ނަޝީދުގެ ކޮޕް27 ދަތުރުފުޅަށް ލަންކާއިން ޚަރަދެއްނުކުރަން: ލަންކާ

ކޮޕް27 ސަމިޓުގައި ސްރީލަންކާ ތަމްސީލު ކުރެއްވުމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު މިސްރަށް ކުރައްވަމުން ގެންދަވާ ދަތުރުފުޅުގެ ޚަރަދު ލަންކާއިން ނުކުރާކަމަށް އެގައުމުން ބުނެފިއެވެ.

ލަންކާއިން މިހެން ބުނެފައިވަނީ، ރައީސް ނަޝީދު ކުރައްވާ ދަތުރުފުޅުގެ އެއްވެސް ޚަރަދެއް ރައްޔިތުންގެ މަޖިލީހުން ނުކުރާކަމަށް ބުނެ ދިވެހި މީޑިއާތަކުގައި ރިޕޯޓުކޮށްފައިވާތީއެވެ. ލަންކާގެ ރައީސް ރަނިލްގެ ޑިރެކްޓަރ އޮފް އިންޓަނޭޝަނަލް އެފެއާޒް ދިނޫކް ކޮލޮމްބަގެ ކުރެއްވި ޓްވީޓެއްގައި ވިދާޅުވީ ރައީސް ނަޝީދު ކޮޕް27 ގައި ބައިވެރިވެވަޑައިގެންނެވުމަށް ލަންކާއިން ފަންޑުކޮށްފައިނުވާނެކަމަށެވެ.

ނަމަވެސް ދިނޫކް ކޮލޮމްބަގެ ވިދާޅުވެފައިވަނީ ރައީސް ނަޝީދަކީ ތިމާވެއްޓާ ބެހޭ ދާއިރާގައި ރައީސް ރަނިލް ވިކްރަމަސިންހަގެ އެޑްވައިޒަރެއްކަމުގައެވެ.

ކޮޕް27 ސަމިޓުގައި ސްރީލަންކާ ތަމްސީލު ކުރެއްވުމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު މިސްރަށް ހުކުރު ދުވަހު ފުރާވަޑައިގެންފައިވާއިރު އެ ދަތުރުފުޅަށް ޚަރަދު ކުރަނީ ރައްޔިތުންގެ މަޖިލީހުން ނޫން ކަމަށް އެ އިދާރާއިން ބުނެފައިވެއެވެ.

ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަންގެ ޑިރެކްޓަރު ހަސަން ޒިޔާއު ވިދާޅުވެފައިވަނީ އެ ދަތުރުފުޅަށް ޚަރަދު ކުރަނީ ކްލައިމެޓް ވަލްނަރަބަލް ފޯރަމް (ސީވީއެފް) އިން ކަމަށެވެ. ރައީސް ނަޝީދު މިސްރަށް ކުރައްވާ ދަތުރުފުޅަކީ ރަސްމީ ދަތުރުފުޅެއްގެ ގޮތުގައި ބަޔާންކޮށްފައިވަނީ ކްލައިމެޓް ވަލްނަރަބަލް ފޯރަމްގެ ރަސްމީ ދައުވަތަކަށް ރައީސް ނަޝީދު ވަޑައިގަންނަވާތީ ކަމަށާއި ސީވީއެފްގެ ގުޅުންހުރި ބައެއް ކަންތައްތައް ރާއްޖެއިން ބަލަހައްޓަމުންދާތީ ކަމަށް ވެސް ޒިޔާއު ވަނީ ވިދާޅުވެފައެވެ.

ރައީސް ނަޝީދަކީ ސީވީއެފްގެ އެމްބެސެޑަރ ފޯ އެމްބިޝަންކަން ފާހަގަކުރައްވާ ޒިޔާއު ވިދާޅުވީ މަޖިލީހުގެ އިދާރާއިން ބަޔާން ނެރުނީ މަޖިލީހުގެ ރައީސް ރާއްޖެއިން ބޭރަށް ދަތުރުފުޅެއް ކުރައްވާ ނަމަ އެކަން އާންމުންނަށް އެންގުމުގެ ގޮތުން ކަމަށެވެ.

