް27ގެ ބައްދަލުވުންތައް ފެށުމާ ދިމާކޮށް ގުޓެރޭޒް ދެއްވި ތަޤުރީރުގެ ރާގުގައި ވަނި އިންޒާރު ދެނިވި ރޫޙެއް ކަމަށް ސިފަކުރެއެވެ.

މި މޭރުމުން ވާހަކަ ކުރިއަށް ގެންދަވަމުން ގުޓެރޭޒް ވަނީ، ތިމާވެއްޓަށް ގެއްލުން ދެނިވި ހަކަތައިގެ މާއްދާތައް ދޫކޮށްލުމުގެ މަރުހަލާގެ ދުވެލި ހަލުވިކޮށް، ޤައުމުތަކުން ބޭރު ކުރާ ވިހަ ގޭހުގެ މިންވަރު ދަށް ކުރުމަށް ފަޤީރު ޤައުމުތަކަށް ބޭނުންވާ ފަންޑު ފޯރުކޮށްދިނުން ކަށަވަރު ކުރުމަށާ، ދުނިޔެ ހޫނުވުމުގެ ސަބަބުން މިހާރުވެސް ކުރިމަތިލާން ޖެހިފައިވާ އަސަރުތަކަށް އަހުލުވެރިވުމަށް ފަންޑު ކަށަވަރު ކުރުމަށް، ދުނިޔޭގެ މުއްސަނދި ޤައުމުތަކާއި ފަޤީރު ޤައުމުތަކާ ދެމެދު އެއްބަސްވުމެއް އެކުލަވާލުމަށް ގޮވާލައްވާފައެވެ.

ކޯލް ނުވަތަ ބޯޓު ދެއްޔަކީ ހަކަތަ އުފައްދަން ބޭނުން ކުރާ މާއްދާތަކުގެ ތެރެއިން، ވެއްޓަށް އެންމެ ބޮޑު ގެއްލުމެއް ދެނިވި އެއް މާއްދާއަށް ވާ އިރު، 2040 ވަނަ އަހަރު އަންނަ އިރު، ބޯޓު ދެލި ބޭނުން ކުރުން ދުނިޔޭގެ ފެންވަރުގައި ހުއްޓުމަކަށް ގެނައުމަށް ޤައުމުތަކުން އެއްބަސްވުމަކަށް އައުމަށްވެސް ގުޓެރޭޒް ވަނީ ގޮވާލައްވާފައެވެ. އަދި އޯގަނައިޒޭޝަން ފޮރ އިކޮނޮމިކް ކޯޕަރޭޝަން އެންޑް ޑިވަލޮޕްމަންޓްއިން، 2030 ވަނަ އަހަރު އަންނައިރު، އެ ފާހަގައަށް ވާސިލުވުމަށްވެސް ގުޓެރޭޒް ވަނީ ގޮވާލައްވަފައެވެ.

ދުނިޔެ މިއަދު ހަލުވި ދުވެލީގައި މިޞްރާބު ޖަހާފައި ވަނީ، ފުންމިން ނޭނގޭ މޫސުމީ ކާރިޘީ އަނދަވަޅަކާ ދިމާއަށް ކަމުގެ އިންޒާރުވެސް ގުޓެރޭޒް ވަނީ ދެއްވާފައެވެ.