މޫސުމީ ކާރިސާ ކުރިމަތިވާ ގައުމުތަކަށް އެހީވުމަށް ޚާއްސަ ފަންޑެއް ހުޅުވަން ކޮޕް27ގައި އެއްބަސްވެއްޖެ

މޫސުމަށް އަންނަ ނޭދެވޭ ބަދަލުތަކުގެ ސަބަބުން މޫސުމީ ކާރިސާތައް ކުރިމަތިވާ ގައުމުތަކަށް އެހީވުމަށް ޚާއްސަ ފަންޑެއް ހުޅުވުމަށް ކޮޕް27 ސަމިޓުގެ ބައިވެރިން އެއްބަސްވެއްޖެއެވެ. މިސްރުގެ ޝަރްމުއްޝައިޚްގައި ކުރިޔަށް ދިޔަ ސަމިޓު ބައްދަލުވުން އިތުރު ދެ ދުވަހަށް ދެމިގެން ގޮސް، އާދީއްތަ ދުވަހު ފަތިހު އެއްބަސްވުމަކަށް އާދެވުމާ އެކު ބައްދަލުވުމުގެ ބައިވެރިންގެ ފަރާތުން ހޫނު ތަރުހީބެއް އިވިގެން ދިޔައެވެ. އެއްބަސްވުމުގެ ފައިނަލް ޓެކްސްޓާ މެދު އެއްބަސްނުވެވި ފައިނަލް މަޝްވަރާތައް މުޅި ރޭ އެއްކޮށް ކުރިޔަށް ދިޔައިރު، ގިނަ އަދަދެއްގެ ބައިވެރިން ކޮންފަރެންސް ހޯލްގައި ނިދިފައި ތިބި ފޮޓޯތައް ވެސް އާންމުވެފައިވެއެވެ.   

ފަތިހު އިއުލާނުކުރެވުނު ސަމިޓުގެ ނިންމުމަށް މަރުހަބާ ވިދާޅުވަމުން އދގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވިދާޅުވީ މި ލިބުނީ މި ވަގުތަށް ބޭނުންވެފައިވާ ސިޔާސީ ސިގްނަލެއް ނަމަވެސް މިގޮތަށް ލިބޭ ފަންޑިން، ގައުމުތަކަށް ލިބޭ ގެއްލުމާ އަޅާ ނުކިޔޭނެ ކަމަށާއި، އެހެން ލިބޭ އެހީއަކުން ނުފުދޭނެ ކަމަށެވެ.  

ޝަރްމުއްޝައިޚް ފަންޑުން އެހީ ދެވޭނީ "ލޮސް އެންޑް ޑެމޭޖް" ބޭސިސްއަށް ބެލުމަށް ފަހުގައި ކަމަށް ކަނޑައަޅާފައިވެއެވެ. އަދި ފަންޑަށް ދީފައިވާ ނަމަކީ ވެސް ލޮސް އެންޑް ޑެމޭޖް ފަންޑެވެ.

ބައްދަލުވުމުގައި ބައިވެރިވި 200 އެއްހާ ގައުމުން ވަނީ އެއްބަސްވުމަށް އާނ ބަސް ބުނެފައެވެ. ބައްދަލުވުން ނިމުނުކަން މިއަދު ހެނދުނު ރަސްމީކޮށް އިއުލާނުކުރުމާ އެކު ބައިވެރިން އެނބުރި ގައުމުތަކަށް ދާންވަނީ ފަށާފައެވެ.