ރައްޔިތުންގެ މަޖިލީހުގެ އިދާރާއިން ހުކުރު ދުވަހު ނެރުނު ބަޔާނެއްގައި ބުނެފައިވަނީ 27 ވަނަ "ކޮންފަރެންސް އޮފް ދަ ޕާޓީސް އޮފް ދަ ޔުނައިޓެޑް ނޭޝަންސް ފްރޭމްވޯރކް ކޮންވެންޝަން އޮން ކްލައިމެޓް ޗޭންޖް" (ކޮޕް 27) ގައި ބައިވެރިވެވަޑައިގެންނެވުމަށް ހުކުރު ދުވަހުގެ ހެނދުނު ރައީސް ނަޝީދު މިސްރުގެ ޝާމް އަލް ޝާއިޚްއަށް ފުރާވަޑައިގެންފައިވާ ކަމަށެވެ. އަދި މިއީ އެމަނިކުފާނު ކުރައްވާ ރަސްމީ ދަތުރުފުޅެއް ކަމަށާއި ސަމިޓުގައި ބައިވެރިވެވަޑައިގަންނަވަނީ ސްރީލަންކާގެ ޤައުމީ ވަފުދުގެ މެންބަރެއްގެ ގޮތުގައި ކަމަށެވެ.

ނަޝީދުގެ މި ދަތުރުފުޅަކީ މި މަހުގެ 4 އިން 9 އަށް ކުރައްވާ ދަތުރުފުޅެކެވެ.

މަޖިލީހުގެ އިދާރާއިން ބުނީ ކޮޕް ސަމިޓުގައި 8 ނޮވެމްބަރު ވި އަންގާރަ ދުވަހު ބޭއްވި ކްލައިމެޓް ޕްރޮޕެރިޓި ޕްލޭންސް ފްލެގްޝިޕް އިވެންޓު ކަމަށްވާ "ޕޭވިންގ ދަ ވޭ ފްރޮމް ވަލްނަރެބިލިޓީ ޓު ޕްރޮސްޕެރިޓީ" ގައި އެމަނިކުފާނު ބައިވެރިވެވަޑައިގެންވި ކަމަށެވެ. މިއީ ކްލައިމެޓް ވަލަނަރަބަލް ފޯރަމް (ސީވީއެފް) އާއި ވަލްނަރަބަލް ގްރޫޕް އޮފް 20 (ވީ20) އިން ރާވައި އިންތިޒާމް ކުރި ބައްދަލުވުމެއް ކަމަށާއި މި ހަރަކާތުގައި މޫސުމީ ތަނަވަސްކަމުގެ ޤައުމީ ޕްލޭންތައް އެކުލަވައިލުމުގައި ޤައުމުތަކުން ހޯދާފައިވާ ކުރިއެރުންތައް ދައްކާލާފައިވާކަމަށެވެ.

ކޮޕް27 ގައި ނަޝީދު ލަންކާ ތަމްސީލު ކުރައްވާއިރު އެމަނިކުފާނު ގެންދަވަނީ ލަންކާގެ މިހާރުގެ ރައީސް ރަނިލް ވިކްރަމަސިންހައާ އެކު ވަރަށް ގާތުން މަސައްކަތް ކުރައްވަމުންނެވެ. އެގޮތުން، އެ މަނިކުފާނުގެ އެޑްވައިޒަރަކަށް ވެސް މިއަހަރުގެ މެއި މަހުގެ ތެރޭގައި ނަޝީދު އައްޔަން ކުރެއްވިއެވެ. އެއީ ލަންކާއަށް ދިމާވެފައިވާ އިގްތިސާދީ ހާލަތާ ގުޅިގެން ބޭރުގެ އެހީ ހޯދުމަށާއި ލަފާ ހޯދުމަށް އައްޔަން ކުރެއްވި މަގާމެކެވެ.

ކޮޕް27 ގައި ރާއްޖެ ތަމްސީލު ކުރައްވާ ވަފުދާ އެކު ރައީސުލްޖުމްހޫރިއްޔާގެ ނައިބު ފައިސަލް ނަސީމް ވެސް ވަނީ ހުކުރު ދުވަހު މިސްރަށް ވަޑައިގެންފައެވެ.