އިގްތިސާދީ ސަބަބުތަކާ ހެދި ކަމަށް ބުނެ މެލޭޝިއާގައި ހިންގާ ކޭއެފްސީ އައުޓްލެޓްތައް ބަންދުކޮށްފިއެވެ.

ދުނިޔޭގެ އެކި ކަންކޮޅުތަކުގައި މަގްބޫލްކަން ހޯދާފައިވާ ކޭއެފްސީ މެލޭޝިއާގައި އޮޕަރޭޓް ކުރާ ފަރާތުން، އައުޓްލެޓްތައް ބަންދުކުރީ އިގްތިސާދީ ސަބަބުތަކަށްޓަކައި ކަމަށް ބުނި ނަމަވެސް، މިތަންތަން ބަންދުކުރީ ގާޒާގައި އިޒްރޭލުން ހިންގަމުންދާ ހަނގުރާމައާ ގުޅިގެން އިޒްރޭލާ ގުޅުން ހުރި ވިޔަފާރިތައް ބޮއިކޮޓް ކުރުމަށް މެލޭޝިއާގައި ހިންގަމުންދާ ކެމްޕޭންގެ ސަބަބުން ކަމަށް މެލޭޝިއާގެ މީޑިއާ އިން ރިޕޯޓްކޮށްފައިވެއެވެ.

މެލޭޝިއާގެ އާބާދީ 60 އިންސަތައަކީ މުސްލިމުންނެވެ.

މެލޭޝިއާގައި ކޭއެފްސީގެ ވިޔަފާރި ހިންގާ ކިއުއެސްއާރު ބްރޭންޑްސް ހޯލްޑިންގްސް އިން ހޯމަ ދުވަހު ނެރުނު ބަޔާނެއްގައި ބުނެފައިވަނީ، ކޮލިޓީ ބްރޭންޑެއްގެ ގޮތުގައި 50 އަހަރަށް ވުރެ ގިނަ ދުވަހު ކޭއެފްސީން މެލޭޝިއާއަށް ޚިދުމަތް ކޮށްފައިވާ ކަމަށާއި، މެލޭޝިއާގެ އިގްތިސާދަށް އެ މުއްދަތުގެ ތެރޭގައި ހިއްސާވެދީފައިވާނެ ކަމަށާއި، 18،000ށް ވުރެ ގިނަ މެލޭޝިއާގެ ރައްޔިތުންނަށް ވަޒީފާގެ ފުރުސަތު ތަނަވަސްކޮށްދީފައިވާނެ ކަމުގައެވެ. މީގެ ތެރެއިން 85 އިން ސަތައް މީހުންނަކީ މުސްލިމުން ކަމަށްވެސް ބަޔާނުގައި ބުނެފައިވެއެވެ. އުނދަގޫ އިގްތިސާދީ ހާލަތުގެ ސަބަބުން ޚިދުމަތް ވަގުތީ ގޮތުން ހުއްޓާލަނީ ކަމަށް ބަޔާނުގައި ބުނި ނަމަވެސް އޭގެ ތަފްސީލެއް ހާމަކޮށްފައެއް ނުވެއެވެ.

އިޒްރޭލާ ގުޅުން ހުރި ވިޔަފާރިތައް ބޮއިކޮޓް ކުރުމަށް އިސްލާމީ ގައުމުތަކުގައި ހިންގަމުންދާ ކެމްޕޭންގެ ސަބަބުން އެ ގައުމުތަކުގައި ހިންގަމުންދާ ހުޅަނގުގެ ވިޔަފާރިތަކަށް ބޮޑެތި ގެއްލުން ވަމުންދާ ކަމަށް ރިޕޯޓުތަކުގައި ވެއެވެ.

2023 ގެ ފަހު ކުއަރޓާގައި މެކްޑޮނަލްޑްގެ ވިޔަފާރީގެ ކުރިއެރުން ރެކޯޑް ކުރެވިފައިވަނީ 0.7 އިން ސައްތައިގައެވެ. އޭގެ ކުރީ އަހަރު އެ މުއްދަތުގައި 16.5 އިން ސައްތައިގެ ކުރިއެރުން ރެކޯޑް ކުރެވިފައިވެއެވެ. ވިޔަފާރި ދަށަށް ދިޔަ ސަބަބާ ބެހޭ ގޮތުން މެކްޑޮނަލްޑް އިން ބުނެފައިވަނީ މެދު އިރުމައްޗާއި އިންޑޮނީޝިއާ އަދި މެލޭޝިއާގައި ހިންގާ ބޮއިކޮޓް ކެމްޕޭންގެ ސަބަބުން ކަމުގައެވެ.