މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް ނުރައްކަލަށް ހުށަހެޅިފައިވާ ތަންތަނާއި ފަރާތްތައް ހިމާޔަތްކުރުމަށްޓަކައި, މޫސުމަށް އަންނަ ބަދަލުތަކުގެ މައްސަލައިގެ ނާޒުކުކަން ގަބޫލުކުރައްވައި އެ މައްސަލައަށް ދޭންޖެހޭ ސަމާލުކަމާއި އަހަންމިއްޔަތުކަން ދެއްވުމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ދުނިޔޭގެ ލީޑަރުންނަށް ގޮވާލައްވައިފިއެވެ.

އެމަނިކުފާނު މިކަމަށް ގޮވާލެއްވީ މިޞްރުގެ ޝަރްމުއްޝައިޚްގައި މިހާރު ކުރިޔަށްދާ، އދ.ގެ ކްލައިމެޓް ޗޭންޖް ކޮންފަރެންސް ( ކޮޕް 27)ގެ ހަވާސާގައި "ކްލައިމެޓް ޗޭންޖް އެންޑް ސަސްޓެއިނަބިލިޓީ އޮފް ވަލްނަރަބަލް ކޮމިއުނިޓީސް"ގެ ނަމުގައި ބޭއްވި މަތީ ފަންތީގެ ވަށްމޭޒު ބައްދަލުވުމުގައި ވާހަކަފުޅު ދައްކަވަމުންނެވެ.

މިބައްދަލުވުމުގައި ވާހަކަފުޅުދައްކަވަމުން ނައިބު ރައީސް ވިދާޅުވީ، މޫސުމަށް އަންނަ ބަދަލުތަކުގެ މައްސަލާގައި އެންމެ ކުރީ ސަފަށް ނުކުމެ ހަރަކާތްތެރިވާ ގައުމުތަކަކީ މޫސުމީ ނޭދެވޭ ބަދަލުތަކުގެ ސަބަބުން އެމީހުންގެ ދިރިއުޅުމާއި ދިރިއުޅުމަށްކުރާ މަސައްކަތްތައް ބީވެދިއުމުގެ ނުރައްކާ އެންމެ ބޮޑަށް އޮތް ގާއުމުތައް ކަމުގައެވެ. އަދި މޫސުމަށް އަންނަ ބަދަލުތަކުގެ މައްސަލައާމެދު، އާންމު އެހެން މައްސަލަތަކާ އެއްގޮތަށް އަމަލުކުނުރެވޭނެކަން ފާހަގަކުރައްވައި، މިކަމުގައި ދެކޭގޮތް މުޅިން ބަދަލުކުރަންޖެހޭކަމުގައި އެމަނިކުފާނު ވިދާޅުވިއެވެ.

އެމަނިކުފާނު ވަނީ ޕާކިސްތާނުގައި ދާދިފަހުން ހިނގި ފެންބޮޑުވުމުގެ ހާދިސާގައި 1.7 މިލިއަން ގެ ހަލާކުވެ 33 މިލިއަން މީހުންގެ ދިރިއުޅުމަށް އަސަރުކޮށްފައިވާކަން ފާހަގަކުރައްވައި، ދުނިޔޭގެ ފިނިހޫނުމިން އިތުރަށް މައްޗަށްދާނަމަ ކުރިމަގުގައި މިފަދަ ހާދިސާތައް ހިނގާ މިންވަރު އިތުރުވެގެން ދިއުން އެކަށީގެންވާކަން ފާހަގަކުރައްވާފައެވެ. އަދި ދުނިޔޭގެ ފިނިހޫނުމިން 1.5 ޑިގްރީ ސެލްސިއަސްގައި ހުރެގެންވެސް ފެނާއި ކާބޯތަކެތީގެ ރައްކާތެރިކަމާއި މީހުންގެ ސިއްހަތާއި ގުދުރަތީ ދިރުންތަކަށް ނޭދެވޭ އަސަރުތައް ކުރާކަން ފާހަގަކުރައްވައި، އެތައް ގައުމަކަށް ކުރިމަތިވެފައިވާ މި މައްސަލައަށް މުޅި ބައިނަލްއަގުވާމީ މުޖުތަމައުން އިޖާބަ ދޭންޖެހޭކަމަށާއި މިކަމުން އަރައިގަތުމަށް ފިޔަވަޅުތައް އެޅުމާއި މިކަންކަމަށް ބޭނުންވާ ފައިސާ ހަމަޖެއްސުމުގެ މުހިންމުކަން ނައިބު ރައީސް ފާހަގަކުރެއްވިއެވެ.

