މަސްތުވާތަކެތި އެތެރެކުރިކަމުގެ ތުހުމަތު ކުރެވޭ މެލޭޝިއާ މީހަކަށް ދައުވާކޮށްދިނުމަށް އެދި ފޮނުވައިފި

މަސްތުވާތަކެތި އެތެރެކުރި ކަމުގެ ތުހުމަތު ކުރެވޭ މެލޭޝިއާ މީހަކަށް ދައުވާކޮށްދިނުމަށް އެދި ފޮނުވައިފި އެވެ.

ދައުވާ ކުރުމަށް ފޮނުވާފައިވަނީ މެލޭޝިއާގެ 44 އަހަރުގެ އެން ޖީ ތަމް ލިޕް އެވެ. ޝަރީއަތް ނިމެންދެން ބަންދު ކުރުމަށް ނިންމީ ރާއްޖެއަށް މަސްތުވާތަކެތި އެތެރެކުރުމުގެ ތުހުމަތުގައެވެ.

Advertisement

ކްރިމިނަލް ކޯޓުން އޭނާ ބަންދު ކުރުމަށް އަމުރުކޮށްފައިވަނީ 3 އޮކްޓޫބަރު 2024 ވީ ބުރާސްފަތި ދުވަހުއެވެ.

ބަންދުގައި ބެހެއްޓުމަށް އަމުރުކުރި ސަބަބުތަކުގެ ތެރޭގައި ކުށްކުރިކަމަށް ތުހުމަތުކުރެވޭ މިންވަރަށް ހެކި ހުށަހަޅާފައިވާކަން ފާހަގަކޮށްފައިވެއެވެ. އެގޮތުން ކަސްޓަމްސް އޮފިސަރުންނާއި، ފުލުހުންގެ ބަޔާން ހުށަހަޅާފައިވާއިރު، ލަގެޖުން މަސްތުވާތަކެތި ފެނި، ކޮންޓްރޯލް ޑެލިވަރީ އޮޕަރޭޝަން ކުރިއަށް ގެންދެވުނުމާއި، މޯބައިލް ފޮރެންސިކް ރިޕޯޓް ހުށަހަޅާފައިވެއެވެ. މީގެ އިތުރުން ނެޓްވޯކެއްގެ މެދުގައި ވާހަކަ ދެކެވި މަޝްވަރާ ކުރެވި ފޮޓޯއާއި މައުލޫމާތު ހިއްސާކުރެވިފައިވާ ކަމަށާއި، މަސްތުވާތަކެތީގެ ތަހުލީލު ރިޕޯޓު ހުށަހަޅާފައިވެއެވެ. އަދި ޓްރެފިކިންގ މިންގަނޑަށް އަރާވަރަށް މަސްތުވާތަކެތި ފެނިފައިވާކަން ފާހަގަކޮށްފައިވެއެވެ.

ބަންދުގައި ބަހައްޓަން ޖެހޭ ހާލަތަކީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ގާނޫނުގެ 59 ވަނަ މާއްދާއާއި 60 ވަނަ މާއްދާގެ ކ އަށް ރިޔާއަތް ކޮށެވެ.

ބަންދުގައި ބަހައްޓަންޖެހޭ ހާލަތް އޮތް ކަމަށް ދެކޭ ސަބަބުގެ ގޮތުގައި ކްރިމިނަލް ކޯޓުން ފާހަގަކޮށްފައިވަނީ މުޖުތަމައުގެ ސަލާމަތާއި ރައްކާތެރިކަމަށްޓަކައި ޝަރީއަތް ކުރުމާބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ ނ ގެ 3 ވަނަ މާއްދާ ރާއްޖެއިން ބޭރުން ރާއްޖެއަށް މަސްތުވާތަކެތި އެތެރެކުރުމާއި، 4 ވަނަ މާއްދާއިން ޓްރެފިކިން މިންގަނޑަށް އަރާ މިންވަރަށް މަސްތުވާތެކެތި ފެނުމާއި، ޖިނާއީ ބޮޑު މައްސަލައެއްގެ ކެޓަގަރީއަށް ފެތުމާއި، ގިނަ އަދަދެއްގެ މަސްތުވާތަކެތި ފެނުން އަދި 6 ވަނަ މާއްދާގެ ގޮތުގައި ރޭވިގެން އިންތިޒާމު ވެގެން މަސްތުވާތަކެތި ވިޔަފާރި ކުރުން ހިމެނެއެވެ.

މި މައްސަލައިގެ ތަހުގީގު ނިމި ޕްރޮސެކިއުޓަރ ޖެނަރަލްގެ އޮފީހަށް ވަނީ ފޮނުވާފައެވެ.