މަޖިލީހުގެ ރައީސް އެހެން ގައުމެއްގެ ވަފުދެއް ތަމްސީލުކުރެއްވުން، ރައީސް މައުމޫނަށްވެސް ގޯސް
ހުކުރު ދުވަހުގެ ހެނދުނު ރައީސް ނަޝީދު ވަނީ މިސްރުގެ ޝަރްމުއް ޝައިޚަށް ފުރާވަޑައިގެންފައި
ކުރީގެ ރައީސް މައުމޫނު އަބްދުލް ގައްޔޫމް
ސްރީލަންކާގެ ގައުމީ ވަފުދުގެ މެންބަރެއްގެ ގޮތުގައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މިސްރަށް ހުކުރު ދުވަހު ފުރާވަޑައިގެންފައިވާއިރު، އެކަން ކުރީގެ ރައީސް މައުމޫނު އަބްދުލް ގައްޔޫމަށްވެސް ގޯސްވެއްޖެއެވެ.
27 ވަނަ ކޮންފަރެންސް އޮފް ދަ ޕާޓީސް އޮފް ދަ ޔުނައިޓެޑް ނޭޝަންސް ފްރޭމްވޯރކް ކޮންވެންޝަން އޮން ކްލައިމެޓް ޗޭންޖް (ކޮޕް 27)ގައި ބައިވެރިވެވަޑައިގެންނެވުމަށް ހުކުރު ދުވަހުގެ ހެނދުނު ރައީސް ނަޝީދު މިސްރުގެ ޝަރްމުއް ޝައިޚަށް ފުރާވަޑައިގެންފައިވާއިރު، ސަމިޓުގައި ބައިވެރިވެވަޑައިގަންނަވަނީ ސްރީލަންކާގެ ގައުމީ ވަފުދުގެ މެންބަރެއްގެ ގޮތުގައި ކަމަށް މަޖިލިސް އިދާރާއިން ވަނީ ބުނެފައެވެ.
އެކަމާ ގުޅޭގޮތުން ކުރެއްވި ޓްވީޓެއްގައި ކުރީގެ ބަންޑާރަނައިބު ޑރ. މުހައްމަދު މުނައްވަރު ވަނީ، ދިވެހިރާއްޖޭގެ ރައްޔިތުންގެ މަޖިލީހުގެ އިއްޒަތްތެރި ރައީސް ދިވެހި ރައްޔިތުންގެ ފައިސާއިން މުސާރަ ނަންގަވައިގެން، އެހެން ގައުމެއްގެ ވަފުދުގައި އެ ގައުމު ތަމްސީލު ކުރައްވަން ވަޑައިގެންނެވިކަން ފާހަގަކުރައްވާފައެވެ. އަދި ދިވެހި ދައުލަތަށް ވަފާތެރިވުމަކީ ކޮބައިތޯ ޑރ. މުނައްވަރު ވަނީ ސުވާލު ކުރައްވާފައެވެ.
އެ ޓްވީޓަށް ކުރެއްވި ރިޕްލައިގައި ރައީސް މައުމޫނު ވަނީ، އެއީ ވަރަށް ރަނގަޅު ވާހަކަފުޅެއްކަން ބަޔާންކުރައްވާފައެވެ.
ކޮޕް27ގައި ނަޝީދު ލަންކާ ތަމްސީލު ކުރައްވާއިރު، އެކަމާ ގުޅިގެން ބައެއް ފަރާތްތަކުން ގެންދަނީ އެމަނިކުފާނަށް ފާޑުވިދާޅުވަމުންނެވެ.
މިއީ ކްލައިމެޓް ވަލްނަރަބަލް ފޯރަމް (ސީވީއެފް)އާއި ވަލްނަރަބަލް ގްރޫޕް އޮފް 20 (ވީ20)އިން ރާވައި އިންތިޒާމްކުރާ ބައްދަލުވުމެކެވެ. މި ހަރަކާތުގައި މޫސުމީ ތަނަވަސްކަމުގެ ގައުމީ ޕްލޭންތައް އެކުލަވައިލުމުގައި ގައުމުތަކުން ހޯދާފައިވާ ކުރިއެރުންތައް ދައްކާލާނެއެވެ. އެގޮތުން 2021 ވަނަ އަހަރުވެސް ރައީސް ނަޝީދު ވަނީ ބަންގްލަދޭޝް ސަރުކާރުން އިންތިޒާމްކުރި "ވީ20 ކްލައިމެޓް ވަލްނަރަބަލްސް ފައިނޭންސް ސަމިޓު"ގައި ބައިވެރިވެވަޑައިގަންނަވާފައެވެ.