އެމަނިކުފާނު ވިދާޅުވީ، ހަގީގަތަކީ މޫސުމަށް އަންނަ ބަދަލުތަކުގެ ސަބަބުން މިހާރުވެސް ގިނަ ގައުމުތަކަކަށް އެތައް ގެއްލުންތަކެއް ކުރިމަތިލާންޖެހިފައިވާ ކަމަށެވެ. އަދި މޫސުމަށް އަންނަ ބަދަލުތަކުގެ ނޭދެވޭ އަސަރުތައް ކުޑަކުރުމަށް އަޅަންޖެހޭ ފިޔަވަޅުތަކާއި އެ ބަދަލުތަކަށް ހޭނުމަށް ކުރަންޖެހޭ މަސައްކަތްތައް ނުކުރެވި ދިގުލައިގެން ދާވަރަކަށް މީގެ ގެއްލުންތައް ބޮޑުވެ އިތުރުވަމުންދާނެކަން ފާހަގަކުރެއްވިއެވެ. އަދި ރާއްޖެއަށް ނަޒަރު ހިންގާލާއިރު، ދިވެހިންގެ ދިރިއުޅުމުގެ އެތައް ކަމެއް ގުޅިލާމެހިފައިވާ މުރަކައިގެ ފަރުތަކަށް މީގެ އަސަރުކުރަމުންދިއުމަކީ މިފަދައިން އެންމެ ކަންބޮޑުވުން އޮތް އެއް ކަންތައްކަން އެމަނިކުފާނު ފާހަގަކުރެއްވިއެވެ.

ދުނިޔޭގެ ފިނިހޫނުމިން 1.5 ޑިގްރީ ސެލްސިއަސް ނުވަތަ އެއަށްވުރެ މަތީގައި ހުންނަނަމަ 70 އިންސަތައާ 90 އިންސައްތައާ ދެމެދުގެ މިންވަރަކަށް ދުނިޔޭގެ ފަރުތަކުގެ ދިރުންނެތި ހިނގައިދާނެކަމަށް އިންޓަރ ގަވަރމެންޓަލް ޕެނަލް އޮން ކްލައިމެޓް ޗޭންޖް (އައިޕީސީސީ)ން ލަފާކުރާ ލަފާފުކުރުންތަކަށް އިޝާރާތްކުރައްވައި ނައިބު ރައީސް ވިދާޅުވީ، މިކަމަކީ ރާއްޖޭގެ ފަތުރުވެރިކަމާއި ވަޒީފާތަކާއި އަދި މަސްވެރިކަމާއި މުޅި ގުދުރަތީ ދިރުންތަކަށް ވަރަށްބޮޑަށް ނޭދެވޭ އަސަރުތައް ފޯރާނެ ކަމެއް ކަމުގައެވެ.

އަންގާރަ ދުވަހު ބޭއްވި، މަތީ ފަންތީގެ ވަށްމޭޒު ބައްދަލުވުމުގެ ކުރިން ރައީސުލްޖުމްހޫރިއްޔާގެ ނައިބު ވަނީ, ޝަރްމުއްޝައިޚް އިންޓަރނޭޝަނަލް ކޮންވެންޝަން ސެންޓަރުގައި ހުރި ބައެއް ޕެވިލިއަންތަކަށް ޒިޔާރަތްކުރައްވައި, ކޮޕް27ގެ ބައިވެރިވާ ރާއްޖޭގެ ހިރާ ސްކޫލުގެ ދަރިވަރަކާވެސް ބައްދަލުކުރައްވާފައެވެ.