ރޮނާލްޑޯ ވީ ޓެން ހާގްގެ ހަތަރު ވަނަ ޗޮއިސް އަށް!

އިނގިރޭސި ޕްރިމިއާ ލީގުގައި އެސްޓަން ވިލާ އަތުން ބަލިވި މެޗުގައި ކްރިސްޓިއާނޯ ރޮނާލްޑޯ އަށް ކެޕްޓަން ބޭންޑު ދިނީ ހަތަރު ވަނަ ޗޮއިސެއްގެ ގޮތުގައި ކަމަށް ކޯޗު އެރިކް ޓެން ހާގް ބުނެފިއެވެ.

މެޗަށްފަހު ވާހަކަ ދައްކަމުން ޓެން ހާގް ވަނީ ކެޕްޓަނެެއްގެ ޒިންމާ ރޮނާލްޑޯ އަށް ދިން ސަބަބު ސާފުކޮށްދީފައެވެ. އޭނާ ބުނީ ޔުނައިޓެޑުގެ ކެޕްޓަން އިންގްލެންޑުގެ ޑިފެންޑަރު ހެރީ މެގުއާ އިނީ ބެންޗުގައި ކަމަށާއި، ސަސްޕެންޝަންގެ ސަބަބުން ބްރޫނޯ ފެނާންޑޭސް އަށް ނުކުޅެވުން ކަމަށެވެ. ޓެން ހާގް ބުނީ ދެން ޓީމުގައި ރަނގަޅު ލީޑަރެއްގެ ގޮތުގައި ހުރީ ގޯލްކީޕަރު ޑޭވިޑް ޑެހެއާ ކަމަށެވެ. ނަމަވެސް ޑެހެއާ ހުންނަން ޖެހެނީ ގޯލުގައިކަން ފާހަގަކޮށް އޭނާ ބުނީ، ބެންޗާ ދުރުވަނީ ކަމަށެވެ. ޓެން ހާގް ބުނީ ބްރެޒިލްގެ މިޑްފީލްޑަރު ކަސެމީރޯ އަކީ ވެސް ރަނގަޅު ލީޑަރެއް ކަމަށާއި، ނަމަވެސް އިނގިރޭސިން ވާހަކަ ދައްކަން އޭނާ އެހާ ރަނގަޅު ނޫން ކަމަށެވެ. އެހެންކަމުން އޭނާ އަށް ދެން އޮތް ޗޮއިސް އަކަށް ފެނުނީ ރޮނާލްޑޯ ކަމަށެވެ.

އެ މެޗަކީ ގިނަ ދުވަސްތަކަކަށްފަހު ރޮނާލްޑޯ އަށް ޔުނައިޓެޑުގެ ކެޕްޓަންކަމުގެ ޒިންމާ ދިން މެޗެވެ. މެޗުން ބަލިވެ ޔުނައިޓެޑް އޮތީ ލީގު ތާވަލްގެ ފަސް ވަނަ މަގާމުގައެވެ. މި ސީޒަންގައި ރޮނާލްޑޯގެ ފަރާތުން އެންމެ އެދެވޭ ކުޅުމެއް ނުފެނެއެވެ. ސީޒަންގެ ފުރަތަމަ ކޮޅު ޔުނައިޓެޑުގެ ނަތީޖާތައް ދަށްވުމުން ޓެން ހާގް ވަނީ ގިނަ މެޗުތަކެއްގައި ރޮނާލްޑޯ ބެންޗުގައި ވެސް ބައިންދާފައެވެ. ސީޒަންގެ މިހާތަނަށް ރޮނާލްޑޯ އަށް ޖެހުނީ ތިން ލަނޑެވެ.