އެހެން ޤައުމެއް ތަމްސީލު ކުރެއްވުމުން ނަޝީދުގެ ހިތްޕުޅުގައި ރާއްޖެ އަށް އޮތް ގަދަރު ކުޑަކަން ހާމަވޭ: އެމްއާރުއެމް
ރައީސް ނަޝީދު އެހެން ޤައުމެއް ތަމްސީލު ކުރެއްވުން ބަލައި ނުގަންނާނެ ކަމަށް އެމްއާރުއެމް އިން ބުނި
ސިޔާސީ މަސައްކަތަކީ ނަޒާހަތްތެރިކަމާ އެކު ކުރެވިދާނެ މަސައްކަަތެއްކަން ސާބިތު ކޮށްދޭނަން: ފާރިސް
މިހާރު ކުރިއަށްދާ ކޮޕް27 ގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އެހެން ޤައުމެއް ތަމްސީލް ކުރެއްވުމުން އެމަނިކުފާނުގެ ހިތްޕުޅުގައި ރާއްޖެ އަށް އޮތް ގަދަރު ކުޑަކަން ހާމަވާ ކަމަށް މޯލްޑިވްސް ރިޕޯމް މޫވްމެންޓް (އެމްއާރުއެމް) އިން ބުނެފިއެވެ.
އެ ޕާޓީ އިން މިހެން ބުނީ އާދީއްތަ ދުވަހު ނެރުނު ބަޔާނެއްގައެވެ. ދިވެހި ބަހުންނާއި އިނގިރޭސި ބަހުން ނެރުނު ބަޔާނުގައި އެމްއާރުއެމް އިން ވަނީ ރައީސް ނަޝީދު ކޮޕް27 ގައި އެހެން ޤައުމެއް ތަމްސީލު ކުރައްވާތީ އެކަން ކުށްވެރިކޮށްފައެވެ.
އެ ބަޔާނުގައި އެމްއާރުއެމް އިން ބުނީ އެ ޕާޓީ އިން ދެކޭ ގޮތުގައި ރައީސް ނަޝީދު އެހެން ޤައުމެއް ތަމްސީލުކުރެއްވުމަކީ ދިވެހި ދައުލަތުގެ މަސްލަހަތާ ފުށުއަރާ، ޤާނޫނު އަސާސީގެ 75 ވަނަ މާއްދާ އާއި ރައްޔިތުންގެ މަޖިލީހުގެ ގަވާއިދުގެ ރޫހާ ޚިލާފު އަދި މަޖިލީހުގެ ރައީސްގެ މަސްއޫލިއްޔަތުތަކަށް އޮޅުން އަރާ، ސުލޫކީ މިންގަނޑުތަކާ ޚިލާފު އަމަލެއް ކަމަށެވެ. އަދި އެކަން އެ ޕާޓީ އިން ބަލައިިނުގަންނާނެ ކަމަށް ވެސް ވަނީ ބުނެފައެވެ.
އެމްއާރުއެމް އިން ބުނީ ރާއްޖޭގެ ރައްޔިތުންގެ މަޖިލީހުގެ ރައީސްގެ މަގާމުގައި ހުންނަވައިގެން، ރާއްޖެއިން ވެސް ބައިވެރިވާ ބައިނަލްއަގުވާމީ ކޮންފަރެންސެއްގައި އެހެން ޤައުމެއްގެ މަންދޫބެއްގެ ގޮތުގައި ވަޑައިގަތުމަކީ ރައީސް ނަޝީދުގެ ހިތްޕުޅުގައި ރާއްޖެ އަށް އޮތް ގަދަރު ކުޑަކަން ހާމަކޮށްދޭ ކަމެއް ކަމަށެވެ.
ރައީސް ނަޝީދު ކޮޕް27 ގައި ތަމްސީލު ކުރައްވަނީ އަވައްޓެރި ސްރީލަންކާއެވެ. އެމަނިކުފާނުގެ އެ ނިންމެވުމާ އެކު ގިނަ ބަޔަކު ދަނީ އެމަނިކުފާނަށް ފާޑުވިދާޅުވަމުންނެވެ.
މިއަހަރުގެ ކޮޕް ސަމިޓުގައި ރާއްޖެއިން ވެސް ބައިވެރިވެއެވެ. ރާއްޖެ އިން ބައިވެރިވާ ވަފުދުގައި އިސްކޮށް ހުންނެވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.
