ގިނަ ދުވަސްތަކަކަށް ދެމިގެން ގޮސްފައިވާ ސިޔާސީ ހަލަބޮލިކަމުގެ އޮއެވަރެއްގައި ޖެހިފައިވާ މެލޭޝިއާގެ ސިޔާސީ ލީޑަރުން އާންމު އިންތިޚާބު ކާމިޔާބު ކުރެއްވުމަށް ކެމްޕޭން ފައްޓަވައިފިއެވެ.

ކުރިއަށް އޮތް އިންތިޚާބަކީ އަދުގެ ބޮޑުވަޒީރު އިސްމާއީލު ޞަބްރީ އާއި ކުރީގެ ސިޔާސީ ޝަޚްސުން ކަމުގައިވާ އަންވަރު އިބްރާހީމް އާއި މުޙްޔިއްދީން ޔާސީން ފަދަ ބޭބޭފުޅުންގެ މެދުގައި ވާދަވެރިކަން ބޮޑު އިންތިޚާބަކަށް ވާނެ ކަމަށް ލަފާ ކުރެވެއެވެ.

މެލޭޝިއާގެ ޤާނޫނު ހަދާ މަޖިލީހުގެ 222 ގޮނޑިއަށް މެންބަރު ހޮވުމަށް ކުރިއަށް ގެންދާ އާންމު އިންތިޚާބުގައި، އެއް ޕާޓީއަކަށް ނުވަތަ އެއް ކޯލިޝަނަކަށްވެސް އަޣުލަބިއްޔަތު ކަށަވަރު ނުވާނެ ކަމަށް ޚިޔާލު ހޯދުމުގެ ވޯޓުތަކާއި އެނަލިސްޓުންގެ ރަޢުޔު ބުނެއެވެ. އެހެން ކަމުން، މެލޭޝިއާގެ އާ ސަރުކާރު އެކުލަވާލުމަށްޓަކާ، އިދިކޮޅު ކޯލިޝަންތަކުންވެސް އެއްގަލަކަށް އަރަން މަޖުބޫރުވާނެއެވެ.

ނޮވެމްބަރު 19 ވަނަ ދުވަހަށް ތާވަލު ކޮށްފައި ވާ މެލޭޝިއާގެ އާންމު އިންތިޚާބުގައި ވޯޓު ދިނުމުގެ ޙައްޤު ލިބިގެންވާ މީހުންގެ ޢަދަދު، 21 މިލިއަނަށް އަރާއިރު، ވޯޓުލާ މީހުންގެ މެދުގައި އެންމެ ޙައްސާސްކަން ބޮޑު މައުލޫތަކުގެ ތެރޭގައި ބާޒާރުގައި ތަކެތީގެ އަގު އުފުލުމުގެ މައްސަލައާއި، މި ފަހަކަށް އައިސް ކުރިމަތިލާން ޖެހިފައިވާ ސިޔާސީ ހަލަބޮލިކަމާއި، އިޤްތިޞާދު މަޑު ޖެހުން ފަދަ ކަންކަން ހިމެނެއެވެ.

މެލޭޝިއާގައި އާންމު އިންތިޚާބެއްގެ ވޯޓުލުން އެންމެ ފަހުން ކުރިއަށް ގެންގޮސްފައި ވަނީ 2018 ވަނަ އަހަރުގެ ތެރޭގައި ކަމަށް ވާ އިރު، އޭގެ ފަހުން އެކަނިވެސް އެ ޤައުމުގެ ބޮޑުވަޒީރު ކަމުގެ މަޤާމުން 3 ބޭފުޅަކު ވަނީ ފެނިފައެވެ.

މެލޭޝިއާގެ ސިޔާސީ މަސްރަހު އަދި ރޭވިފައި އޮތް ގޮތަށް ބަލާއިރު އިދިކޮޅު ކޯލިޝަންތަކުގައި އިސްކޮށް ތިއްބެވީ، ކުރީގެ ބޮޑުވަޒީރު މުޙްޔިއްދީން ޔާސީންއާއި ޒަމާންވީ އިދިކޮޅު ލީޑަރު އަންވަރު އިބްރާހީމް ފަދަ ބޭބޭފުޅުންނެވެ. އޭގެ އިތުރުންވެސް ގިނަ ޕާޓީތަކެއް، ކުރިއަށް އޮތް އިންތިޚާބުގައި ވާދަ ކުރެއެވެ. އޭގެ ތެރޭގައި، ކުރީގެ ބޮޑުވަޒީރު މަހާތީރު މުޙައްމަދުގެ ޕާޓީއެއްވެސް ހިމެނޭ އިރު، އެކަމަކީވެސް ވޯޓުތައް އިތުރަށް ބައިބައިވެގެންދާނެ ސަބަބެއް ކަމަށް ބެލެވެއެވެ.